O dešuduj uhodija

O Izraelcija đelje andi planina Sinaj hem prekali pustinja Faran sa đi na reslje ko jekh than kova vićinđa pe Kadis. Odothe o Jehova phenđa e Mojsijese: „Bićhal 12 manušen, po jekh ando svako pleme, te dikhen savi tani i phuv Hanan, sose ka dav la e Izraelcenđe.“ Odola manuša hine penđarde sar „uhodija“. O Mojsije birinđa 12 manuša hem phenđa lenđe: „Đan ko Hanan hem dikhen da li tani odija phuv plodno. Dikhen da li tane o manuša zorale ja slaba hem da li živinena ko šatorija ja ko dizja.“ Tegani o 12 manuša, maškaro kola hine o Isus Navin hem o Halev, đelje ko Hanan.

Palo 40 dive o uhodija irinđe pe hem anđe smokve, nar hem drakha. On vaćerđe: „I phuv tani but šukar, ama o manuša tane zorale hem živinena ko dizja kola isi len uće zidija.“ Ama, o Halev phenđa: „Šaj te pobedina len. Ma te ađićera, hajde te đa odmah!“ Da li đaneja sose o Halev phenđa akava? Odolese so ov hem o Isus Navin hine len poverenje ko Jehova. Ama, avera deš uhodija phenđe: „Na! O manuša uduri tane bare sar divija! Amen hijam lenđe sar skakavcija.“

Akava but obeshrabrinđa e Izraelcen. On počminđe te žalinen pe hem jekh jekhese te phenen: „Hajde te birina amenđe aver vođa hem te irina amen ko Egipat. Sose te đa ko odova than hem te mera uduri?“ O Isus Navin hem o Halev phenđe: „Šunen e Jehova hem ma daran. Ov ka zaštitini amen.“ Ama, o Izraelcija na manglje te šunen len. On čak manglje te mudaren e Isuse Navine hem e Haleve!

So ćerđa o Jehova? Ov phenđa e Mojsijese: „Palo sa odova so ćerđum e Izraelcenđe, on palem na šunena man. Odolese ka aćhon ki pustinja 40 berš hem uduri ka meren. Samo olenge ćhave, o Isus Navin hem o Halev ka živinen ki phuv so obećinđum so ka dav lenđe.“