99. PRIČA
O zatvorsko čuvari ulo hrišćanin
Ko Filipi živinđa jekh sluškinja hem ano late hine demoni. Odolese oj šaj hine te vaćeri i budućnost hem ađahar anđa but pare pe gospodarenđe. Ked o Pavle hem o Sila alje ko Filipi, oj but dive đelji palo lende. O demoni terinđa la te vićini: „Akala manuša služinena e Najbare Devlese!“ Ko krajo, o Pavle phenđa e demonese: „Ko Isuseso anav, zapovedinava tuće, ikljov olatar!“ O demoni odmah ikljilo andi ćhaj.
Ked e ćhajake gospodarija haljilje so oj našti više te anel lenđe pare sar angleder, hine but holjame. Igarđe e Pavle hem e Sila ko dizjake upraviteljija hem phenđe: „Akala manuša na ićerena pe ko zakoni hem uznemirinena celo diz!“ O upraviteljija naredinđe o Pavle hem o Sila te oven marde hem te ćhiven len ko phanlipe. O zatvorsko čuvari igarđa len ko najtamno deo ko phanlipe hem ćhivđa lenđe okovija.
O Pavle hem o Sila đilabđe đilja te hvalinen e Jehova, a avera zatvorenikija šunđe len. Ando jekh puti, ki ekvaš i rat hine baro zemljotres hem celo odova than tresinđa. Sa o udara phravdilje, a o okovija ando zatvorenikija pelje. O zatvorsko čuvari prastandilo hem dikhlja so o udara hine phravde. Ov mislinđa so sa o zatvorenikija našlje hem odolese lelja o mač te mudari pe.
Ama, tegani o Pavle phenđa lese: „Ma ćer odova! Sarine hijam akate!“ O čuvari prastandilo andre hem pelo ko koćija anglo Pavle hem o Sila. Tegani pućlja len: „So valjani te ćerav te šaj te ovav spasimo?“ On odgovorinđe lese: „Tu hem ti porodica valjani te verujinen ko Isus.“ O Pavle hem o Sila sikavđe e čuvare hem olese porodica ando Jehova, hem sarine krstinđe pe.
„A angleder sa akava, ka progoninen tumen hem ka astaren tumen, ka predajinen tumen ko sinagoge hem ko phanlipa. Ka igaren tumen anglo kraljija hem namesnikija sebepi mo anav. Odova ka ovel tumenđe prilika te svedočinen“ (Luka 21:12, 13)