O Isus parvari bute manušen

Hari angleder i Pasha ko 32. berš, o apostolija irinđe pe ando propovedibe. O Isus dikhlja soj tane umorna, ukljilo olencar ko čamco hem zajedno pođinđe ki Vitsaida te šaj te odmorinen pe. Ama, ked reslje đi i obala, o Isus dikhlja so but manuša alje odothe hem ađićerena le. Iako manglja te ovel kokri e apostolencar, ov hine ljubazno e manušencar. Saćarđa sarinen so hine naborme hem počminđa te sikavi len. Celo dive sikavđa len ando Devleso Kraljevstvo. Angleder te raćol, o apostolija alje ko Isus hem phenđe lese: „O manuša tane sigurno bokhale. Bićhal len te đan te ćinen pese diso hajbase.“

O Isus phenđa: „Na valjani te đan. Den len diso akate te han.“ O apostolija pućlje le: „Mangeja te đa hem te ćina lenđe maro?“ O Filip, jekh ando apostolija, phenđa: „Ama, čak hem te ovel amen but pare, palem našti te ćina dovoljno maro sarinenđe.“

O Isus pućlja len: „So isi amen?“ O Andrija phenđa: „Isi amen panđ mare hem duj tikne maćhe. Ama, odova nane dovoljno sa akale manušenđe.“ O Isus phenđa: „Anen maje odola mare hem o maćhe.“ Palo odova, phenđa e manušenđe te bešen ki ćar ko grupe po 50 hem po 100 đene. O Isus lelja o mare hem o maćhe, dikhlja ko nebo hem molinđa pe. Palo odova, dinđa odova e apostolenđe, a on delinđe e manušenđe. O 5 000 murša hem sa o đuvlja hem o ćhave halje sa đi na ćaljilje. Ko krajo, o apostolija ćedinđe sa so aćhilo, te na fordel pe ništa, hem pherđe 12 korpe hajbaja. Odova ćaće hine baro čudo!

O manuša hine odobor oduševime so manglje te ćhiven e Isuse te ovel kralj. Ama, o Isus đanđa so pana na alo o vreme kova o Jehova odredinđa te ovel kralj. Odolese, phenđa e manušenđe te đan pese, a e apostolen bićhalđa te đan ki aver strana ando Galilejsko more. Ked o apostolija ukljinđe ko čamco, o Isus kokri đelo ki planina. Sose? Odolese so manglja te odvojini vreme te molini pe pe Dadese. Iako hine le but buti, o Isus uvek odvojinđa vreme te molini pe.