O jerusalimska zidija

Hajde te irina amen nekobor berša palal. Ki persijsko diz Susan živinđa jekh Izraelco kaso anav hine Nemija. Ov hine sluga ko kralj Artakserks. E Nemijaso phral alo andi Juda hem phenđa lese jekh lošno vest: „O narodo so irinđa pe ko Jerusalim nane bezbedno. O zidija hem e dizjake udara kola uništinđe o Vaviloncija pana nane ćerde.“ O Nemija but brininđa pe. Ov manglja te đal ko Jerusalim te pomožini hem odolese molinđa pe e Jehovase o kralj te mukhel le te đal.

Palo disavo vreme, o kralj dikhlja soj tano o Nemija tužno. Ov phenđa: „Niked na dikhljum tut ađahar. So ulo?“ O Nemija phenđa: „Sar te na ovav tužno, ked mi diz tani pana ko ruševine?“ A o kralj pućlja le: „Sar šaj te pomožinav tut?“ Ko odova trenutko, o Nemija molinđa pe ano peste. Palo odova, ov phenđa: „Molinava tut, mukh man te đav ko Jerusalim te ćerav e dizjake zidija.“ O kralj Artakserks phenđa e Nemijase so šaj te đal hem dinđa le sa so valjani lese te šaj te resel bezbedno ko Jerusalim. Isto ađahar, ćhivđa le te ovel upravitelj ki Juda hem dinđa le dovoljno kašta te šaj te ćerel e dizjake udara.

Ked o Nemija reslja ko Jerusalim, najangleder đelo te dikhel e dizjake zidija. Palo odova, ćedinđa e sveštenikonen hem e upraviteljen hem phenđa lenđe: „O stanje tano but lošno. Valjani odmah te dola amen ki buti.“ O manuša složinđe pe oleja hem počminđe te obnovinen o zidija.

Ama, disave manuša so na manglje e Izraelcen, počminđe te maren lenđe muj: „O zido so gradinena šaj te peravi jekh lisica.“ Ama, o radnikija na šunđe len hem ponodri ćerđe pi buti. O zidija hine sa pouće hem pozorale.

O protivnikija odlučinđe te aven ando razna strane hem te napadinen o Jerusalim ked o manuša odova na ka očekujinen. Ked o Jevreja šunđe akava, on but darandilje. Ama, o Nemija phenđa lenđe: „Ma daran. O Jehova tano amencar.“ Ov ćhivđa e stražaren te zaštitinen e radnikonen hem ađahar o protivnikija naštine te napadinen len.

O zidija hem o udara hine završime aso 52 dive. O Nemija vićinđa sa e Leviten ko Jerusalim te slavinen so završinđe i buti. Odvojinđa len ko duj grupe te đilaben. Uklinđe ko zido prekalo stepenice kola hine ko Izvorska udara hem pođinđe okolo i diz – jekh grupa andi jekh strana, a aver grupa andi aver strana. On bašalđe ko trube, ko činele, ko harfe hem đilabđe e Jehovase. O Jezdra đelo jekha grupaja, a o Nemija averaja. Ko krajo, o solduj grupe arakhlje pe anglo hram. Sa o manuša – murša, đuvlja hem ćhave – dinđe žrtve e Jehovase hem veselinđe pe. On hine odobor radosna so olengo glaso šundilo but dur.