I Propoved ki gora

O Isus birinđa 12 apostolija hem palo odova huljilo andi planina ko jekh than kuri hine but manuša. On alje kotar Galileja, Judeja, Tir, Sidon, Sirija hem kotar aver strana andi reka Jordan. On anđe e manušen kola hine naborme hem kas mučinđe o demonija. O Isus saćarđa sarinen hem palo odova bešlja hem počminđa te sikavi len. Ov objasninđa so valjani te ćera ako mangaja te ova paše e Devleja. Ov phenđa so bizo Jehova našti te ova ćaće bahtale hem so valjani te sikljova te manga le. Ama, e Devle našti te manga ako na mangaja e manušen. Mora te ova šukar sarinencar, čak hem okolencar kola na mangena amen.

O Isus phenđa: „Na valjani samo te mange te amalen. Valjani te mange hem te dušmanen hem vilestar te oprostine e manušenđe. Ako neko holjani upro tute, sigate đa koro leste hem izvinin tut. Ponašin tut premalo avera ađahar sar so mangeja on te ponašinen pe tuvaja.“

Isto ađahar, o Isus dinđa šukar savetija ando pare. Ov phenđa: „Považno tano te ove amal e Jehovaja, nego te ove but barvalo. O pare šaj te ćoren tutar, ama o amalipe e Jehovaja niko našti te ćorel tutar. Ma brinin tut so ka ha, so ka pije ja so ka urave. Dikh e ćirikljen. O Devel uvek brinini pe te ovel len so te han. Ako but brinineja tut, odova na ka pomožini tut pobuter te živine. Ma bistri, o Jehova đanela so valjani tuće.“

O manuša niked na šunđe nekas ko vaćeri sar o Isus. Olenge verska vođe na sikavđe len ađahar. Sose o Isus hine odobor šukar učitelj? Odolese so ov e manušenđe vaćerđa samo okova so šunđa kotar Jehova.