O Devel ćerđa e prvo manuše hem e prvo romnja

O Jehova ćerđa jekh vrt ko than kova vićinđa pe Eden. Odova vrt hine pherdo razno luluđencar, kaštencar hem životinjencar. Palo odova, o Devel andi phuv ćerđa e prvo manuše, e Adame, hem phudinđa lese ko nak. Đaneja li so ulo tegani? O Adam ulo đivdo manuš! O Jehova dinđa le zadatko te brinini pe ando vrt hem te ćhivel anava sa e životinjenđe.

O Jehova phenđa e Adamese diso but važno: „Šaj te ha ando sa o kašta ko vrt, ama kotar jekh kaš na ismineja te ha. Ako ka ha olestar, ka mere.“

Palo disavo vreme, o Jehova phenđa: „Ka ćerav pomoćnica e Adamese.“ Tegani ov ćerđa o Adam hor te sovel, lelja lestar jekh rebro hem ćerđa lese romnja. Oj vićinđa pe Eva. Ađahar, o Adam hem i Eva ulje i prvo porodica. Da li e Adamese sviđinđa pe i Eva? Ov hine odobor bahtalo so phenđa: „Dikh so ćerđa o Jehova ando mo rebro! Konačno neko koj tano slično sar mande.“

O Jehova phenđa e Adamese hem e Evaće te ovel len ćhave hem te pheren i phuv e manušencar. Ov manglja te oven bahtale đi zajedno ćerena celo phuv te ovel raj, sar so hine o edensko vrt. Ama, na hine ađahar. So ulo? Odolestar ka sikljova ki aver priča.