Psalam

37 Ma ov uznemirimo sebepi okola so ćerena lošnipe, ma ov ljubomorno upro okola so ćerena i nepravda. 2 On sigate ka šućon sar i ćar, ka šućon sar i terni, zeleno ćar. 3 Uzdajin tut upro Jehova hem ćer odova soj tano šukar, živin mirno ki ti phuv hem ov verno ko sa. 4 Nek o Jehova ovela ti najbari radost. Tegani ka del tut odova so to vilo mangela. 5 Mukh e Jehova te vodini tut, oslonin tut upro leste hem ov ka pomožini tut. 6 Ov ka del ti pravednost te sjajini sar ked phravđola o dive hem ti pravda sar o kham ked najzorale sijaini. 7 Ćutin anglo Jehova hem ađićer le. Ma ov uznemirimo sebepi o manuš kova uspini te ćerel lošnipe. 8 Cide tutar o gnev hem mukh i holi, ma ov uznemirimo hem ma ćer lošnipe. 9 Sose o lošna ka oven uništime, a okola kola uzdajinena pe ko Jehova ka nasledinen i phuv. 10 Pana hari hem o lošna više na ka oven. Ka dikhe uduri kuri hine, a on na ka oven odothe. 11 Ama o krotka ka nasledinen i phuv hem ka uživinen ko baro mir. 23 O Jehova usmerini e manušese korakija ako tano oleso drumo pali olesi volja. 24 Ako hem spotaknini pe, na ka perel, sose o Jehova ićeri le kotar vas. 25 Hijum le terno hem phuriljum, ama niked na dikhljum o pravedniko te ovel aćhavdo, ni olese ćhave te mangen marese. 28 Sose o Jehova mangela i pravda hem na ka mukhel pe verno slugen. Ov zauvek ka arakhi len, ama o potomstvo ando lošna ka ovel uništimo. 29 O pravednikija ka nasledinen i phuv, hem zauvek ka živinen upro late. 34 Uzdajin tut ko Jehova hem ićer tut ando oleso drumo. Ov ka vazdel tut hem tu ka nasledine i phuv. Ked o lošna ka oven uništime, tu ka dikhe odova. 39 Okolenđe soj tane pravedna o spasenje avela kotar Jehova, ko vreme andi nevolja ov tano than kuri šaj te garaven pe.