O Jehova zaštitinđa e Isuse

Ki jekh phuv, istočno ando Izrael, živinđe o manuša kola verujinđe so šaj o ćerenja te vodinen len. Jekh rat, nekobor manuša ando istok dikhlje diso so ličinđa sar sjajno ćereni so svetlini ko nebo hem počminđe te đan palo late. I „ćereni“ igarđa len ko Jerusalim. On pućlje e manušen: „Kaj tano o ćhavo so ka ovel kralj e Jevrejenđe? Amen aljam te poklonina amen olese.“

Ked o Irod, kova hine kralj ko Jerusalim, šunđa ando nevo kralj, but hine sekirimo. Ov pućlja e glavna sveštenikonen: „Kaj valjani te bijanđol akava kralj?“ On phenđe lese: „O prorokija pisinđe so ka bijanđol ko Vitlejem.“ Tegani o Irod vićinđa nekobor manušen ando istok hem phenđa lenđe: „Đan ko Vitlejem hem arakhen odole ćhave. Palo odova, irinen tumen koro mande hem vaćeren maje kaj tano. Mangava hem me te đav te pokloninav man olese.“ Ama, odova hine hovajbe.

I „ćereni“ vodinđa len hem o manuša đelje palo late sa đi o Vitlejem. I „ćereni“ aćhilji upro jekh ćher hem o manuša khuvđe andre. Odothe arakhlje e Isuse pe dajaja, e Marijaja. Pokloninđe pe e ćhavese hem dinđe le zlato, tamjan hem smirna. Da li o Jehova bićhalđa akale manušen te arakhen e Isuse? Na.

Odija rat, o Jehova phenđa e Josifese ko suno: „O Irod mangela te mudari e Isuse. Le te romnja hem te ćhave hem našen ko Egipat. Aćhov uduri sa đi na vaćerava tuće te irine tut.“ O Josif hem olesi porodica odmah đelje ko Egipat.

O Jehova phenđa e manušenđe ando istok te na irinen pe ko Irod. Ked o Irod dikhlja so na irinđe pe, but holjanđa. Odolese so naštine te arakhi e Isuse, dinđa zapovest te oven mudarde sa o ćhave ko Vitlejem kola tane vrsnikija e Isuseja. Ama, o Isus hine ko sigurno than sose hine dur, ko Egipat.

Palo disavo vreme, o Irod mulo. O Jehova phenđa e Josifese: „Akana šaj te irine tut.“ O Josif, i Marija hem o Isus irinđe pe ko Izrael hem živinđe ki diz Nazaret.