Mukhljum e Jehova te birini kole drumoja te đav

KOTAR KALI PHUV ĐI KI AFRIKA

Bijandiljum ko 1935. berš ki diz Darlaston, ki Engleska. Odothe hine fabrike kola mukhlje disavo kalo ćuro kova zagadinđa o vazduho. Odolese, odova deo vićinđa pe Kali phuv. Ked hine man štar berš, mo dad hem mi daj počminđe te proučinen i Biblija e Jehovase svedokonencar. Ked hijum le tinejdžer, uverinđum man so odova tano ćaćipe hem krstinđum man ko 1952. berš ked hine man 16 berš.

Ko odova vreme, počminđum te ćerav buti ki jekh fabrika kuri ćerđe pe disave alatija hem delovija aso motorna vozila. Isto ađahar, počminđum te dobinav obuka te ovav sekretari ki firma. Šaj te phenav so ćaće uživinđum ki mi buti.

Valjanđum te anav jekh važno odluka. O pokrajinsko nadgledniko phenđa maje so ko sastanko ko radno dive šaj te vodinav i knjiga ki skupština Vilenhol. Na đanđum so te ćerav. Ko odova vreme, đeljum ko duj skupštine. Prekalo kurko, đeljum ko sastankija ki skupština koja hine uzi mi buti, ko Brumsgrov, koja hine dur oko 32 kilometrija ando mo ćher. A ko vikendija, ked bi đava ćhere, đeljum ko sastankija ki skupština Vilenhol.

Sebepi so mangljum te podržinav sa odova so ćerela e Jehovasi organizacija, prihvatinđum odova zadatko, iako morandiljum te mukhav mi buti koja but mangljum. Odolese so mukhljum o Jehova te phenel maje kole drumoja te đav, hine man bare blagoslovija hem hijum le but bahtalo.

Ked hijum le ki skupština Brumsgrov, upoznajinđum e Ena, jekha but šuža phenja. Dikhljum so but mangela e Jehova. Ko 1957. berš, amen duj leljam amen. Kotar tegani hine amen prilika te služina e Jehovase sar stalna pionirija, specijalna pionirija, služinđam ki pokrajinsko služba hem palo odova ko Betel. I En ćaće ćerđa te ovav but bahtalo.

Ko 1966. berš hijam le vićime ki škola Galad. Amen hijam le ko 42. razred. Palo odova dobinđam te đa ko Malavi. O manuša ki odija phuv tane but ljubazna hem šukar, odolese asi odija phuv phenela pe soj tani tato vilo andi Afrika. Ama, na đanđam so but sigate ka valjani te mukha odija phuv.

SLUŽINĐAM E JEHOVASE KO MALAVI KO BUT PHARO VREME

Ko 1. februar ko 1967. berš, resljam ko Malavi. O prvo masek dinđam sa amendar te sikljova i ćhib, a palo odova počminđum te služinav sar oblasno nadgledniko. Hine amen džip hem disave mislinđe so oleja šaj hine te nakha hem prekalo reke. Ama, na hine ađahar. Odole vordancar šaj hine te nakha samo uduri kuri o pani hine plitko. Disavo puti, morandiljam te raćera ko kolibe kola hine ćerde kotar ćik, olengo krov hine andi slama. Svako puti ked đelo boršim morandiljam te ućhara o krov disave ceradaja te na khuvel o pani andre. Ki početka, na hine amenđe lokho. Ama, amen mangljam amari služba.

Ko april, haljiljum so sebepi i situacija ki država pana hari ka oven amen problemija. Ko radio šunđum sar o predsednik kotar Malavi, o dr Hejstings Banda, ićeri jekh govor. Ov phenđa so e Jehovase svedokija na platinena o porezija hem so mešinena pe ki politika. Ama, odova na hine ćaće. O glavno problemi hine so amen hijam le neutralna hem so na mangljam te ćina o partijska knjižice.

Ko septembar, ko novine hine pisimo so o predsedniko optužinđa e phralen so svuda ćerena problemija. Odolese, ko jekh ando sastankija kola hine ićerde ki vlada hine objavimo so e Jehovase svedokija valjani sig posig te oven zabranime. Ađahar hem hine. Ko 20. oktobar, ko 1967. berš, e Jehovase svedokija ko Malavi hine zabranime. I policija hem o službenikija andi imigraciono služba alje te phanen i podružnica hem te uspudinen e misionaren andi odija phuv.

Palo odova so trin dive hijam le ko phanlipe, bićhalđe amen ko Mauricijus. Ama, o vlastija ko Mauricijus na mukhlje amen te aćhova odothe sar misionarija. Odolese hijam le bićhalde te đa ki Rodezija (akana Zimbabve). Ked aljam othe, anglo amende ikljilo jekh službeniko andi imigraciono služba, kova hine but neljubazno hem phenđa amenđe: „Tumenđe tano zabranimo te oven ko Malavi, na mukhlje tumen te oven ko Mauricijus, a akana aljen akate.“ I En počminđa te rovel. Dićhilo amenđe so samći niko na mangela amen. Ko odova trenutko, jedino sostar razmislinđum hine te irina amen ćhere ki Engleska. Ko krajo, i policija mukhlja amen te raćera ki podružnica, ama phenđe amenđe so tajsa valjani te đa te javina amen olenđe. Amen već hijam le but ćhinde, ama hijam le bahtale so mukhljam o buća ko Jehovase vasta. Tajsato dive, dobinđam privremeno boravak ko Zimbabve. Niked na ka bistrav sar osetinđum man odova dive. Hijum le uverimo so o Jehova sa odova vodinđa.

SLUŽINĐAM KO MALAVI ANDO ZIMBABVE

Ki podružnica ko Zimbabve, služinđum ko Službeno odeljenje hem brininđum man ando Malavi hem Mozambik. O phralja ko Malavi doživinđe baro progonstvo. Jekh deo andi mi buti hine te prevodinav o izveštaija kola bićhalđe o pokrajinska nadglednikija kola služinđe ko Malavi. Jekh rat, đi čitinđum odola izveštaija, but runđum sose haljiljum kobor me phralja hem me phenja patinena odothe.a Ama, but ohrabrinđa man olengi vernost hem istrajnost (2. Kor. 6:4, 5).

Amen dinđam sa amendar te šaj amare phralja ko Malavi hem okola kola našlje ko Mozambik te ovel len duhovno hrana. O phralja hem o phenja kola prevodinđe asi ćhib čeva, i ćhib koja najviše vaćeri pe ko Malavi, selinđe pe ko jekhe phralesi farma ko Zimbabve. Odova phral ćerđa lenđe odothe ćhera hem kancelarije. Ađahar šaj hine te ćerel pe i važno buti – te prevodini pe amari literatura.

Svako berš organizujinđam o pokrajinska nadglednikija kola služinđe ko Malavi te aven ko Zimbabve. Đi hine othe, on dobinđe o predloškija aso govorija. Ked irinđe po ko Malavi, koristinđe odola predloškija te ićeren govorija te šaj te ohrabrinen e phraljen hem e phenjen ko razna skupštine. Jekh berš, aso odola phralja organizujinđam o Seminar aso naimenujime phralja te šaj pana pobuter te ohrabrina len.

Ko februar ko 1975. berš, đeljum ko Mozambik te posetinav e phraljen kola alje kotar Malavi. Odola phralja ićerđe pe ko sa o uputstvija kola dobinđe andi Jehovasi organizacija, čak hem ko odova te ovel len starešinstvo. O neve starešine organizujinđe but buća aso phralja hem phenja. Na primer, organizujinđe te ovel len predavanja, te čitinen e diveso citati, te razmotrinen i Stražarsko kula, čak hine len hem pokrajinska sastankija. Olenge kampija kuri živinđe hine organizujime sar kongresija. Hine len odeljenje aso čistibe, asi hrana hem asi bezbednost. Odola verna phralja šaj hine te ćeren but buća sose o Jehova pomožinđa len. Ked aljum ćhere hijum le but ohrabrimo.

Ko krajo ando 1970-ta berša, i podružnica andi Zambija počminđa te brinini pe aso Malavi. Ama, me pana razmislinđum ando me phralja kotar Malavi hem molinđum man olenđe, a odova ćerđe hem avera phralja. Nekobor putija, me sar član ando Odbor kotar podružnica Zimbabve hem avera odgovorna phralja kotar Malavi, Južno Amerika hem Zambija, vaćerđam e phralencar ando glavno sedište. Svako puti vaćerđam odolestar so šaj te ćera te šaj pana pobuter te pomožina e phralenđe hem e phenjenđe ko Malavi.

Sar đelo o vreme, više na hine odobor baro progonstvo. O phralja hem o phenja kola našlje ando Malavi, hari pohari irinđe pe ćhere. A okola kola aćhilje ko Malavi, više na mučinđe pe odobor, sose o progonstvo na hine sar angleder. Disave phuvja uzo Malavi zakonski priznajinđe e Svedokon hem on šaj hine slobodno te đan ki služba hem te ćeden pe. Ko 1991. berš, odova ćerđa hem i phuv Mozambik. Ama, pana pućljam amen ked e Jehovase svedokija ko Malavi ka oven slobodna.

IRINAJA AMEN KO MALAVI

I političko situacija ko Malavi menjinđa pe hem e Jehovase svedokija kotar 1993. berš više na hine zabranime. Sigate palo odova, jekh misionari pućlja man: „Da li bi irineja tut ko Malavi?“ Tegani hine man 59 berš hem odolese phenđum lese: „Me hijum phuro aso odova.“ Ama, odova isto dive reslja amenđe poruka ando Vodeće telo hem on zamolinđe amen te irina amen ko Malavi.

Amen mangljam amaro zadatko kova hine amen ko Zimbabve hem odolese na hine amenđe lokho te odlučina so te ćera. But berš hijam le othe hem but buća nakhljam hem hine amen but amala. O Vodeće telo phenđa amenđe so šaj te aćhova ko Zimbabve ako amen odova mangaja. Odolese, lokho šaj hine te odlučina te aćhova odothe. Ama, razmislinđum ando Avraham hem andi Sara kola ko phure berša mukhlje po ćher sose manglje te šunen e Jehova (Post. 12:1-5).

Amen odlučinđam te prihvatina o zadatko kova dinđa amen e Jehovasi organizacija hem ko 1. februar ko 1995. berš irinđam amen ko Malavi, tačno palo 28 berš ked prvo puti aljam akate. Osnujinđa pe o Odbor andi podružnica ko kova hine duj phralja hem me. Sigate palem počminđam te organizujina o aktivnostija ando Jehovase svedokija ki odija phuv.

O JEHOVA DELA TE BARJOL

But šukar hine te dikha sar o Jehova blagoslovini o delo ko Malavi. O broj ando objaviteljija but barilo. Ko 1993. berš hine 30 000 objaviteljija, a ko 1998. berš hine prekalo 42 000 objaviteljija.b O Vodeće telo odobrinđa te gradinen pe neve objektija andi podružnica. Ko Lilongve ćinđam 12 hektarija phuv, a me dobinđum nevo zaduženje te ćerav ko Odbor asi gradnja.

Ko maj ko 2001. berš, o phral Gaj Pirs ando Vodeće telo ićerđa o govor aso posvećenje aso odola neve objektija. Prekalo duj hiljade phralja hem phenja andi odija phuv alje te šunen odova govor. But olendar hine krstime pobuter ando 40 berš. Akala verna phralja hem phenja but berš istrajinđe ko progonstvo. Akana hine len prilika te phiren ko poklo nevo Betel. Kuri god phirđe, đilabđe amare đilja ko afričko stil. Odova niked na ka šaj te bistrav! Akava tano dokaz so o Jehova blagoslovini okolen kola verno istrajinena ko pharipa.

Palo odova so o objektija andi podružnica hine završime, počminđe te gradinen pe but dvorane ko Malavi. Hijum le but bahtalo so hine man odgovornost te ićerav o govor aso posvećenje ko odola dvorane. O phralja na hine len but pare, odolese o program aso odova sigate te gradinen pe o dvorane but pomožinđa amenđe. Angleder, disave phralja hem phenja ćedinđe pe ko tikne thana kola hine ćerde ando kaš eukaliptus. Olengo krov hine ućhardo trskaja, a o manuša kola alje ko sastankija bešlje ko klupe. Akana hine bahtale so šaj hine te peken o cigle ando kola gradinđe o dvorane. Ama, čak hem ko neve dvorane o phralja manglje te koristinen klupe, a na stolice odolese so ko klupe uvek šaj te ćerel pe than pana jekhe manušese.

But oduševinđum man ked dikhljum sar o Jehova pomožini e phralenđe hem e phenjenđe te oven sa pozrela. Naročito oduševinđe man o terne andi Afrika sose ćhivđe pe ko raspolaganje te pomožinen hem sigate sikljilje but buća andi obuka koja dobinđe kotar Jehovasi organizacija. Sebepi odova, on šaj hine te dobinen pana pobare odgovornostija ko Betel hem ko skupštine. E phraljen hem e phenjen but zorjaćerđe o phralja kola hine naimenujime te služinen ki pokrajinsko služba. Disave olendar hine ženime. Iako o manuša hem i familija očekujinđe olendar te ovel len ćhave, on ipak odlučinđe te na ovel len sose manglje pana pobuter te služinen e Jehovase.

HIJUM ZADOVOLJNO ODOLEJA SAVO ŽIVOTI BIRINĐUM

Palo odova so 52 berš hijam le ki Afrika, me naborsaljum. O Vodeće telo phenđa amenđe so šaj te đa ko Betel ki Britanija. Amen hijam le but tužna so morandiljam te aćhava amaro zadatko, ama o phralja hem o phenja ko Betel ki Britanija but šukar brininena pe amendar ko amare phure berša.

Uverimo hijum so anđum najšukar odluka ko mo životi, sose mukhljum e Jehova te mothovi maje kole drumoja te đav. Ked bi ćerava odova so me mislinđum soj šukar, mo životi bi ovela averćhane. O Jehova uvek đanđa so valjani maje hem ov uvek „ispravini me staze“ (Posl. 3:5, 6). Sar terno, hijum le oduševimo ked sikljiljum sar jekh bari kompanija ćerela buti. Ama, odova sar e Jehovasi organizacija ćerela buti pana pobuter oduševinđa man. Ako man pućena, me bi phenava so nane ništa pošukar nego te služini pe e Jehovase celo životi.