I Jestira spasini pe narodo

I Jestira hine Jevrejka koja živinđa ki persijsko diz Susan. Angleder but berša, o Navuhodonosor phanlja olake porodica hem legarđa len kotar Jerusalim. Barjaćerđa la olako rođako, o Mardohej, kova hine sluga ando persijsko kralj Asvir.

O kralj Asvir manglja te birini pese nevi kraljica. Olese sluge anđe lese e najšuže ćhajen ko celo kraljevstvo, maškaro kola hine hem i Jestira. Kotar sa odola, o kralj birinđa e Jestira te ovel kraljica. O Mardohej phenđa e Jestiraće te na vaćeri soj tani Jevrejka.

Jekh ponosno manuš kova vićinđa pe Aman, hine ćhivdo upro sa o knezija. Ov manglja sa o manuša te pokloninen pe olese. Ama, o Mardohej na manglja te ćerel odova. O Aman but holjanđa hem manglja te mudari le. Ked o Aman šunđa so o Mardohej tano Jevrejin, ćerđa plan te mudari sa e Jevrejen ki phuv. Ov phenđa e kraljese: „O Jevreja tane but opasna hem mora te oslobodina amen olendar. O Asvir phenđa lese: „Ćer odova so mislineja soj tano najšukar.“ Palo odova, dinđa le vlast te anel jekh nevo zakon. O Aman anđa zakon premalo kova sa o Jevreja valjanđe te oven mudarde ko 13. dive ko masek adar. Ama, o Jehova dikhlja sa odova.

I Jestira na đanđa aso akava zakon. Odolese, o Mardohej bićhalđa laće i kopija kotar akava zakon hem phenđa laće: „Đa ko kralj hem vaćer oleja.“ I Jestira phenđa lese: „Svako ko ka đal ko kralj, a nane vićimo ka ovel mudardo, a man o kralj na vićinđa 30 dive! Ama, ka đav. Ako pružini po žezlo premalo mande, ka aćhovav đivdi, a ako na, ka merav.“

I Jestira đelji anglo kralj. Ked dikhlja la, ov pružinđa po žezlo premalo late. Oj alji uzo leste, hem ov pućlja la sar šaj te pomožini la. Oj phenđa: „Mangava te vićinav tut hem e Amane te oven me gostija.“ Đi hine koro late, oj vićinđa len palem te aven. Ked alje o dujto puti, o kralj palem pućlja la sar šaj te pomožini la. Oj phenđa: „Neko mangela te mudari man hem me narodo. Molinava tut, spasin amen.“ O kralj pućlja la: „Ko mangela te mudari tumen?“ Oj phenđa: „Akava lošno Aman!“ O Asvir odobor holjanđa so naredinđa odmah te mudaren e Amane.

Ama, o zakon so anđa o Aman naštine niko te poništini, čak ni o kralj. Odolese o kralj ćhivđa e Mardoheje te ovel upro knezija hem dinđa le vlast te anel nevo zakon. Premalo odova zakon o Jevreja šaj hine te braninen pe ked ka oven napadime. Ko 13. dive ko masek adar, o Jevreja pobedinđe pe dušmanen. Kotar odova dive, on svako berš slavinđe odija pobeda.