O Jehova birinđa e Isuse Navine

O Mojsije beršencar vodinđa e Izraelcen, ama akana phurilo hem alo ko krajo ando po životi. O Jehova phenđa lese: „Tu na ka khuve e Izraelcencar ki Obećimi phuv. Ama, ka mukhav tut te dikhe la.“ Palo odova, o Mojsije rodinđa ando Jehova te birini jekhe neve manuše kova ka vodini e narodo. O Jehova phenđa lese: „Đa ko Isus Navin hem phen lese so ov ka vodini e narodo.“

O Mojsije phenđa e narodose so pana hari ka merel hem so o Jehova birinđa e Isuse Navine te vodini len ki Obećimi phuv. Palo odova, o Mojsije phenđa e Isuse Navinese: „Ma dara. O Jehova ka pomožini tut.“ Palo disavo vreme, o Mojsije ukljinđa ki planina Navav hem odothar o Jehova mothovđa lese i phuv koja obećinđa e Avrahamese, e Isakese hem e Jakovese. O Mojsije hine le 120 berš ked mulo.

O Jehova phenđa e Isuse Navinese: „Nakh i reka Jordan hem khuv ki phuv Hanan. Me ka pomožinav tut, isto sar so pomožinđum e Mojsijese. Svako dive čitin mo Zakon. Ma dara hem ov hrabro. Đa hem ćer odova so zapovedinđum tuće.“

O Isus Navin bićhalđa duj uhodija ki diz Jerihon. Ki aver lekcija ka dikha so ulo uduri. Ked irinđe pe o uhodija, on vaćerđe so o narodo šaj te đal te osvojini i phuv Hanan. Tajsato dive, o Isus Navin phenđa e Izraelcenđe te ćeden pe šatorija hem te pođinen. Tegani on mukhlje prvo e sveštenikonen so igarđe o kovčeg ando savez te đan ki reka Jordan. Ko odova vreme ando berš, o pani ki reka Jordan but uštela. Ama, samo so o sveštenikija ćhivđe po pro ko pani, o pani šućilo! Tegani o sveštenikija terdilje ki šuki phuv maškaro Jordan sa đi o Izraelcija na nakhlje ki aver strana. So mislineja, da li akava setinćerđa len ko čudo so o Jehova ćerđa ko Crveno more?

Hem aće, palo sa odobor berša, o Izraelcija konačno reslje ki Obećimi phuv. Odothe šaj hine te ćeren pese ćhera hem dizja, te ovel len njive, vinogradija hem te sadinen voće hem povrće. Odija phuv hine but šukar hem o manuša hine len šuže buća hajbase hem pijbase. Odolese, olaće vaćeri pe soj tani phuv kuri thavdela avđin hem thud.