O Jonatan hine hrabro hem verno manuš

E Sauleso najphureder ćhavo vićinđa pe Jonatan hem hine but hrabro vojniko. O David phenđa so o Jonatan hine posigutno ando orao hem pozoralo ando lav. Jekh dive, o Jonatan dikhlja ko jekh brego 20 filistejska vojnikija. Odolese, e vojnikose kova igarđa oleso štit phenđa: „Ka napadina len samo ako o Jehova dela amen znak. Ako o Filistejcija phenena amenđe te đa koro lende, tegani ka napadina len.“ A o Filistejcija baš odova ćerđe. On vićinđe: „Aven te borina amen!“ Tegani, o Jonatan hem o vojniko kova akharđa oleso štit đelje hem pobedinđe e filistejsko vojnikonen.

Odolese so o Jonatan hine e Sauleso najphureder ćhavo, ov valjanđa te ovel kralj palo po dad. Ama, o Jonatan đanđa so o Jehova birinđa e Davide te ovel kralj hem na hine ljubomorno. O Jonatan hem o David ulje but paše amala. On obećinđe so ka zaštitinen jekh jekhe. O Jonatan dinđa e Davidese po ogrtači, po mač, pi strela hem o pojas sar znak ando amalipe.

Jekh puti, đi o David garavđa pe ando Saul, o Jonatan đelo koro leste hem phenđa lese: „Ov hrabro, hem ma dara. O Jehova birinđa tut te ove kralj. Čak hem mo dad đanela odova.“ Mangeja li te ovel tut jekh asavko šukar amal sar o Jonatan?

But putija, o Jonatan ćhivđa po životi ki opasnost samo te pomožini pe amalese. Ov đanđa so oleso dad, o Saul, mangela te mudari e Davide. Odolese phenđa pe dadese: „Ka ćere baro greh ako mudareja e Davide sose ov na ćerđa ništa lošno.“ Ked šunđa akava, o Saul but holjanđa upro Jonatan.

Nekobor berš palo odova, o Saul hem o Jonatan mulje ko jekh maribe. Ked o Jonatan mulo, o David rodinđa olese ćhave, e Mefivosteje. Ked arakhlja le, o David phenđa: „Odolese so hijum le but šukar amal te dadeja, me ka brininav man tuće celo to životi. Ka živine ki mi palata hem ka ha andi mi sofra.“ O David niked na bisterđa pe amale, e Jonatane.