O Isus phirela upro pani

O Isus šaj hine te saćari e nabormen hem te uskrsnini e mulen, ama isto ađahar šaj hine te kontrolišini i bavlal hem o boršim. Ked završinđa pi molitva ki planina, o Isus dikhlja so ko Galilejsko more tani bari oluja. Olese apostolija hine ko čamco hem borinđe pe protiv i bavlal. O Isus huljilo tele hem počminđa te phirel upro pani premalo čamco. Ked o apostolija dikhlje so neko phirela upro pani, but darandilje. Ama, o Isus phenđa lenđe: „Ma daran, me hijum!“

O Petar phenđa lese: „Gospode, ako ćaće hijan tu, phen maje te avav koro tute.“ O Isus phenđa lese: „Ava koro mande!“ Ađahar, ki odija oluja, o Petar ikljilo ando čamco hem počminđa te phirel upro pani hem te đal premalo Isus. Ama, ked alo paše uzo leste, dikhlja so i oluja tani but bari hem darandilo. Ando jekh puti počminđa te batini ko pani. Tegani phenđa: „Gospode, spasin man!“ O Isus dolinđa le kotar vas hem phenđa lese: „Sose darandiljan? Nane tut li vera?“

O Isus hem o Petar ukljinđe ko čamco hem i oluja odmah terdilji. Šaj li te zamisline sar osetinđe pe o apostolija? On phenđe e Isusese: „Tu hijan ćaće e Devleso Ćhavo.“

Akava na hine prvo puti o Isus te mothovi so isi le moć upro prirodna sile. Jekh puti, ked o Isus hem o apostolija đelje e čamcoja ki aver strana ando more, ole lelja o sojbe ko čamco. Đi ov suća, kotar jekh puti ulji bari oluja. O talasija khuvena hine ko čamco, hem ov pherdilo panjeja. O apostolija vazdinđe e Isuse ando sojbe hem phenđe lese: „Učitelju, ka mera! Pomožin amenđe!“ O Isus uštilo hem phenđa e morese: „Smirin tut!“ Ko odova trenutko, i bavlal hem o more smirinđe pe. O Isus pućlja e apostolen: „Kaj tani tumari vera?“ On tegani phenđe jekh jekhese: „Čak i bavlal hem o more šunena le.“ O apostolija haljilje so ako isi len baro poverenje ko Isus, tegani na valjani nisostar te daran.