Pučiba taro čitatelija

Keda ka završinel o propovedibe?

O Isus vakergja: „Akava šukar haberi bašo Carstvo ka propovedinel pe ko celo sveto, te šaj o manuša taro sa o narodija te šunen le, hem tegani ka avel o krajo“ (Mat. 24:14). Ko akava stiho hem ko stihija 6 hem 13, o grčko lafi soj prevedimo sar „krajo“ tano telos. Akale lafea mislinela pe ko krajo e Satanaskere svetoske ko Armagedon (Otk. 16:14, 16). Adava značinela kaj ponadari da ka propovedina o šukar haberi bašo e Devleskoro Carstvo dži kratko angleder o Armagedon. Akaja tani promena ko amaro haljojbe so sine amen dži akana.

Angleder mislinaja sine kaj ka čhinava te propovedina o šukar haberi keda ka počminel i bari nevolja, keda ka ovel uništimo o Baro Vavilon (Otk. 17:3, 5, 15, 16). Verujnaja sine kaj akava nastan ka značinel krajo bašo simbolično „berš baši e Jehovaskiri milost“ (Isa. 61:2). Isto agjaar, mislinaja sine kaj i bari nevolja ka preživinen okola so dokažingje kaj tane verna e Jehovaske angleder oj te počminel. Len sporedinaja len sine e Evreencar kola so preživingje o uništibe e Erusalimeskoro ko 607 berš a.a.e. Ola angleder sine beležime te preživinen soske služingje e Jehovaske hem mrzinena sine o lošnipe (Ezek. 5:11; 9:4). Ama adaja sporedba nane sprema e Isuseskere lafija soj pišime ko Matej 24:14, kolendar so dikhela pe kaj e manušen šaj ka ovel len prilika te prifatinen o šukar haberi dži kratko angleder o Armagedon.

Adaleske so pojasno haljovaja o Matej 24:14, valjani te menina hem amaro haljojbe bašo Otkrovenie 16:21. Ko adava stiho kerela pe lafi bašo bare zrnija kukudi kola so pretstavinena o haberi so ka vakerel e Devleskoro narodo ki bari nevolja. Adava so poviše istražingja pe otkringja kaj akala duj stihija tane povrzime. Ki savi smisla? O solduj stihija tane povrzime adalea sar o manuša reagirinena ko haberi bašo Carstvo. O apostol Pavle pišingja kaj okolenge „so ka oven spasime“, adava haberi ka ovel šukar haberi — „miris e životoskoro“. Ama e Devleskere dušmanenge, adava haberi tano lošno haberi — „miris e meribaskoro“ (2. Kor. 2:15, 16). Ola mrzinena o haberi bašo Carstvo adaleske so ov otkrinela kaj o sveto kole so ola mangena tano lošno, kaj lea vladinela o Satana hem kaj panda hari ka ovel uništimo (Jovan 7:7; 1. Jov. 2:17; 5:19).

Isto agjaar, primetin kaj o simbolična zrnija kukudi ka oven but bare. Akava šaj značinela kaj džikote trajnela i bari nevolja, o propovedibe panda poviše ka lel e manušengoro vnimanie. Akava ka kerel poviše manuša te šunen bašo e Jehovaskoro anav sar nikogaš angleder (Ezek. 39:7). Ko adava vreme, otkeda o Baro Vavilon ka ovel uništimo, dali nesave manuša ka oven privlečime ko adava haberi sar so bi privlečinela len sine jekh šužo miris? Isi bari verojatnost kaj ka ovel agjaar. Šaj ola ka setinen pe ili ka doznajnen kaj e Jehovaskere svedokija više beršencar vakerena sine kaj ka avel krajo e hovavne religijake.

Akava tano slično adalea so slučingja pe ko purano Egipet palo deš nevolje. Otkeda o Jehova angja „sudo sa e egipetska devlenge“, e Izraelconcar gele but manuša taro javera narodija (2. Moj. 12:12, 37, 38). Adala manuša šaj počmingje te verujnen ko Jehova keda dikhle kaj e Mojseeskere predupreduvanja bašo deš nevolje ispolningje pe.

Sarine so ka sikaven vera ko Jehova otkeda ka ovel uništimo o Baro Vavilon ka ovel len prilika te poddržinen e Hristoseskere phralen kola so panda ka oven ki phuv (Mat. 25:34-36, 40). Džangjola pe, i prilika te oven vikime „bakhre“ ka završinel kratko angleder o Armagedon, keda o pomazanikija so ka oven panda ki phuv ka dobinen pumari nebesno nagrada.

Akava pojasno haljojbe istakninela kobor baro mangipe hem milost isi e Jehova. Džanaja kaj „na mangela nikoj te ovel uništimo nego sarinen te ovel len prilika te kainen pe“ (2. Pet. 3:9).