Disave buninđe pe protiv o Jehova

Palo disavo vreme, đi o Izraelcija hine ki pustinja, o Korej, o Datan, o Aviron hem avera 250 manuša buninđe pe protiv o Mojsije. On phenđe lese: „Dosta više! Sose mora baš tu te ove amaro vođa, a o Aron prvosvešteniko? O Jehova tano hem amencar, a na samo tuvaja hem e Aroneja.“ E Jehovase odova na sviđinđa pe. Ov ko odova dikhlja sar ka phene buninena pe protiv oleste.

O Mojsije phenđa e Korejese hem e manušenđe so hine oleja: „Aven tajsa ko šatori hem anen tumare kadionice so isi len kad. O Jehova ka mothovi kas birinđa.“

Tajsato dive, o Korej hem o 250 manuša đelje ko sveto šatori kaj hine hem o Mojsije. Odothe tharđe o kad sar so ćerđe o sveštenikija. O Jehova phenđa e Mojsijese hem e Aronese: „Ciden tumen ando Korej hem ando olese manuša.“

O Korej đelo ko sveto šatori, ama o Datan, o Aviron hem olenge porodice na manglje te đan. O Jehova vaćerđa e Izraelcenđe te ciden pe ando e Korejese, e Datanese hem e Avironese šatorija. O Izraelcija odmah cidinđe pe. O Datan, o Aviron hem olenge porodice terdilje anglo pe šatorija. Ando jekh puti i phuv phravdilji hem on pelje andre! Ko ulaz ando sveto šator, alji i jag ando Jehova hem tharđa e Koreje hem olese 250 manušen.

O Jehova vaćerđa e Mojsijese: „Le po jekh kaš ando poglavari ando svako pleme. Ko svako kaš pisin e poglavareso anav, ama ko kaš ando Levijeso pleme pisin e Aroneso anav. Palo odova, ćhiv o kašta ko sveto šatori. Kas ka birinav, ko oleso kaš ka barjon luluđa.“

Aver dive, o Mojsije ikalđa sa o kašta hem mothovđa len e poglavarenđe. Ko e Aroneso kaš barilje luluđa hem zrela bademija. Ko akava način, o Jehova mothovđa so birinđa e Arone te ovel prvosvešteniko.