E Isusesi poslednjo večera

O Jevreja svako berš slavinđe i Pasha ko 14. dive ando masek nisan. Odova ćerđe te setinen pe so o Jehova oslobodinđa len ando ropstvo ko Egipat hem igarđa len ki Obećimi phuv. Ko 33. berš, o Isus hem olese apostolija slavinđe i Pasha ki jekh soba ko Jerusalim. Ko krajo andi večera, o Isus phenđa: „Jekh tumendar ka izdajini man.“ O apostolija but iznenadinđe pe hem pućlje le: „A ko ka ovel odova?“ O Isus odgovorinđa lenđe: „Okova kase ka dav akava maro.“ Tegani dinđa o maro e Judase, kova hine penđardo sar Juda Iskariotski. Odmah palo odova, o Juda uštilo hem đelo.

Palo odova, o Isus molinđa pe, phaglja o maro hem dinđa le e apostolenđe kola aćhilje. Ov phenđa lenđe: „Han akava maro. Ov predstavini mo telo kova ka dav tumenđe.“ Palo odova, lelja o vino, molinđa pe hem dinđa le e apostolenđe. O Isus phenđa lenđe: „Pijen akava vino. Odova predstavini mo rat kova ka dav te šaj te oven oprostime e manušenge grehija. Obećinava tumenđe so ka oven kraljija mancar ko nebo. Ćeren akava svako berš te šaj te setinen tumen koro mande.“ E Isusese sledbenikija hem avdije ćedena pe ko odova dive. Odija proslava akana vićini pe i Spomen-svečanost.

Ked završinđa pe i večera, o apostolija počminđe te svađinen pe koj tano najvažno hem najšukar maškaro lende. Ama, o Isus phenđa lenđe: „Najbaro tumendar tano okova kova na vazdela pe hem kova na mislini soj tano pošukar averendar.“

„Tumen hijen me amala. Vaćerava tumenđe sa so mo Dad mangela te phenav tumenđe. Pana hari ka đav ko mo Dad ko nebo. Tumen ka aćhoven hem o manuša ka đanen so hijen me učenikija ked ka dikhen so mangena jekh jekhe. Valjani te mangen jekh jekhe sar so me mangljum tumen.“

Ko krajo, o Isus molinđa pe hem rodinđa ando Jehova te arakhi sa olese učenikonen. Ov molinđa e Jehova te pomožini len te slažinen pe šukar hem te ćeren o buća ko mir. Isto ađahar, molinđa pe te posvetini pe e Devleso anav. Palo odova, o Isus hem o apostolija đilabđe đilja kolencar hvalinđe e Jehova hem sare ikljilje avri. Alo o vreme te astaren e Isuse.