Dali džanljan?

Sar o manuša ko purano vreme tharena sine jag keda patujnena sine?

JEKH dive, o Devel vakergja e Avraameske te džal ko jekh dur than hem adari te del žrtva. Ki 1. Mojseeva 22:6 pišinela: „O Avraam lelja o kašta baši žrtva so valjani te tharel pe hem dengja ple čhaveske e Isakoske te phiravel len. Hem lelja peja jag hem čhurik, hem solduj džene gele zaedno“.

I Biblija na vakerela amenge sar o manuša ko purano vreme tharena sine jag. Dali o Avraam hem o Isak thargje jag hem ingargje la pea celo vreme? Jekh biblisko izučuvači vakergja kaj i jag verojatno našti sine „te thabljol celo vreme džikote phirgje adava baro drumo“. Namesto adava, o Avraam hem leskoro čhavo šaj lele sa so valjani lenge te šaj te tharen jag.

Ama, javera mislinena kaj ko adava vreme na sine lokho te tharel pe jag. Adaleske, sekogaš keda šaj sine, o manuša tharena sine jag agjaar so lena sine žarija tari jag koja so thabljola sine, šaj taro komšie. But izučuvačija mislinena kaj o Avraam lelja žarija angleder te cidel ko drumo. Šaj čhivgja o žarija ko nesavo čaro kova so visinela sine ko sindžirija, hem ingarela le sine peja džikote patujnela sine (Isa. 30:14). Tegani, šaj sine te čhivel šuke kašta ko žarija hem agjaar te tharel jag.