O Beng iskušini e Isuse

Ked o Isus krstinđa pe, o sveti duh legarđa le ki pustinja. Đi hine uduri, ov 40 dive ništa na halja. Tegani o Beng alo koro leste te iskušini le hem phenđa lese: „Ako ćaće hijan e Devleso Ćhavo, phen akale barenđe te oven mare.“ Ama, o Isus đanđa so pisini ko Devleso Lafi hem odolese phenđa lese: „O manuš na valjani samo te hal te bi aćhola đivdo, nego valjani te šunel svako lafi so avela kotar Jehova.“

Palo odova, o Beng phenđa e Isusese: „Ako ćaće hijan e Devleso Ćhavo, forde tut kotar hramsko zido. Pisimo tano so o Devel ka bićhali pe anđelen te astaren tut te na pere.“ Ama, o Isus palem phenđa so pisini ko Devleso Lafi: „Pisimo tano so na valjani te iskušina e Jehova.“

Ko krajo, o Satana mothovđa e Isusese sa o kraljevstvija ko sveto, olengo barvalipe hem olengi slava hem phenđa lese: „Sa akala buća ka dav tuće ako samo jekh puti poklonineja tut maje.“ Ama, o Isus odgovorinđa lese: „Naš, Satana! Pisimo tano so valjani te služina samo e Jehovase.“

Tegani o Beng đelo, a o anđelija alje ko Isus hem dinđe le diso te hal. Kotar tegani, o Isus počminđa te propovedini i šukar vest kotar Devleso Kraljevstvo. Odolese hem hine bićhaldo ki phuv. E manušenđe but sviđinđa pe odova so šunđe kotar Isus hem odolese đelje palo leste.