Dali džanljan?
Sar o cigle so sine arakhle ko ruševine taro purano Vavilon hem o način sar sine kerde sikavena kaj i Biblija tani točno?
O ARHEOLOZIJA ko purano Vavilon arakhle but peke cigle kola so koristinena pe sine te gradinel pe i diz. Sprema o arheologo Robert Koldevej, asavke cigle kerena pe sine ko pečke so sine „avri tari diz“, kote so i glina sine šukar hem kote so sine but grmuške tharibaske jag.
O arheolozija arakhle dokazija so sikavena kaj o vavilonska službenikija koristinena sine adala pečke te keren strašna bukja. O Pol-Alen Boliu kova soj profesori baši asirsko istorija hem čhib ko univerziteti ko Toronto (Kanada) vakerela: „Nekobor vavilonska dokumentija sikavena kaj o cari naredingja okola so nane leske poslušna hem na poštujnena o sveta bukja te oven frdime ki pečka hem te oven tharde“. Na primer, ko jekh dokumenti taro vreme keda sine cari o Navuhodonosor pišinela: „Uništin len, thar len, pek len... ki pečka... neka thabljon ki jag hem neka uštel baro oblako taro čuro“.
Akava opišinela o nastanija soj pišime ki Biblija ko lil Daniel 3 poglavje. Sprema adava istorisko izveštaj, o cari o Navuhodonosor kergja jekh baro zlatno kipi ki dolina Dura koja so sine avrijal tari diz Vavilon. Keda o trin terne Evreija — o Sedrah, o Misah hem o Avdenago — odbingje te pokloninen pe anglo kipi, o Navuhodonosor holjangja hem naredingja te takjaren i pečka „efta puti posilno“ taro so sine normalno hem o trin Evreija te oven frdime „ki pečka kote so thabljola bari jag“. Ama jekh mokjno angeli spasingja len taro meribe (Dan. 3:1-6, 19-28).
© The Trustees of the British Museum. Licensed under CC BY-NC-SA 4.0. Source
Jekh peki cigla kote soj pišimo o anav Navuhodonosor
O cigle so sine arakhle ko Vavilon isto agjaar potvrdinena kaj i Biblija tani točno. Ko but cigle isi lafija kolencar so slavinela pe e care. Ki jekh lendar pišinela: „O Navuhodonosor, o Cari taro Vavilon... I Palata, koja so me o baro cari gradingjum la... Mle potomcija neka vladinen ki late zasekogaš“. Akava teksti tano but slično e lafencar soj pišime ko Daniel 4:30, kote so o Navuhodonosor falinela pe: „Nane li akava o baro Vavilon kova so me gradingjum le me silaja, te ovel mange carsko palata hem te sikavel kobor baro sium me?“