O Adam hem i Eva na šunđe e Devle

Jekh dive, ked i Eva hine kokri, jekh sap počminđa te vaćeri olaja. Ov phenđa laće: „Ćaće li o Devel na mukhela tumen te han ando sa o kašta?“ I Eva odgovorinđa lese: „Amen šaj te ha ando sa o kašta, samo ando jekh kaš na isminaja. Ako haja olestar, ka mera.“ O sap phenđa laće: „Tumen na ka meren. Ako ka han ando odova kaš, ka oven sar o Devel.“ Da li ćaće hine ađahar? Na, odova hine hovajbe. Ama, i Eva verujinđa ko odova hovajbe. So pobuter dikhlja o plod, pana pobuter manglja te probini le. Oj halja o plod hem dinđa e Adamese te hal. Iako o Adam đanđa so ka meren ako na šunena e Devle, ov halja o plod.

Pokasno odova dive, o Jehova vaćerđa e Adameja hem e Evaja hem pućlja len sose na šunđe le. O Adam phenđa soj tani i Eva krivo, a i Eva phenđa soj tano o sap krivo. Odolese so o Adam hem i Eva na šunđe e Jehova, ov paldinđa len ando vrt. Ko ulaz ando vrt ćhivđa e anđelen hem mač andi jag, te na bi irinena pe odothe.

O Jehova phenđa so ka ovel kaznimo hem okova kova hovavđa e Eva. Da li odova hine o sap? Ked o Jehova ćerđa e sapen, na ćerđa len te šaj te vaćeren. Odova hine jekh lošno anđeo so ćerđa te izgledini samći o sap vaćeri hem ađahar hovavđa e Eva. Odova anđeo vićini pe Satana, o Beng. Pana hari, o Jehova ka uništini e Satana hem ov više na ka ćhivel e manušen te ćeren lošna buća.