O Petar phenđa so na penđari e Isuse

Ki poslednjo večera, o Isus phenđa e apostolenđe: „Akija rat sare tumen ka našen hem ka aćhaven man kokri.“ Ama, o Petar phenđa: „Me sigurno na ka aćhavav tut! Čak hem sa avera te aćhaven tut, me niked na ka ćerav odova.“ Ama, o Isus phenđa lese: „Angleder te đilabi o bašno, tu trin putija ka phene so na penđareja man.“

Ked o vojnikija igarđe e Isuse ko Kajafaso ćher, but apostolija našlje. Ama, duj olendar ipak đelje odole manušencar. Jekh olendar hine o Petar. Ov đelo ko Kajafaso ćher te dikhel so ka ovel e Isuseja. Đi taćilo uzi jag, jekh sluškinja dikhlja le hem phenđa: „Đanava tut! Tu hijan le e Isuseja!“

O Petar odgovorinđa: „Nane ađahar! Na đanava sostar vaćereja!“ Palo odova, đelo ko aver than. Ama, jekh aver sluškinja phenđa e manušenđe: „Akava manuš hine e Isuseja!“ O Petar phenđa: „Me na penđarava e Isuse!“ Tegani, jekh manuš phenđa: „Hem tu hijan le olencar! Ando odova sar vaćereja dićhola so hijan andi Galileja, sar o Isus.“ Ama, o Petar palem phenđa: „Ćaće phenava tumenđe, na penđarava le!“

Ko odova trenutko o bašno đilabđa. O Isus irinđa pe hem dikhlja le ko jaćha. Tegani o Petar setinđa pe ko Isusese lafija, ikljilo avri hem but runđa.

Ko isto vreme, ko Kajafaso ćher ćedinđe pe o članija ando Sinedrion, o jevrejsko sud. On hine rešime te mudaren e Isuse, ama valjanđe te arakhen diso te bi optužinena le. Ama, on naštine te arakhen ništa protiv oleste. Ko krajo, o Kajafa pućlja le: „Da li hijan e Devleso Ćhavo?“ O Isus odgovorinđa lese: „Ja.“ O Kajafa phenđa: „Na valjanena amenđe avera dokazija. Kokri šunđen, uvredinđa e Devle!“ O članija ando sudo složinđe pe odoleja hem phenđe: „Akava manuš mora te merel.“ On počminđe te khuven le šamarke hem te ćhungaren le. Na samo odova, on phanlje lese jaćha, khuvđe le hem phenđe: „Ako ćaće hijan proroko, phen amenđe ko khuvđa tut!“

Ked phravdilo o dive, e Isuse igarđe ki dvorana Sinedrion hem palem pućlje le: „Da li hijan e Devleso Ćhavo?“ O Isus phenđa lenđe: „Tumen kokri phenena so hijum.“ On phenđe soj tano krivo sose uvredinđa e Devle hem igarđe le ko rimsko upravitelj ko Pontije Pilat. So ulo palo odova? Hajde te dikha.