Sar šaj te arakhe tuke bračno partneri?

1-2. a) Bašo so valjani šukar te razmislinel jekh hristijani so nane ženimo angleder te počminel vrska? b) Ko so mislinela pe e lafea „vrska“ ki akaja statija? (Dikh ko „Objasnime lafija“.)

DALI mangea te ženine tut? Iako i srekja na zavisinela taro adava dali nekoj ka ovel ženimo ili na, but hristijanja kola so nane ženime — bizi razlika dali phure ili terne — mangena te arakhen peske bračno partneri. Džangjola pe, angleder te počmine vrska nekasaja, valjani te ove paše amal e Jehovaja, šukar te pendžare tut hem te ove sposobno materijalno te grižine tut keda ka ove ko brakoa (1. Kor. 7:36). Ako kerea akala bukja, pobari tani i verojatnost kaj ka ovel tut srekjno brako.

² Sepak, nane sekogaš lokho te arakhe bračno partneri so ka odgovorinel tuke (Izr. 31:10). Pa čak ako arakhea nekas kas so mangea pošukar te zapoznajne, šaj nane te ovel tuke lokho te počmine vrska.b Ki akaja statija ka dikha so šaj te pomožinel e hristijanenge so nane ženime te arakhen nekas so mislinena kaj šaj te ovel lenge šukar bračno partneri hem te počminen vrska. Isto agjaar, ka dikha sar šaj o javera taro sobranie te pomožinen okolenge so mangena te ženinen pe.

SAR ŠAJ TE ARAKHE ŠUKAR BRAČNO PARTNERI?

3. Bašo kola bukja valjani te razmislinel jekh hristijani so mangela te ženinel pe?

³ Ako mangea te ženine tut, angleder te počmine te zapoznajne tut nekasaja, valjani te džane kola osobine mangea te oven tle bračno partnere.c Ako na razmislinea bašo akava, šaj te na primetine nekas so šaj te ovel tuke šukar bračno partneri, ili te počmine vrska nekasaja so na odgovorinela tuke. Džangjola pe, vrska valjani te počmine nekasaja soj krstimo sluga e Jehovaskoro (1. Kor. 7:39). Ama na značinela kaj sekova krstimo sluga ka ovel šukar bračno partneri tuke. Adaleske, šaj te puče tut: „Save celija isi man ko životo? Kola osobine mange važna te oven mle bračno partnere? Dali adava so očekujnava tano razumno?“

4. Bašo so molinena pe nesave džikote rodena peske bračno partneri?

⁴ Ako mangea te ženine tut, sigurno molinea tut bašo adava (Fil. 4:6). Džangjola pe, o Jehova na vetinela kaj sekole jekhe slugaske ka arakhel bračno partneri. Ama ov grižinela pe bašo tle potrebe hem čuvstvija hem šaj te pomožinel tuke džikote rodea bračno partneri. Adaleske, prodolžin te vakere leske so mangea hem sar osetinea tut (Ps. 62:8). Molin tut baši strplivost hem baši mudrost (Jak. 1:5). O Džon,d jekh phral taro SAD kova so nane ženimo, vakerela bašo so molinela pe: „Vakerava e Jehovaske save osobine mangava te oven mle romnja. Molinava man te oven man prilike te zapoznajnav nesave phenja koja so šaj te ovel mange šukar romni. Isto agjaar, molinava e Jehova te pomožinel man te razvinav osobine so ka pomožinen mange te ovav šukar rom“. I Tanja, jekh phen tari Šri Lanka, vakerela: „Džikote rodava nekas so šaj te ovel mange rom, molinava e Jehova te pomožinel mange te ačhovav leske verno, te ovav pozitivno hem radosno“. Čak ako na arakhea odma nekas so šaj te ovel tuke bračno partneri, o Jehova vetinela kaj ponadari da ka grižinel pe bašo tle fizička hem emocionalna potrebe (Ps. 55:22).

5. Ko kola prilike okola so nane ženime šaj te zapoznajnen nekas so mangela e Jehova? (1. Korinkjanja 15:58; dikh hem i slika).

⁵ I Biblija pottikninela amen te ova „zafatime ki buti e Gospodareske“. (Čitin 1. Korinkjanja 15:58.) Ako sian zafatimo ki služba bašo Jehova hem nakhavea vreme različna phralencar hem phenjencar, na samo so ka uživine ko šukar društvo, nego isto agjaar ka oven tut prilike te zapoznajne javere phralen hem phenjen kola so nane ženime hem kola so isto sar tute, tane zafatime ki služba bašo Jehova. A džikote dea tutar sa te radujne e Jehova, ka ove čače srekjno.

6. Džikote trudinena pe te arakhen bračno partneri, so na valjani te bistren okola so nane ko brako?

⁶ Sepak, pazin ki jekh buti. Džikote rodea tuke bračno partneri ma dozvolin adava te ovel tuke i najvažno buti ko životo (Fil. 1:10). I čačutni srekja na zavisinela taro adava dali sian ko brako, nego taro tlo amalipe e Jehovaja (Mat. 5:3). A džikote sian korkori, isi tut pobari sloboda hem šaj te kere poviše ki služba bašo Jehova (1. Kor. 7:32, 33). Adaleske, šukar koristin adava vreme. I Džesika jekh phen taro SAD, koja so ženingja pe keda sine la skoro 40 berš, vakerela: „Angleder te ženinav man sium sine zafatimi ki služba hem adava pomožingja mange te ovav zadovolno iako mangava sine te ženinav man“.

DIKH SAR PONAŠINELA PE

7. Soske tano mudro te odvojne tuke vreme te dikhe sar nekoj ponašinela pe angleder te vakere so osetinea? (Izreki 13:16).

⁷ So ako baši nekaste mislinea kaj šaj te ovel tuke šukar bračno partneri? Dali valjani odma te vakere lake so osetinea? I Biblija vakerela kaj jekh gogjaver manuš šukar ispitinela angleder te kerel nešto. (Čitin Izreki 13:16.) Adaleske ka ovel mudro, angleder te sikave kaj interesinea tut nekaske, tari strana te dikhe sar ponašinela pe. O Ešvin, jekh phral tari Holandija, vakerela: „O čuvstvija šaj sigate te bajron ama hem sigate te našavgjoven. Adalea so ka odvojne tuke vreme te dikhe sar nekoj ponašinela pe, nane te počmine vrska koja so temelinela pe samo ko momentalna čuvstvija“. Osven adava, džikote šukar dikhea nekas šaj ka haljove kaj adaja ličnost nane tuke.

8. Sar šaj nekoj so nane ženimo šukar te dikhel nekas te šaj te haljol dali odgovorinela leske? (Dikh hem i slika.)

⁸ Sar šaj šukar te dikhe nekas bizo te ovel primetlivo? Ko sostanokija ili džikote družinena tumen e javere phralencar hem phenjencar, šaj ka primetine i duhovnost, o osobine hem o ponašibe tari adaja ličnost. Koj tane lakere amala hem bašo so kerela lafi? (Luka 6:45). Dali isi tumen slična celija? Šaj te kere lafi e starešinencar taro lakoro sobranie ili javere zrela phralencar hem phenjencar kola so šukar pendžarena la (Izr. 20:18). Šaj te puče ko savo glaso tani hem save osobine isi la (Rut 2:11). Džikote šukar dikhea nekas, pazin te na kere te osetinel pe nezgodno. Poštujn lakere čuvstvija hem lakiri privatnost hem ma dža palo sekova lakoro čekori.

9. Angleder te vakere nekaske so osetinea kova so mislinea kaj šaj te ovel tlo bračno partneri, ko so valjani te ove sigurno?

⁹ Kobor vreme valjani te dikhe nekas angleder te vakere kaj sian zainteresirimo lake? Ako vakerea lake sigate, šaj te mislinel peske kaj anea sigate odluke bizo te razmisline (Izr. 29:20). Tari javer strana ako adžikerea but, šaj te mislinel peske kaj na sian odlučno, posebno ako halili kaj interesinea tut lake (Prop. 11:4). Ma bistre kaj angleder te vakere nekaske so osetinea, na valjani te ove sigurno kaj ka ženine tut laja. Ama valjani te ove sigurno kaj sian spremno bašo brako hem kaj adaja ličnost šaj te odgovorinel tuke sar bračno partneri.

10. So valjani te kere ako haljovea kaj nekoj tano zainteresirimo tuke, a tu na sian?

¹⁰ Ama so ako haljovea kaj nekoj tano zainteresirimo tuke? Ako tu na sian zainteresirimo lake, trudin tut adava jasno te sikave tle postapkencar. Nane ljubezno te kere o javer te mislinel kaj mangea te počmine vrska, a ustvari nane tut asavki namera (1. Kor. 10:24; Ef. 4:25).

11. Ako pomožinea nekaske te počminel vrska ili te ženinel pe, so valjani te le ko predvid?

¹¹ Ko nesave phuvja, očekujnela pe o roditelija ili nesavo javer vozrasno te birinel bračno partneri nekaske tari familija so nane ženimo. Ko javera phuvja, i familija ili o amala arakhena nekas so šaj te ovel leske bračno partneri, a palo adava dogovorinena o čhavo hem i čhaj te dikhen pe te šaj te odlučinen dali ka počminen vrska. Ako sian zamolimo te pomožine nekaske te počminel vrska ili te ženinel pe, le ko predvid o želbe hem o potrebe e soldujengere. Ako mislinea kaj nekoj šaj te ovel šukar bračno partneri tle amaleske ili nekaske tari tli familija, trudin tut šukar te zapoznajne adale phrale ili phenja, te šaj te dikhe save osobine isi e javere, hem soj najvažno, dali tani duhovno ličnost. O paše amalipe e Jehovaja tano but považno taro pare, taro obrazovanie ili tari položba ko opštestvo. Ama ma bistre, ko krajo o phral hem i phen tane adala so valjani te odlučinen dali ka len pe (Gal. 6:5).

SAR ŠAJ TE POČMINE VRSKA?

12. Ako mangea te počmine vrska nekasaja, sar šaj te vakere lake adava?

¹² Ako mangea te počmine vrska nekasaja, sar šaj te vakere lake adava?e Šaj te dogovorine tut laja te keren lafi ili ko nesavo javno than ili preku telefoni. Jasno vaker kola tane tle namere (1. Kor. 14:9). Ako valjani mukh lake vreme te šaj te razmislinel so te odgovorinel (Izr. 15:28). Ako adaja ličnost nane zainteresirimi baši vrska, tegani poštujn lakere čuvstvija.

13. So šaj te kere ako nekoj vakerela tuke kaj mangela te počminel tuja vrska? (Kološanja 4:6).

¹³ So ako nekoj vakerela tuke kaj interesinela pe tuke? Verojatno valjangja leske hrabrost, adaleske ov ljubezno hem sikav poštovanje. (Čitin Kološanja 4:6.) Ako valjani tuke vreme te šaj te razmisline dali ka prifatine te ove ki vrska, vaker adava. Ama trudin tut te odgovorine so posigate (Izr. 13:12). Ako nane tut namera te ove ki vrska, vaker adava ljubezno hem jasno. Dikh sar o Hans, jekh phral tari Avstrija odgovoringja jekhe phenjake keda vakergja leske kaj mangela te zapoznajnel le pošukar: „Vakergjum lake mli odluka taktično ama jasno. Kergjum adava odma soske na mangljum te nadinel pe. Tari isto pričina, palo adava razgovor pazinava sine sar ponašinava man laja“. Tari javer strana, ako mangea te počmine vrska, vaker adava hem keren lafi sar očekujnena te ovel tumari vrska. Ako sien tari različno kultura, ili razlikujnena tumen ko nešto javer, šaj adava so tu očekujnea razlikujnela pe taro adava so o javer očekujnela.

SAR ŠAJ O JAVERA TE POMOŽINEN OKOLENGE SO NANE KO BRAKO?

14. Sar šaj amare lafencar te pomožina okolenge so nane ko brako?

¹⁴ Sar šaj te ohrabrina hem te pomožina okolen so mangena te ženinen pe? Jekh način tano agjaar so ka pazina so keraja lafi (Ef. 4:29). Šaj te puča amen: „Dali lava ki hajgara okolen so mangena te ženinen pe? Keda dikhava sar jekh phral hem jekh phen soj bekjarija kerena lafi, dali mislinava mange kaj isi nešto maškar lende?“ (1. Tim. 5:13). Osven adava, nikogaš na valjani te kera okola so nane ko brako te osetinen pe kaj tane žalibaske ili kaj pohari vredinena taro javera. O Hans kole so spomningjem le angleder vakerela: „Nesave phralja hem phenja vakerena mange: ’Soske na ženinea tut? Phuriljan više‘. Asavke lafija šaj te keren okola so nane ko brako te osetinen pe kaj nane cenime hem ako isi len pritisok te ženinen pe, šaj panda poviše te bajraren adava pritisok“. But pošukar tano te roda prilike te pofalina okolen so nane ko brako! (1. Sol. 5:11).

15. a) Sprema o načelo taro Rimjanja 15:2, bašo so valjani te razmislina angleder te pomožina nekaske te arakhel peske bračno partneri? (Dikh hem i slika.) b) Kola važna pouke sikliljan taro videoklipi?

¹⁵ So ako mislinaja amenge kaj nesavo phral hem nesavi phen šaj te oven šukar pari? I Biblija vakerela amenge kaj valjani te razmislina bašo čuvstvija e javerengere. (Čitin Rimjanja 15:2.) But phralja hem phenja so nane ženime na mangena o javera te zapoznajnen len nekasaja so šaj te ovel lenge bračno partneri hem amen valjani te poštujna adava (2. Sol. 3:11). Javera šaj mangena pomoš, ama na valjani te mešina amen ako ola na rodingje amendar adava.f (Izr. 3:27). Nesave šaj mangena te zapoznajnen nekas, ama na ko doborom direktno način. I Lidija, jekh bekjarka tari Germanija, vakerela: „Šaj te kanine e phrale hem e phenja te družinen tumen ki jekh pobari grupa. Ker prilika te šaj o phral hem i phen te dikhen pe, a o javer mukh lenge ko vasta“.

16. So na valjani te bistren okola so nane ko brako?

¹⁶ Sarine amen bizi razlika dali siem ženime ili na, šaj te ovel amen srekjno životo! (Ps. 128:1). Adaleske, ako mangea te ženine tut ama panda na arakhljan nekas, ačhov zafatimo ki tli služba bašo Jehova. Jekh phen taro Makao so vikinela pe Sin Ji, vakerela: „Ako sporedinea o vreme so ka nakhave le tle bračno partnerea ko raj, o vreme so ka nakhave le akana korkori tano kratko. Uživin ko adava vreme hem šukar koristin le“. Ama so ako arakhljan nekas so šaj te ovel tlo bračno partneri hem počmingjen vrska? Ki sledno statija ka dikha sar šaj te ovel tut uspešno vrska ki kolate so ka ane mudro odluka.