O manuša ando but nacije ulje hrišćanija

O apostolija šunđe e Isusesi zapovest te propovedinen i šukar vest ki celo phuv. Ko 47. berš, o phralja andi Antiohija bićhalđe e Pavle hem e Varnava te propovedinen ko razna thana. Akala duj revna propovednikija putujinđe ki celo Mala Azija hem hine ko thana sar soj tane i Derva, i Listra hem i Ikonija.

O Pavle hem o Varnava propovedinđe sarinenđe, bizi razlika da li hine barvale ja ćorore, terne ja phure. But manuša prihvatinđe o ćaćipe ando Isus. Ked o Pavle hem o Varnava propovedinđe e upraviteljese ando Kipar, kova vićinđa pe Sergej Pavle, jekh vračari manglja te ćhinavi len. O Pavle phenđa e vračarese: „O Jehova ka kaznini tut.“ Ko odova trenutko, o vračari ulo kororo. Ked o Sergej Pavle dikhlja odova, počminđa te verujini ko Devel.

O Pavle hem o Varnava propovedinđe svugde, kotar ćher ko ćher, ko pazarija, ko drumija hem ko sinagoge. Ked ki Listra saćarđe jekhe manuše kova naštine te phirel, okola so dikhlje odova mislinđe soj tane devela hem manglje te služinen lenđe. Ama, o Pavle hem o Varnava na mukhlje len te ćeren odova hem phenđe lenđe: „Služinen samo e Devlese! Amen hijam samo manuša sar tumen.“ Tegani alje disave Jevreja hem ćhivđe e manušen te oven protiv o Pavle. Odolese o manuša fordinđe bara upro leste, vucinđe le avri andi diz hem mukhlje le sose mislinđe so mulo. Ama, o Pavle hine đivdo. O phralja odmah alje te pomožinen le hem igarđe le ki diz. Palo odova, o Pavle irinđa pe ki Antiohija.

O Pavle ko 49. berš đelo ko po dujto putovanje. Ked irinđa pe andi Mala Azija, propovedinđa pana podur, čak đi i Evropa. Ov đelo ki Atina, ko Efes, ko Filipi, ko Solun hem ko avera thana. Ko akava putovanje e Pavleja đelje o Sila, o Luka hem jekh terno ćhavo kova vićinđa pe Timotej. On ćerđe neve skupštine hem pomožinđe e phralenđe te aćhon zorale. O Pavle aćhilo ko Korint jekh tekvaš berš hem ohrabrinđa e phralen. Ov propovedinđa, sikavđa hem pisinđa lila aso nekobor skupštine. Ama te bi ovela le sostar te živini, ov ćerđa šatorija. Palo disavo vreme, o Pavle irinđa pe ki Antiohija.

Palo odova, ko 52. berš, o Pavle đelo ko po trito putovanje, hem počminđa andi Mala Azija. Putujinđa ko sever sa đi ko Filipi, hem palo odova huljilo tele ko Korint. O Pavle aćhilo nekobor berš ko Efes hem odothe sikavđa e manušen, saćarđa len hem pomožinđa e phralenđe. Svako dive ićerđa govorija ki jekh škola. But manuša šunđe le hem meninđe pe. Ko krajo, palo odova so propovedinđa i šukar vest ko but phuvja, đelo ko Jerusalim.