O Jovan pripremini o drumo e Mesijase

O Jovan, e Zaharijaso hem e Jelisavetako ćhavo, ulo prorok ked barilo. O Jehova dinđa le zadatko te vaćeri e narodose so pana hari ka avel o Mesija. O Jovan na sikavđa e manušen ko sinagoge ja ko dizja, nego propovedinđa ki pustinja. But manuša ando Jerusalim hem andi celo Judeja alje te šunen le. Ov sikavđa len so mora te ćhinaven te ćeren o lošna buća ako mangena te ugodinen e Jehovase. Odolese but manuša pokajinđe pe aso grehija kola ćerđe hem o Jovan krstinđa len ki reka Jordan.

O Jovan živinđa but jednostavno. Akharđa šeja kola hine ćerde ando kamilake bala hem halja skakavcija hem divljo avđin. Odolese o manuša pućlje pe savo manuš tano o Jovan. Čak, hem o ponosna fariseja hem o sadukeja alje te dikhen le. O Jovan phenđa lenđe: „Mora te meninen tumen hem te pokajinen tumen. Ma mislinen so hijen diso posebno samo odolese so phenena so hijen e Avrahamese ćhave. Odova na značini so ćaće hijen hem e Devlese ćhave.“

But đene alje ko Jovan hem pućlje le: „So valjani te ćera te šaj te ugodina e Devlese?“ O Jovan odgovorinđa lenđe: „Ako isi tumen duj fistanija, den jekh okolese kova nane le.“ Đaneja li sose phenđa odova? Manglja te sikavi len so ako mangena te ugodinen e Devlese, mora te mangen avere manušen.

O Jovan phenđa e poreznikonenđe: „Oven poštena hem ma ćoren ando manuša.“ A e vojnikonenđe phenđa: „Ma len talo vas hem ma hovaven.“

Isto ađahar, disave sveštenikija hem Levitija alje ko Jovan te pućen le: „Ko hijan tu? Sare mangena te đanen odova.“ O Jovan phenđa lenđe: „Me hijum o glaso kova avela andi pustinja hem pomožinava e manušenđe te oven popaše e Jehovaja sar so prorokujinđa o Isaija.“

E manušenđe sviđinđa pe odova so sikavđa len o Jovan. But đene mislinđe so ov tano o Mesija. Ama, ov phenđa lenđe: „Avela neko koj tano pobaro mandar. Me na hijum dostojno olese sandale te phravav. Me krstinava panjeja, a ov ka krstini e sveto duhoja.“