O Jezdra sikavi e narodo ando Devleso zakon

Nakhlje oko 70 berš sar but Izraelcija irinđe pe ko Jerusalim. Ama, disave pana živinđe ko avera thana ko Persijsko kraljevstvo. Jekh olendar hine o svešteniko Jezdra kova sikavđa e narodo ando Jehovaso zakon. O Jezdra šunđa so o manuša ko Jerusalim na šunena e Devleso zakon hem odolese manglja te đal koro lende te pomožini len. O persijsko kralj, o Artakserks, phenđa lese: „O Devel ćerđa tut te ove mudro te šaj te sikave e manušen ando leso zakon. Đa hem le svakone kova mangela te đal tuvaja.“ O Jezdra reslja pe sarinencar kola manglje te irinen pe ko Jerusalim. On molinđe pe e Jehovase te arakhi len ko odova baro drumo hem pođinđe.

Palo štar masekija, reslje ko Jerusalim. O knezija phenđe e Jezdrase: „O Izraelcija na šunđe e Jehova hem lelje pese romnjen kola služinena e hovavne devlenđe.“ So ćerđa o Jezdra? Anglo sa o narodo pelo ko koćija hem molinđa pe: „Jehova, tu ćerđan but buća amenđe, ama amen but grešinđam tuće.“ Ked o manuša šunđe odova, on kajinđe pe, ama ipak pana ćerđe o buća kola na hine ispravna. Odolese, o Jezdra birinđa e starešinen hem e sudijen te dikhen soj tano o problemi. Aso trin masek sarine kola na služinđe e Jehovase hine paldime odothar.

Nakhlje 12 berš. Aso odova vreme, o jerusalimska zidija palem hine ćerde. O Jezdra ćedinđa e manušen ko trg te čitini lenđe e Devleso zakon. Ked phravđa i knjiga, o narodo uštinđa ko pre. O Jezdra počminđa te hvalini e Jehova, a on vazdinđe pe vasta te mothoven so slažinena pe oleja. O Jezdra čitinđa hem objasninđa o zakon, a o manuša šunđe le. On priznajinđe so cidinđe pe kotar Jehova hem počminđe te roven. Aver dive, o Jezdra palem čitinđa kotar Zakon. On haljilje so pana hari, valjani te slavinen o Praznik ando senice. Odolese, odmah počminđe te spreminen pe e praznikose.

Đi efta dive slavinđe o prazniko, o narodo hine but radosno hem zahvalno e Jehovase asi šukar žetva. Asavko Praznik ando senice na hine pana ando Isuse Navineso vreme. Palo praznik, o manuša ćedinđe pe hem molinđe pe: „Jehova, tu spasinđan amen kotar ropstvo, parvarđan amen ki pustinja hem dinđan amen akija šuži phuv. Ama, amen stalno grešinđam tuće. Bićhalđan amenđe te prorokonen, ama amen na šunđam len. Tu hijan le but strpljivo amencar hem na bisterđan odova so obećinđan e Avrahamese. Akana amen obećinaja so ka ova tuće poslušna.“ On pisinđe odova so obećinđe, a palo odova o knezija, o Levitija hem o sveštenikija ćhivđe pečati ko odova.