Pućiba ando čitaocija
So o Isus mislinđa ked phenđa: „Ma mislinen so aljum te anav mir“?
O Isus sikavđa e manušen te oven ko mir jekh jekheja. Ama, jekh puti phenđa pe apostolenđe: „Ma mislinen so aljum te anav mir ki phuv. Na aljum te anav mir, nego mač. Aljum te odvojinav e manuše ando oleso dad hem e ćhaja andi olaki daj hem e borja andi olaki sasuj“ (Mat. 10:34, 35). So o Isus mislinđa akale lafencar?
O Isus na manglja te ulavi e porodica, ama đanđa so ako neko prihvatini o ćaćipe odova šaj te ćerel nemir ki porodica. Odolese, ked neko mangela te ovel e Isuseso učeniko hem te krstini pe, valjani te ovel svesno so olesi porodica šaj na ka ovel bahtali sebepi olesi odluka. Podijekh puti, olenđe šaj te protivini pe olengo bračno drug ili neko aver andi porodica, tegani šaj te ovel lenđe pharo te primeninen o savetija andi Biblija.
Ki Biblija pisini so o hrišćanija valjani te den sa pestar te „oven ko mir sa e manušencar“ (Rimlj. 12:18). Ama, i istina šaj te ovel sar „mač“ ko disave porodice. Odova šaj te ovel ked neko andi porodica prihvatini o ćaćipe, a avera na mangena te prihvatinen. Tegani odola članija andi porodica ovena „neprijateljija“ okolenđe kola prihvatinena o ćaćipe (Mat. 10:36).
O phralja hem o phenja kasi porodica na služini e Jehovase podijekh puti valjani te odlučinen kas ka radujinen pe odlukencar, e Jehova hem e Isuse ili pe porodica. Na primer, šaj olengi porodica te terini len te slavinen dijekh religiozno prazniko. Tegani, on ka valjani te odlučinen kas mangena te radujinen pe odlukaja. O Isus phenđa: „Ko mangela pe dade ja pe daja pobuter mandar, ov na zaslužini te ovel mo učeniko“ (Mat. 10:37). Naravno, o Isus na mislinđa so okola kola prihvatinđe o ćaćipe na valjani te mangen više pe roditeljen. Ama, ov manglja te sikavi len kola tane o najvažna buća ko životi. Iako šaj amari porodica protivini pe amenđe, amen hem ponodri mangaja len, ama e Jehova mangaja pobuter!
Ako amari porodica protivini pe amenđe, odova šaj but te dukhal amen. Ama, e Isusese učenikija na valjani te bistren akala lafija: „Ko na prihvatini po mučeničko stubo hem na đala palo mande, ov na zaslužini te ovel mo učeniko“ (Mat. 10:38). Avere lafencar, o hrišćanija ko protivljenje andi pi porodica dikhena sar deo ando pharipa kola sar e Isusese učenikija valjani spremno te prihvatinen. Ama, on na našalena pi nada so sebepi olengo šukar ponašanje, olengi porodica jekh dive šaj ka menjini po stav hem ka mangel te sikljol o ćaćipe (1. Petr. 3:1, 2).