Mothov so cenineja i molitva

1. Sar valjani te dikha ki molitva?

AMARO Dad o Jehova dinđa amen jekh but šužo poklon, a odova tano i molitva. Amen šaj te molina amen e Jehovase bilo ked, bilo kaj hem ki bilo koja ćhib bizo te ovel amen termini aso odova. Čak šaj te molina amen e Jehovase ando kreveti ki bolnica ili andi čelija ko zatvori hem šaj te ova sigurna so ka šunel amen. Ćaće hijam but zahvalna so dinđa amen akava šužo poklon.

2. Sar o kralj David mothovđa so cenini i molitva?

² O kralj David ceninđa but i molitva. Ov đilabđa e Jehovase: „Nek mi molitva ovela sar kad kova dela pe anglo tute“ (Ps. 141:1, 2). Ko oleso vreme, o sveštenikija koristinđe o kad ko sveto šatori kova hine pažljivo pripremimo (Izl. 30:34, 35). O David manglja pažljivo te razmislini so ka vaćeri ki molitva isto sar so okola kola pripreminđe o kad ćerđe odova pažljivo. Odova hem amen mangaja te ćera sose mangaja amare molitve te oven ugodna e Jehovase.

3. So valjani te mothova đi molinaja amen hem sose?

³ Ked molinaja amen e Jehovase, valjani te mothova baro poštovanje. Razmislin ando vizije kola dobinđa o Isaija, o Jezekilj, o Danilo hem o Jovan. Iako olenge vizije tane averćhane jekh jekhatar, on ipak isi len diso slično. Ki svako vizija, o Jehova tano predstavimo sar najbaro Kralj. O Isaija dikhlja „e Jehova sar bešela ko ućo hem ko uzvišeno presto“ (Is. 6:1-3). O Jezekilj dikhlja e Jehova sar bešela ko nebeska kočije, a okolo leste tani bari svetlost sar duga (Jezek. 1:26-28). A o Danilo dikhlja soj tano „o Najpurano“ uravdo ko parne šeja, a oleso presto hine lolo sar jag (Dan. 7:9, 10). A o Jovan dikhlja so o Jehova bešela ko presto, a uzo presto hine i duga šuži sar zeleno dijamanti (Otkr. 4:2-4). Ked razmislinaja andi Jehovasi bari slava, odova setinćeri amen so isi amen bari čast te molina amen olese hem so valjani te mothova poštovanje đi molinaja amen. Ama, aso so šaj te molina amen?

„MOLINEN TUMEN AĐAHAR“

4. Premalo Matej 6:9, 10, so sikljovaja ando odova so o Isus pominđa ki početka andi molitva?

⁴ Čitin Matej 6:9, 10. Ki Propoved ki gora, o Isus sikavđa pe učenikonen sar te molinen pe. Ki početka andi molitva o Isus molinđa pe aso najvažna buća. Ov molinđa pe te svetini pe e Devleso anav, te avel e Devleso Kraljevstvo kova ka uništini e Devlese dušmanen hem pominđa o blagoslovija kola o Devel ka del e manušenđe ki budućnost. Ked hem amen molinaja amen aso akala buća, odoleja mothovaja so amenđe tani važno e Devlesi volja.

5. Da li šaj te molina amen aso buća kola valjanena amenđe?

⁵ Ko dujto deo andi molitva, o Isus mothovđa so šaj te molina amen aso buća kola valjanena amenđe. Amen šaj te molina e Jehova te del amen hajbe, te oprostini amare grehija, te zaštitini amen ando kušnje hem te cidel amen ando Lošno (Mat. 6:11-13). Ked molinaja amen aso akala buća, amen mothovaja so valjani amenđe e Jehovasi pomoć hem so mangaja te ćera olesi volja.

6. Da li amen šaj te molina amen samo aso buća kola pominena pe ko Matej 6:9-13 stih? Objasnin.

⁶ O Isus na manglja olese učenikija akija molitva te sikljon napamet. Ko disave aver prilike ked molinđa pe, ov rodinđa e Jehovastar disave buća kola valjanđe lese ko odova momenti (Mat. 26:39, 42; Jov. 17:1-26). Isto ađahar, hem amen šaj te molina amen aso buća kola brininena amen. Na primer, ked valjani te ana disavi odluka, šaj te molina amen e Jehovase te del amen mudrost (Ps. 119:33, 34). Ked valjani te ćera dijekh pharo zadatko, šaj te molina amen olese te pomožini amen te haljova sar te ćera le (Posl. 2:6). O roditeljija šaj te molinen pe e ćhavenđe, o ćhave pe roditeljenđe, a sarine amen e manušenđe kolencar proučinaja hem okolenđe kase propovedinaja. Ama, na valjani te molina amen samo ked valjani amenđe diso.

7. Sose valjani te hvalina e Jehova ki molitva?

⁷ Amen valjani uvek te hvalina e Jehova ko amare molitve. Niko aver na zaslužini odova pobuter ando Devel. Ov tano šukar hem spremno oprostini. Isto ađahar, ov tano „milosrdno hem samilosno, strpljivo, pherdo mangipe hem vernost“ (Ps. 86:5, 15). Ćaće isi amen šukar razlog te hvalina e Jehova aso odova save osobine isi le hem aso sa odova so ćerela.

8. Aso kola buća šaj te zahvalina amen e Jehovase? (Psalam 104:12-15, 24)

⁸ Uzo odova so hvalinaja e Jehova ko amare molitve, valjani hem te zahvalina amen olese aso buća kola dela amen. Na primer, šaj te zahvalina amen lese aso but šuže luluđa kola ćerđa ko razna boje, asi raznovrsno ukusno hrana hem so dinđa amen but šukar amalen. Ama, amaro Dad o Jehova dela amen pana pobuter buća kola ćerena amen bahtale. (Čitin Psalam 104:12-15, 24.) A soj tano najvažno, valjani te zahvalina amen e Jehovase asi duhovno hrana koja dela amen hem so dinđa amen nada asi budućnost.

9. So šaj te pomožini amen te na bistra te zahvalina amen e Jehovase? (1. Solunjanima 5:17, 18)

⁹ Šaj lokho te desini pe te bistre te zahvaline tut aso buća kola o Jehova dinđa tut. So šaj te pomožini tuće te na bistre? Šaj ko jekh lil te pisine aso kola buća molinđan tut e Jehovase hem palo disavo vreme dikh kola buća o Jehova već dinđa tut hem zahvalin tut lese aso odova. (Čitin 1. Solunjanima 5:17, 18.) Ked avera mothovena soj tane zahvalna aso buća kola ćeraja lenđe, amen hijam bahtale. Isto ađahar, hem o Jehova radujini pe ked na bistraja te zahvalina amen olese so uslišinđa amare molitve (Kol. 3:15). Ama, isi pana jekh važno razlog sose valjani te mothova so hijam zahvalna e Jehovase.

OV ZAHVALNO E JEHOVASE SEBEPI OLESO ĆHAVO

10. Premali 1. Petrova 2:21, sose valjani te ova zahvalna e Jehovase so bićhalđa pe Ćhave te avel ki phuv?

¹⁰ Čitin 1. Petrova 2:21. Amen valjani te zahvalina amen e Jehovase sose bićhalđa pe Ćhave te sikavi amen. Ked čitinaja ando Isus, amen sikljovaja but buća ando Jehova hem sar te ćera le bahtalo. Amen valjani te mothova vera ki Isusesi otkupno žrtva, sose ađahar šaj te ova paše e Jehovaja hem te ova ko mir oleja (Rimlj. 5:1).

11. Sose molinaja amen ko Isuseso anav?

¹¹ Amen hijam zahvalna e Jehovase so šaj te molina amen prekalo oleso Ćhavo. Ov šunela hem odgovorini ko amare molitve kola bićhalđam ko olese Ćhaveso anav. Prekalo leste, ov dela amen odova so rodinđam olestar. O Isus phenđa: „So god rodena ko mo anav, ka ćerav odova, te bi proslavini pe o Dad prekalo Ćhavo“ (Jov. 14:13, 14).

12. Sose pana šaj te ova zahvalna e Jehovase sebepi oleso Ćhavo?

¹² O Jehova oprostini amare greške prekali Isusesi otkupno žrtva. Ki Biblija pisini so o Isus tano „prvosvešteniko, kova [bešela] ki desno strana ando presto kotar Svevišnjo ko nebo“ (Jevr. 8:1). „Ko amaro Dad isi amen pomoćniko“, a odova tano o Isus Hrist (1. Jov. 2:1). But hijam zahvalna e Jehovase so isi amen prvosvešteniko kova haljola amare slabostija hem kova „molini e Jehova amenđe“ (Rimlj. 8:34; Jevr. 4:15). Amen hijam nesavršena, hem niked na bi šaj te molina amen e Jehovase bizi otkupnina. Zahvalna hijam lese so dinđa pe Ćhave amenđe, ama niked na ka šaj te irina lese aso odova so ćerđa amenđe.

MOLIN TUT TE PHRALENĐE HEM TE PHENJENĐE

13. Sar o Isus mothovđa so manglja pe učenikonen ki rat angleder te merel?

¹³ Ki rat angleder te merel, o Isus dugo molinđa pe pekle učenikonenđe hem rodinđa pe Dadestar te arakhi len „ando Lošno“ (Jov. 17:15). Akava mothovđa kobor o Isus manglja len. Iako đanđa so pana hari ađićeri le, ov ipak brininđa pe ando pe apostolija.

14. Sar šaj te mothova so mangaja amare phralen hem phenjen?

¹⁴ Sare amen mangaja te oponašina e Isuse. Odolese, na mislinaja samo odolestar so amenđe valjani. Amen molinaja amen amare phralenđe hem phenjenđe. Ked ćeraja odova, amen šunaja e Isusesi zapovest te manga jekh jekhe hem ađahar mothovaja e Jehovase so mangaja le (Jov. 13:34). Amare molitve šaj but te pomožinen amare phralenđe hem phenjenđe. E Devleso Lafi phenela so „e pravednikosi molitva koja avela ando vilo isi la bari snaga“ (Jak. 5:16).

15. Sose valjani te molina amen amare phralenđe hem phenjenđe?

¹⁵ Amen valjani te molina amen amare phralenđe hem phenjenđe sose nakhena bare pharipa. Šaj te molina amen e Jehovase te pomožini lenđe te istrajinen ked tane naborme, ked isi disave prirodna katastrofe, maribe, progonstvo ja avera pharipa. Isto ađahar, valjani te molina amen amare phralenđe hem phenjenđe kola pomožinena okolenđe kola tane ko pharipa. Da li penđareja nekas ando odola phralja hem phenja? Ako ja, tegani sose na bi pomineja olengo anav ki molitva? Amen mothovaja so mangaja amare phralen ked molinaja amen olenđe te istrajinen.

16. Sose valjani te molina amen okolenđe kola predvodinena?

¹⁶ O phralja kola predvodinena tane but zahvalna ked pominaja len ko amare molitve, sose odola molitve dena len but bari snaga. O apostol Pavle đanđa so ka pomožinen lese averenge molitve hem odolese phenđa: „Molinen tumen hem maje, o Devel te pomožini manđe, ked valjani te vaćerav, te arakhav prava lafija te šaj hrabro te propovedinav i sveto tajna andi šukar vest“ (Ef. 6:19). Avdije, hem amen isi amen but bućarne phralja kola predvodinena. Ked molinaja amen e Jehovase te blagoslovini len, mothovaja so but mangaja len.

KED MOLINAJA AMEN ANGLO AVERA

17-18. Ked šaj ka valjani te molina amen anglo avera hem so tegani na valjani te bistra?

¹⁷ Disavo puti, amen ka valjani te molina amen anglo avera. Na primer, jekh phen koja vićinđa avera phenja te ovel olaja ko kurs, šaj te pućel la te molini pe. Ama, odija phen šaj na đanela but odola osoba hem šaj ka mangel te molini pe ko kraj. Sose? Odolese so tegani ka đanel aso so te molini pe.

¹⁸ Jekh phral šaj te ovel zamolimo te molini pe ko sastanko asi služba ja ko disavo aver skupštinsko sastanko. O phralja kola isi len akava zadatko na valjani te bistren aso so tano o sastanko. Tegani ki molitva on na valjani te den savetija, te sikaven ili te den disavo obaveštenje. Aso but skupštinska sastankija panđe minutenđe valjani hem te molina amen hem te đilaba i đili. Odolese, o phral kova molini pe na valjani te koristini „but lafija“, posebno ako valjani te molini pe ko početko ando sastanko (Mat. 6:7).

NEK I MOLITVA OVELA TUĆE NAJVAŽNO

19. So šaj te pomožini amen te ova spremna aso e Jehovaso dive ando sudo?

¹⁹ Amenđe i molitva valjani te ovel but važno, sose e Jehovaso dive ando sudo tano but paše. Sebepi odova o Isus phenđa: „Odolese aćhoven đangavde hem sa odova vreme molinen tumen ando vilo, te šaj te našen kotar sa akala buća so valjani te oven“ (Luka 21:36). Ako redovno molinaja amen, amari vera ka ovel zorali hem ka ova spremna ked ka avel e Jehovaso dive ando sudo.

20. Sar šaj amare molitve te oven sar o kad kova šukar mirišini?

²⁰ Sostar vaćerđam đi akana? Dikhljam so valjani but te cenina i molitva. Valjani te molina amen aso buća kola tane povezime e Jehovase nameraja. Isto ađahar, valjani te zahvalina amen e Jehovase aso oleso Ćhavo, aso odova so oleso Kraljevstvo vladini hem valjani te molina amen amare phralenđe hem phenjenđe. Uzo odova, o Jehova mangela te molina amen aso odova so valjani amenđe hem amari vera te ovel zorali. Ked pažljivo razmislinaja so ka phena ki molitva, ađahar mothovaja so ceninaja o poklon kova o Jehova dinđa amen. Amare lafija ka oven sar o kad kova šukar mirišini hem ka oven ugodna e Jehovase (Posl. 15:8).