Ništa naštine te ćhinavi len

Jekh manuš kova naštine te phirel bešlja ki hramsko kapija. Svako dive odothe manglja pare. Jekh dive, ov dikhlja e Petare hem e Jovane sar đana ko hram. Ov phenđa lenđe: „Molinava tumen, den man diso.“ O Petar phenđa: „Šaj te dav tut diso soj tano pošukar ando pare. Ko Isuseso anav, ušti hem phir!“ O Petar pomožinđa le te uštel hem o manuš počminđa te phirel! But manuša hine oduševime hem počminđe te verujinen ko Isus.

Ama, o sveštenikija hem o sadukeja hine but holjame. On astarđe e apostolen, igarđe len anglo sudo hem pućlje len: „Ko dinđa tumen moć te saćaren akale manuše?“ O Petar phenđa: „Odija moć dinđa amen o Isus kas tumen mudarđen.“ O religiozna vođe počminđe te pištinen: „Ma vaćeren više ando Isus!“ Ama, o apostolija phenđe: „Amen našti, a te na vaćera olestar.“

Ked mukhlje e Petare hem e Jovane, on odmah đelje ko avera učenikija hem phenđe lenđe so ulo. Odolese, on sare molinđe pe e Jehovase hem phenđe lese: „Molinaja tut, pomožin amenđe te ova hrabra te šaj hem ponodri te ćera i buti koja dinđan amen.“ O Jehova šunđa olengi molitva hem dinđa len po sveti duh kova pomožinđa len te nastavinen te propovedinen hem te saćaren e manušen. Sa pobuter hem pobuter manuša ulje e Isusese učenikija. O sadukeja odobor hine holjame so astarđe e apostolen hem fordinđe len ko phanlipe. Ama, o Jehova raćate bićhalđa jekhe anđele, kova phravđa o udara ando phanlipe hem phenđa e apostolenđe: „Đan ko hram hem odothe sikaven e manušen.“

Tajsato dive, sabale, o vojnikija alje ko Sinedrion, ko sudo, hem phenđe: „O udara tane phanlje, a o manuša kola hine ko phanlipe, akana nane odothe! On tane ko hram, hem sikavena e manušen!“ O apostolija palem hine astarde hem legarde anglo sudo. O prvosveštenik phenđa: „Amen phenđam tumenđe te na vaćeren ando Isus!“ Ama, o Petar phenđa: „Amen valjani te šuna e Devle, a na e manušen.“

O religiozna vođe hine odobor holjame so manglje te mudaren e apostolen. Ama, jekh farisej kova vićinđa pe Gamalilo uštinđa hem phenđa: „Arakhen tumen! Šaj tano o Devel akale manušencar. Da li ćaće mangena te borinen tumen protiv o Devel?“ On šunđe oleso savet. Ama, angleder te mukhen len, on zapovedinđe lenđe te na propovedinen hem marđe len bičeja. Ama, iako doživinđe sa odova, o apostolija nastavinđe hrabro te propovedinen. On propovedinđe i šukar vest hem ko hram hem kotar ćher ko ćher.