O Kornelije dobini sveti duh

Ki Cezareja hine jekh rimsko vojno zapovedniko kova vićinđa pe Kornelije. Iako ov na hine Jevrejin, o Jevreja but poštujinđe le. Ov hine phravde vasteso manuš hem but pomožinđa e ćororenđe hem okolenđe kola hine ko pharipa. O Kornelije verujinđa ko Jehova hem redovno molinđa pe lese. Jekh dive, o anđeo pojavinđa pe lese hem phenđa: „O Devel šunđa te molitve. Akana bićhal e manušen ki diz Jopa, kuri tano o Petar hem vićin le te avel koro tute.“ O Kornelije odmah bićhalđa trine manušen ki Jopa, koja hine dur okolo 50 km južno andi Cezareja.

Ko isto vreme, ki Jopa, o Petar hine le jekh vizija. Ov dikhlja e životinjen kola premalo Zakoni e Jevrejenđe na hine dozvolimo te han. O glaso ki vizija phenđa lese te hal odola životinje. Ama, o Petar na manglja. Ov phenđa: „Me niked ko mo životi na haljum odola nečista životinje.“ Ama, o glaso palem phenđa lese: „Ma vaćer soj tane odola životinje nečista sose o Devel ćerđa te oven čista.“ Đi o Petar razmislinđa andi vizija, hine lese vaćerdo: „Trin manuša tane anglo udar. Đa olencar.“ O Petar đelo đi o udara hem pućlja e manušen sose alje. On phenđe lese: „Amen bićhalđa o Kornelije, o rimsko vojno zapovedniko. Ov vićini tut te ave koro leste ki Cezareja.“ O Petar vićinđa odole manušen te oven olese gostija hem te raćeren odothe. Tajsato dive, ov hem disave phralja andi Jopa đelje olencar ki Cezareja.

Ked o Kornelije dikhlja e Petare, ov pelo ko koćija. Ama, o Petar vazdinđa le hem phenđa: „Ušti! Me hijum samo jekh obično manuš sar tute. O Devel phenđa maje te avav koro tute, iako o Jevreja na družinena pe okolencar so nane Jevreja. Akana, molinava tut, vaćer maje sose bićhalđan e manušen palo mande.“

O Kornelije phenđa e Petarese: „Angleder štar dive đi molinđum man e Jehovase, alo jekh anđeo hem phenđa maje te bićhalav e manušen palo tute. Molinava tut, sikav amen ando Jehova.“ O Petar phenđa: „Akana đanava so o Devel na dikhela koj tano ko. Ov prihvatini svakone ko mangela te služini lese.“ O Petar sikavđa len but buća ando Isus. Palo odova, o sveti duh hine dindo e Kornelijese hem okolenđe kola hine odothe oleja hem sare krstinđe pe.