O Danilo ki lavovsko jama

Pana jekh kralj kova vladinđa ko Vavilon hine o Darije andi Medija. Ov dikhlja so o Danilo tano averćhane ando avera. Odolese ćhivđa le te nadgledini e najvažno manušen ko kraljevstvo. On hine but ljubomorna upro leste hem manglje te mudaren le. On đanđe so o Danilo molinđa pe e Jehovase trin putija ko dive hem odolese phenđe e kraljese: „Valjani te ovel zakon kuri ka pisini so sare valjani te molinen pe samo tuće. Svako ko na ćerela odova, valjani te ovel fordimo ki lavovsko jama.“ E Darijese sviđinđa pe akava hem potpisinđa o zakon.

Ked o Danilo šunđa akava, đelo pese ćhere. Anglo jekh phravdo đami, pelo ko koćija hem molinđa pe e Jehovase. O manuša kola hine ljubomorna, khuvđe ko oleso ćher hem arakhlje le sar molini pe. Sigate đelje ko Darije hem phenđe lese: „O Danilo nane tuće poslušno. Ov molini pe pe Devlese trin putija ko dive.“ O Darije manglja e Danilo hem na manglja ov te merel. Celo dive razmislinđa sar te spasini le. Ama, ked o kralj potpisini disavo zakon, niko našti te menini le, čak ni o kralj. Odolese, naredinđa pe manušenđe te forden e Danilo ki jama kuri hine o bokhale lavija.

Odija rat, o Darije but brininđa pe e Danilose hem naštine te sovel. Sabale, đelo ko Danilo hem vićinđa: „Danilo, da li to Devel spasinđa tut?“

Tegani, o Darije šunđa glaso. Odova hine o Danilo kova phenđa e kraljese: „E Jehovaso anđeo phanlja e lavenge muja. On ništa na ćerđe maje.“ O Darije hine but radosno! Odolese, naredinđa pe slugenđe te ikalen e Danilo andi jama. O lavija ni na pipinđe e Danilo. Tegani o kralj naredinđa: „Forden ki odija jama e manušen kola manglje te mudaren e Danilo.“ Ked fordinđe len, o lavija odmah halje len.

O Darije bićhalđa akija naredba pe narodose: „Svako manuš valjani te daral kotar Daniloso Devel. Ov spasinđa e Danilo ando lavija.“

Da li hem tu molineja tut e Jehovase svako dive sar o Danilo?