O Isus sikavi pe učenikonen sar te molinen pe

O fariseja but manglje avera te hvalinen len. Odolese on ćerđe šukar buća te šaj avera te dikhen len. On molinđe pe ko thana kuri sa o manuša šaj hine te dikhen len. O fariseja sikljilje bare molitve hem ked hine ko sinagoge ja ko ulice on vaćerđe len te šaj avera te šunen. Odolese o manuša čudinđe pe ked o Isus phenđa lenđe: „Ma molinen tumen sar o fariseja. On mislinena so e Devlese sviđini pe so koristinena but lafija, ama nane ađahar. I molitva tani maškaro tute hem o Jehova. Ma vaćeren uvek ista lafija. O Jehova mangela te vaćeren lese sar ćaće osetinena tumen.“

„Ađahar valjani te molinen tumen: ’Amaro Dad, kova hijan ko nebo, nek svetini pe to anav. Nek avel to Kraljevstvo. Nek ovel ti volja, sar ko nebo, ađahar hem ki phuv.‘“ Isto ađahar, o Isus phenđa so valjani te molina amen hem aso disave buća kola valjanena amenđe, na primer te ovel amen maro svako dive hem te oven oprostime amare grehija.

O Isus mothovđa kobor tani i molitva važno ked phenđa: „Uvek molinen tumen hem roden kotar tumaro Dad, o Jehova, te del tumen šukar buća. Svako roditelj dela šukar buća pe ćhavenđe. Ko bi tumendar pe ćhavese dela bar ako rodela lestar maro? Ili ako rodela lestar maćho, da li ka del le sap?“

Palo odova, o Isus objasninđa: „Sar so jekh roditelj dela šukar buća pe ćhavenđe, ađahar hem o Jehova ka del tumen po sveti duh! Samo valjani te roden lestar odova.“ Da li hem tu ćereja odova? Aso kola buća molineja tut e Jehovase?