Sar šaj te ovel amen bahtali porodica?

1. Sose o rom hem i romni valjani te oven venčime te šaj te ovel len bahtali porodica?

O šukar vestija avena ando Jehova, ando bahtalo Devel, kova mangela o porodice te oven bahtale (1. Timoteju 1:11). Ov osnujinđa o brak. Te šaj i porodica te ovel bahtali, o rom hem i romni valjani te venčinen pe. Ked o rom hem i romni tane venčime, tegani hem on hem o ćhave osetinena pe sigurno. O manuša kola mangena te šunen e Devle, valjani te venčinen pe premalo zakon kova tano ki olengi phuv. Čitin Luka 2:1, 4, 5.

Sar o Devel dikhela ko brak? Ov mangela o brak te trajini zauvek. O Jehova mangela o rom hem i romni te oven verna jekh jekhese (Jevrejima 13:4). Ov mrzini o razvod (Malahija 2:16). Ama, ov dozvolini o hrišćanija te razvedinen pe hem palem te ženinen pe, jedino ako jekh olendar ćerđa preljuba. Čitin Matej 19:3-6, 9.

2. Sar valjani o rom hem i romni te ponašinen pe jekh jekheja?

O Jehova stvorinđa e murše hem e đuvlja te pomožinen jekh jekhese (Postanak 2:18). O rom sar poglavari, isi le odgovornost te brinini pe ando materijalna potrebe kotar pi porodica hem te sikavi la ando Devel. Ov valjani nesebično te mothovi pe romnjaće kobor mangela la. O rom hem i romni valjani te mangen hem te poštujinen jekh jekhe. Sebepi so solduj tane nesavršena, but tano važno o rom hem i romni te sikljon te oprostinen jekh jekhese, te šaj te ovel len bahtalo brak. Čitin Efešanima 4:31, 32; 5:22-25, 33 hem 1. Petrova 3:7.

3. Da li valjani te mukhe te rome ja te romnja ako to brak nane bahtalo?

Ako isi tumen problemija ko tumaro brak, o solduj valjani te den sa tumendar te mothoven mangipe jekh jekhese (1. Korinćanima 13:4, 5). E Devleso Lafi na preporučini o razdvajanje sar način te rešinen pe o problemija kola tane normalna ko brak. Čitin 1. Korinćanima 7:10-13.

4. So o Devel mangela e ćhavenđe?

O Jehova mangela o ćhave te oven bahtale. Ov mangela o terne te uživinen ko po ternipe hem odolese dela len najšukar savetija. O Jehova mangela o ćhave te šunen pe daja hem pe dade, sose olenge savetija hem olengo iskustvo šaj but te koristini olenđe (Kološanima 3:20). O Jehova, amaro Stvoritelj, mangela te osetinen kobor bahtalipa anela i poslušnost olese hem olese Ćhavese. Čitin Propovednik 11:9–12:1 hem Matej 19:13-15; 21:15, 16.

5. So šaj o roditeljija te ćeren te šaj olenge ćhave te oven bahtale?

Tumen sar roditeljija valjani te den sa tumendar te obezbedinen tumare ćhavenđe so te han, kaj te bešen hem so te uraven (1. Timoteju 5:8). Isto ađahar, te šaj tumare ćhave te oven bahtale, tumen valjani te sikaven len te mangen e Devle hem te oponašinen le (Efešanima 6:4). Ked ka dikhen tumaro primer hem kobor tumen mangena e Devle, odova sigurno but ka utičini ko olengo vilo. O pouke ando e Devleso Lafi šaj te pomožinen tumare ćhavenđe te razmislinen ko ispravno način. Čitin Ponovljeni zakoni 6:4-7 hem Poslovice 22:6.

E ćhavenđe tano potrebno o roditeljija te ohrabrinen len hem te pohvalinen len. Ama, o roditeljija valjani te ispravinen hem te disciplinujinen pe ćhaven. Ađahar, ka zaštitinen pe ćhaven ando lošna postupkija sebepi kola šaj te patinen. (Poslovice 22:15). Ama, đi disciplinujinena len, on niked na valjani te oven gruba ja okrutna premalo ćhave. Čitin Kološanima 3:21.

E Jehovase svedokija ikalđe nekobor knjige kola tane posebno ćerde te pomožinen e roditeljenđe hem e ćhavenđe. Odova soj tano pisimo ko odola knjige avela ando e Devleso Lafi. Čitin Psalam 19:7, 11.