100. PRIČA
O Pavle hem o Timotej
O Timotej hine jekh terno phral ki skupština Listra. Oleso dad hine Grko, a olesi daj hine Jevrejka. Olesi daj, i Evnikija, hem olesi baba, i Loida, ando tiknipe sikavđe le ando Jehova.
O Pavle hine ko dujto misionarsko putovanje ked posetinđa i Listra. Tegani dikhlja so o Timotej but manglja e phralen hem e phenjen hem so but trudinđa pe te pomožini len. Odolese, ov vićinđa e Timoteje te pođini oleja. O Pavle sikavđa le sar te propovedini hem sar te sikavi e manušen andi šukar vest.
Kuri god đelje, o sveti duh pomožinđa e Pavlese hem e Timotejese. Jekh rat ki vizija, jekh manuš phenđa e Pavlese te avel ki Makedonija te pomožini len. Odolese o Pavle, o Timotej, o Sila hem o Luka đelje uduri te propovedinen hem te ćeren neve skupštine.
Ko Solun, kova hine deo andi Makedonija, but murša hem đuvlja ulje hrišćanija. Ama, disave Jevreja hine ljubomorna upro Pavle hem upro okola kola hine oleja. On ćedinđe e nasilno manušen, igarđe len anglo dizjake vladarija hem pištinđe: „Akala manuša tane protiv i rimsko vlast!“ O Pavle hem o Timotej hine ki opasnost hem odolese prekali rat našlje ki Verija.
O Grkija hem o Jevreja kola živinđe ki Verija manglje te sikljon andi šukar vest hem ulje e Isusese učenikija. Ama, disave Jevreja alje ando Solun hem počminđe te ćeren problemija. Odolese, o Pavle đelo ki Atina. O Timotej hem o Sila aćhilje ki Verija te šaj te zorjaćeren e phralen. O Pavle bićhalđa e Timoteje te irini pe ko Solun te zorjaćeri e phralen kola hine progonime. Palo odova, o Pavle bićhalđa e Timoteje ko avera skupštine te pomožini e phralenđe hem te zorjaćeri len.
O Pavle phenđa e Timotejese: „Sa okola kola mangena te služinen e Jehovase ka oven progonime.“ O Timotej hine progonimo hem phanlo sebepi odova ko so verujinđa. Ama, ov hine bahtalo so šaj hine hem ko asavke situacije te mothovi kobor tano verno e Jehovase.
O Pavle phenđa e phralenđe ko Filipi: „Bićhalava tumenđe e Timoteje. Ov ka sikavi tumen sar jekh e Devleso sluga valjani te živini hem sar te propovedinen.“ O Pavle hine sigurno so ked dela disavi buti e Timotejese, odova ka ovel ćerdo. O Pavle hem o Timotej hine but šukar amala hem beršencar zajedno služinđe e Jehovase.
„Nane man nikas aver kova razmislini sar oleste, kova bi ćaće brinini pe tumenđe. Sose sare brininena pe samo pese, a na kotar odova so mangela o Isus Hrist“ (Filipljanima 2:20, 21)