O učenikija dobinena o sveti duh

Deš dive palo odova so o Isus irinđa pe ko nebo, olese učenikija dobinđe o sveti duh. Odova ulo ki Pedesetnica 33. berš. Odova dive o manuša kotar na alje ko praznik, ko Jerusalim. Ko jekh ćher ćedinđe pe oko 120 e Isusese učenikija. Kotar jekhvar ulo diso so na očekujinđe. Upro olenge šere pojavinđa pe diso so izgledinđa sar jag hem on počminđe te vaćeren but ćhibja. Ki soba šundilo zoralo zvuko andi bavlal.

O manuša kola alje kotar avera phuvja ko Jerusalim šunđe so kotar odova ćher avela disavo zvuko hem odmah prastandilje te dikhen so ulo. But iznenadinđe pe ked šunđe so o učenikija vaćerena olenge ćhibja. On phenđe: „Akala manuša tane andi Galileja. Sar akana on vaćerena razna ćhibja?“

Palo odova, o Petar hem avera apostolija ikljilje anglo manuša. O Petar vaćerđa e manušenđe sar o Isus hine mudardo hem sar o Jehova vazdinđa le kotar mule. Ov phenđa lenđe: „Akana, o Isus tano ko nebo, ki desno strana e Devlese, hem ov dinđa amen o sveti duh kova obećinđa amenđe. Odolese tumen šunđen hem dikhljen sa akala čudija.“

O lafija kola o Petar vaćerđa e manušenđe pogodinđe len ko vilo hem odolese pućlje le: „So valjani amen te ćera?“ O Petar phenđa lenđe: „Pokajinen tumen hem krstinen tumen ko Isuseso anav. Tegani hem tumen ka dobinen o sveti duh.“ Odova dive, krstinđe pe oko 3 000 manuša. Kotar odova dive, ko Jerusalim hine sa pobuter hem pobuter učenikija. O sveti duh pomožinđa len te organizujinen e učenikonen ko grupe, kola vićinđe pe skupštine. Ađahar šaj hine polokho te sikaven len sa odova so o Isus manglja te đanen.