1. Korinćanima
15 Podsetinava tumen, phraljalen, ki šukar vest koja vaćerđum tumenđe, koja prihvatinđen hem ki koja ićerena tumen. 2 Ka oven spasime ako zorale ićerena tumen ki šukar vest koja šunđen mandar. Inače džabe uljen vernikija. 3 A vaćerđum tumenđe o najvažna pouke, kola hem kokri priminđum, odova so o Hrist mulo aso amare grehija, sar so pisini ko Lil, 4 so hine parumo hem so uskrsninđa ko trito dive, sar so pisini ko Lil, 6 Palo odova, pojavinđa pe anglo pobuter ando 500 phralja ko isto vreme. But olendar tane pana đivde, a disave mulje. 7 Palo odova pojavinđa pe e Jakovese, hem kasnije sa e apostolenđe. 8 A ko krajo pojavinđa pe hem maje, sebepi odova hijum sar o ćhavoro kova angleder o vreme bijandilo. 9 Sose me hijum najtikno maškaro apostolija hem na hijum dostojno te ovav vićimo apostol, sose progoninđum e Devlesi skupština. 10 Ama, sebepi e Devleso bizaslužimo šukaripe, me hijum apostol. O bizaslužimo šukaripe kova mothovđa maje na hine uzaludno, sose trudinđum man pobuter olendar. Ipak, odova nane sebepi moklo, nego sebepi e Devleso bizaslužimo šukaripe kova dobinđum. 12 A ako propovedini pe so o Hrist uskrsninđa ando mule, sar tegani disave tumendar phenena so nane uskrsenje ando mule? 18 Tegani tane zauvek našalde hem okola kola mulje ko Hrist. 20 Ama odova soj tano ćaće tano so o Hrist uskrsninđa ando mule, ov prvo uskrsninđa ando okola kola mulje. 21 Sose o meribe alo prekalo manuš, hem o uskrsenje ando mule avela prekalo manuš. 22 Sar so sare merena sebepi o Adam, ađahar sebepi o Hrist sare ka uskrsninen. 23 Ama svako premalo redo: prvo o Hrist, a palo odova, đi trajini olesi prisutnost hem okola kola tane e Hristese. 24 Ko krajo, ked ka uništini svako vladavina hem svako vlast hem sila, ov ka del o Kraljevstvo pe Devlese hem pe Dadese. 25 Sose ov valjani te vladini sar kralj sa đi o Devel na ćhivela talo olese pre olese dušmanen. 26 A o poslednjo dušmani, kova ka ovel uništimo tano o meribe. 27 Sose o Devel „sa ćhivđa talo olese pre“. A ked phenela soj tano sa ćhivdo, jasno tano so odova na odnosini pe upro okova kova sa ćhivđa talo olese pre. 28 A palo odova so sa ka ovel lese ćhivdo talo pre, tegani hem o Ćhavo ka podložini pe okolese kova dinđa le autoritet upro sa, te šaj o Devel te ovel sa sarinenđe. 29 Ako nane ađahar, savi nada isi len okola kola krstinena pe te oven mule? Ako o mule na uskrsninena, sose tegani on krstinena pe te oven mule? 31 Ćaćipe vaćerava anglo tumende, phraljalen, tumenđe kola anena maje radost ko Hrist Isus, amaro Gospod – svako dive suočinava man e meribaja. 32 Ako, sar hem avera manuša borinđum man e zverijencar ko Efes, savi korist isi man odolestar? Ako o mule na uskrsninena „hajde te ha hem te pija sose tajsa ka mera“. 33 Ma hovaven kokri tumen! O lošno društvo rumini o šukar navike. 34 Oven razumna, ćeren odova soj tano ispravno hem ma grešinen, sose disave na penđarena e Devle. Odova vaćerava tumenđe te bi lađana. 35 Ama neko ka phenel: „Sar o mule ka uskrsninen? Hem savo telo ka ovel len?“ 37 Hem ked sejineja, na sejineja i biljka koja već barilji, nego sejineja o seme, bilo odova te ovel o seme ando điv ja diso aver. 38 A o Devel dela ov te barjol sar ov mangela hem svako seme tano averćhane ked barilo. 40 Hem o duhovna bića isi len telo hem o bića ki phuv isi len telo, ama o šužipe ando duhovna bića tano averćhane ando šužipe kotar bića ki phuv. 41 O šužipe ando kham tano averćhane kotar o šužipe ando mesec hem isto ađahar o šužipe ando ćerenja tano averćhane. O šužipe andi svako ćereni tano averćhane. 42 Ađahar tano hem okolencar so uskrsninena kotar mule. Sejini pe o telo kova ćirnjola, a o telo kova našti te ćirnjol, uskrsnini. 43 Sejini pe ki lađ, a uskrsnini pe ki slava. Sejini pe ki slabost, a uskrsnini pe ki sila. 44 Sejini pe e manušengo telo, a uskrsnini o duhovno telo. Ako postojini e manušengo telo, postojini hem duhovno. 45 Ađahar tano hem pisimo: „O prvo manuš, o Adam, ulo đivdo manuš.“ O poslednjo Adam ulo duh kova dela đivdipe. 49 Hem sar so hijam slična okolese kova tano ćerdo ando praho, ađahar ka ova slična okolese kova alo ando nebo. 50 Ama phenava tumenđe, phraljalen, so o telo hem o rat našti te nasledinen e Devleso Kraljevstvo, niti okova so ćirnjola nasledini okova so našti te ćirnjol. 51 Aće, vaćerava tumenđe i sveto tajna: na ka ova sare dugo mule, ama sare ka ova menjime, 52 ko jekh trenutko, posigate nego so i jakh treptini, ko zvuko andi poslednjo truba. Sose i truba ka šunđol hem o mule ka ušten e teloja kova našti te ćirnjol, hem amen ka ova menjime. 55 Meribe, tu na hijan pobednik, sose više našti te ćere dukh e manušenđe. 57 Ama hvala e Devlese sose dela amen i pobeda prekalo amaro Gospod o Isus Hrist! 58 Odolese, me mangle phraljalen, oven zorale hem istrajna, uvek ćeren buti e Jehovase, sose đanaja so i buti koja ćeraja e Jehovase na ka aćhol bizi nagrada.