Ked više nane tut volja te živine
DA LI iked hine tuće odobor pharo so više na mangljan te živine? Ako ja, tegani šaj te haljove sar osetinđa pe i Adrijana. Olaće sa hine kalo ko životi, hine but tužno hem na hine la nisavi nada. O doktorija phenđe laće so isi la depresija.
Jekh manuš ando Japan kova vićini pe Kaoru brininđa pe ando pe naborme hem phure roditeljija. Ov phenela: „Ko odova vreme, hine man baro stres ki buti. Palo disavo vreme, na hine man apetiti hem naštine te sovav. Počminđum te mislinav soj tano o meribe jedino rešenje aso me problemija.“
O Odžebodi andi Nigerija phenela: „Stalno hijum le tužno hem stalno runđum. Počminđum te razmislinav sar te mudarav man.“ Srećaće, o Odžebodi, o Kaoru hem i Adrijana na mudarđe pe. Ama, svako berš but manuša odova ćerena.
KAJ ŠAJ TE ARAKHA POMOĆ?
But ando okola kola mudarena pe tane murša hem but olendar ćerđe odova sose lađandilje te roden pomoć. Ama, o Isus phenđa so o doktori valjani e nabormenđe (Luka 5:31). Odolese ako avela tuće te vazde te vasta kotar sa, ma lađa te rode pomoć. But manuša kola patinena andi depresija rodinđe stručno pomoć hem odova dinđa len snaga te borinen pe. Maškaro lende tane o Odžebodi, o Kaoru hem i Adrijana kola akana osetinena pe but pošukar.
Te šaj te lečini pe i depresija, o doktorija nekase ka den iljačija, nekasa samo ka vaćeren, a nekasa hem ka vaćeren hem ka den le iljačija. Asavke manušenđe but značini ked isi len podrška andi pi porodica ja ando pe amala kola tane strpljiva olencar hem kola trudinena pe te haljoven len. A o Jehova tano najšukar amal kova šaj te ovel amen. Ov tešini amen hem dela amen snaga prekalo po Lafi, i Biblija.
ISI LI TRAJNO REŠENJE?
Valjani but vreme te šaj i depresija te lečini pe hem često odola manuša mora te meninen disave buća ko po životi. Ako isi tut depresija, ma našal ti nada! Ov sigurno so ađićeri tut pošukar budućnost. Ko odova uverinđa pe o Odžebodi, kova phenela: „Jedva ađićerava te ispuninen pe o lafija ando Isaija 33:24, kuri pisini so ka avel vreme ked niko ki phuv na ka phenel: ’Nabormo hijum.‘“ O Devel obećini so pana hari ka avel nevo sveto kuri više na ka oven nisave dukha (Otkrivenje 21:1, 4). Tegani, i patnja, i dukh hem i tuga više na ka ovel. O osećanja kola akana mučinena tut više niked „na ka [aven] ki godi, niti ka [pojavinen] pe ko vilo“ (Isaija 65:17).