O terno Isus

O Josif hem i Marija živinđe ko Nazaret zajedno e Isuseja hem pe avere ćhavencar. O Josif brininđa pe andi pi porodica ađahar so ćerđa buti sar tesari hem sikavđa pe porodica ando Jehova hem oleso Zakon. On redovno đelje ki sinagoga te šaj te služinen e Jehovase hem svako berš đelje ko Jerusalim te slavinen i Pasha.

Ked o Isus hine le 12 berš, olesi porodica pođinđa ko baro drumo ko Jerusalim sar so ćerđe svako berš. I diz hine pherdi manušencar so alje te slavinen i Pasha. Palo prazniko, o Josif hem i Marija pođinđe te đan pese ćhere. On mislinđe so o Isus tano olencar ki odija grupa. Ama, ked dikhlje so ov nane olenge familijaja, počminđe te roden le.

Tegani, o Josif hem i Marija irinđe pe ko Jerusalim hem trin dive rodinđe pe ćhave. Ko krajo, arakhlje le ko hram. Odothe o Isus bešlja maškaro učiteljija, šunđa šukar hem pućlja len phare pućiba. O učiteljija hine oduševime e Isuseja hem on pućlje le razna pućiba. Olese odgovorija but oduševinđe len. Šaj hine jasno te dikhen so o Isus šukar haljola e Jehovaso zakon.

O Josif hem i Marija but brininđe pe. Ked arakhlje le, i Marija phenđa: „Mo ćhavo, nane than kuri na rodinđam tut! Kaj hijan le?“ O Isus odgovorinđa: „Na đanđen li so me valjani te ovav ko me Dadeso ćher?“

O Isus irinđa pe ćhere pe roditeljencar. O Josif sikavđa e Isuse te ovel šukar tesari. So mislineja, sar terno ćhavo, savo hine o Isus? Đi barjola hine, o Isus hine but mudro hem but manglje le o manuša hem o Devel.