Astarđe e Isuse

O Isus hem o apostolija nakhlje andi dolina Kedron hem đelje ki Maslinsko gora. Nakhlja ekvaš i rat, hem ko nebo o mesec hine pherdo. Ked reslje ko getsimansko vrt, o Isus phenđa lenđe: „Oven akate hem ma soven.“ Palo odova, đelo hari podur ko vrt hem bešlja ko koćija. Hine lese but pharo hem phenđa e Jehovase: „Nek ovel sar so tu mangeja.“ Tegani, o Jehova bićhalđa jekhe anđele te ohrabrini le. Ked o Isus irinđa pe ko apostolija, dikhlja len sar sovena. Ov phenđa: „Ušten! Akana nane vreme te soven! Pana hari ka aven me dušmanija.“

Sigate palo odova alo o Juda hem oleja hine but manuša kola hine len mačija hem kašta. O Juda đanđa soj tano o Isus odothe sose ov hem avera apostolija but putija alje oleja ko odova vrt. O Juda phenđa e vojnikonenđe so ov ka mothovi lenđe koj tano o Isus. Odolese, đelo koro leste hem phenđa: „Zdravo, Učitelju“, hem palo odova ćumudinđa le. O Isus phenđa lese: „Judo, da li ćumudinđan man te bi astarena man?“

O Isus ikljilo anglo sa odola manuša hem pućlja len: „Kas rodena?“ On odgovorinđe: „E Isuse ando Nazaret.“ Tegani o Isus phenđa: „Me hijum odova.“ Tegani o manuša cidinđe pe napalal hem pelje tele. O Isus palem pućlja len: „Kas rodena?“ On odgovorinđe isto lafencar: „E Isuse ando Nazaret.“ Tegani phenđa lenđe: „Phenđum tumenđe so me hijum odova. Mukhen akale manušen te đan.“

Ked o Petar haljilo so desini pe, ikalđa o mač hem ćhinđa o kan ando prvosveštenikoso robo. Ama, o Isus pipinđa oleso kan hem saćarđa le. Palo odova, phenđa e Petarese: „Mukh o mač. Ako borineja tut mačeja, ando mač ka mere.“ O vojnikija astarđe e Isuse hem phanlje lese vasta, a o apostolija našlje. Palo odova, o manuša igarđe e Isuse ko glavno svešteniko, ko Ana. O Ana ispitinđa le hem bićhalđa le ko prvosveštenikoso ćher, ko Kajafa. Ama, so ulo e apostolencar?