Jevrejima
10 Ko Zakon arakhi pe samo senka ando blagoslovija kola valjani te aven, a na hem o blagoslovija. Odolese, ov našti isto žrtvencar kola dela svako berš te ćerel savršena e manušen kola mangena te oven paše e Devleja. 2 Inače bi ćhinavi pe te den pe o žrtve, sose bi okola so dena len ovena jekh puti zauvek čistime hem na bi više ovena svesna kobor tane grešna. 3 Ama, odola žrtve ando berš ko berš setinena len ko grehija, 4 sose o rat ando juncija hem ando jarcija našti te cidel o grehija. 5 Odolese o Hrist, ked alo ko sveto, phenđa e Devlese: „’Žrtve hem prinosija na mangljan, nego pripreminđan maje telo. 6 Na hine tuće ugodna o žrtve paljenice hem o žrtve aso greh.‘ 7 Tegani phenđum: ’Aće, aljum (mandar pisini ko svitko) te ćerav odova soj tano pali ti volja, Devla.‘ “ 10 Premali odija volja, posvetime hijam sose o Isus dinđa po telo jekh puti hem zauvek. 12 A o Hrist aso sa o vremenija dinđa jekh žrtva aso grehija hem bešlja ki Devlesi desno strana 20 neve hem đivde drumoja kova ov sebepi amaro phravđa prekali zavesa, odnosno poklo telo. 21 Hem sebepi so isi amen e prvosvešteniko kova tano ćhivdo upro Devleso ćher, 22 te ava anglo Devel iskreno vileja hem zorale veraja, sose amare vile tane očistime andi nečisto savest, a amare telija tane thovde čisto panjeja. 23 Istrajno hem nepokolebljivo te objavina sarinenđe amari nada, sose verno tano okova kova dinđa o obećanje. 24 Hem te razmislina jekh jekhestar, te šaj te podstaknina amen ko mangipe hem ko šukar delija, 25 hem te na aćhava amare sastankija sar so disave isi len običaj, nego te ohrabrina jekh jekhe, sa pobuter so dikhaja soj tano o dive popaše. 31 Strašno tano te pere ko vasta e đivde Devlese. 33 Disavo puti anglo sarinende marđe tumenđe muj hem hine tumen nevolje, a disavo puti hijen le uzo okola kola odova doživinđe. 35 Odolese, ponodri oven hrabra, sose odova ka anel tumenđe bari nagrada. 36 Sose valjani tumenđe istrajnost, te šaj, palo odova so ćerena okova soj tano premali Devlesi volja, te dobinen odova soj tano obećimo. 37 Sose „pana hari“ hem ka „resel okova so avela hem na ka harini“. 38 „A mo pravedno sluga ka živini sebepi i vera“, ama „ako andi dar cidela pe, na ka ovel pali mi volja“. 39 Amen na hijam ando okola kola andi dar cidena pe ando Devel hem đana ko uništenje, nego ando okola kola verujinena hem spasinena po životi.