E Valamesi herni vaćeri

O Izraelcija hine skoro 40 berš ki pustinja. On osvojinđe but dizja. Akana, ked hine ko Moav istočno andi reka Jordan, alo o vreme te khuven ki Obećimi phuv. O Valak, o kralj ando Moav, darandilo so o Izraelcija ka len olesi phuv. Odolese vićinđa jekhe manuše kova vićinđa pe Valam te avel ko Moav hem te del arman e Izraelcen.

Ama, o Jehova phenđa e Valamese: „Na ismineja te de arman e Izraelcen.“ Odolese o Valam na manglja te đal. O kralj, o Valak, palem vićinđa le, ama akava puti obećinđa so ka del le sa so mangela. Ama, o Valam palem odbinđa te đal. Tegani, o Devel phenđa lese: „Šaj te đa, ama ka vaćere samo odova so me ka phenav tuće.“

O Valam uklinđa ki herni hem pođinđa ko Moav. Ov manglja te del arman e Izraelcen, iako o Jehova phenđa lese te na ćerel odova. E Jehovaso anđeo pojavinđa pe ko drumo trin putija. O Valam naštine te dikhel le, ama i herni dikhlja le. O prvo puti, i herni manglja te našel hem đelji ki jekh njiva. Palo odova, đelji uzo zido hem steginđa e Valameso pro. Ko krajo, i herni pašljilji maškaro drumo. Svako puti ked i herni na manglja te đal, o Valam marđa la kašteja.

Palo trito puti, o Jehova ćerđa i herni te vaćeri. Oj pućlja e Valame: „Sose odobor mareja man?“ O Valam odgovorinđa laće: „Ćereja man dilino! Te ovel man mač đi akana hine ka mudarav tut.“ Tegani i herni phenđa: „But berša služinava tuće. Da li nekad ćerđum tuće diso ađahar?“

Tegani, o Jehova ćerđa hem o Valam te dikhel e anđele kova phenđa: „O Jehova phenđa tuće te na de arman e Izraelcen.“ A o Valam phenđa: „Grešinđum. Ka irinav man ćhere.“ Ama, o anđeo phenđa lese: „Šaj te đa ko Moav, ama vaćer samo odova so ka phenel tuće o Jehova.“

Da li o Valam sikljilo diso ando odova so ulo lese? Na. Palo odova, o Valam trin putija manglja te del arman e Izraelcen. Ama, o Jehova, o sotrin putija ćerđa olese lafija te oven blagoslov. Ko krajo, o Izraelcija napadinđe o Moav hem o Valam hine mudardo. Ked bi o Valam kotar početko šunela e Jehova, ov na bi merela.