O anđelija objavinđe so bijandilo o Isus

O car Avgust, o vladari ko Rimsko carstvo, naredinđa sa o Jevreja te đan ko dizja kuri tane bijande, sebepi o popis. Odolese so o Josif hine ando Vitlejem, ov hem i Marija morandilje te đan uduri. Pana hari, i Marija valjanđa te bijani.

Ked reslje ko Vitlejem, jedino than kuri šaj hine te soven hine ki jekh štala. Odothe, i Marija bijanđa e Isuse. Paćarđa le hem ćhivđa le ko than kuri ćhivela pe e životinjenđe te han.

Paše uzo Vitlejem, disave pastirija raćate hine avri hem arakhlje e bakren. Ando jekh puti, pojavinđa pe lenđe jekh anđeo hem e Jehovasi slava svetlinđa okolo lende. O pastirija but darandilje, ama o anđeo phenđa lenđe: „Ma daran. Isi man but šukar vest. Avdije ko Vitlejem bijandilo o Mesija.“ Ko odova trenutko, ko nebo pojavinđe pe but anđelija, hem phenđe: „Nek ovel hvalimo o Devel kova tano upre ko nebo, a ki phuv nek ovel mir.“ Palo odova, o anđelija ando jekh puti našaldilje. So ćerđe o pastirija?

O pastirija phenđe jekh jekhese: „Hajde odmah te đa ko Vitlejem.“ On đelje hem arakhlje e Josife hem e Marija ki štala zajedno e bebaja.

Sare hine oduševime ked šunđe odova so phenđa o anđeo e pastirenđe. I Marija but razmislinđa ando lafija kola vaćerđa laće o anđeo hem niked na bisterđa len. O pastirija irinđe pe ko po stado hem zahvalinđe pe e Jehovase aso sa so dikhlje hem so šunđe.