Ked o Devel vladinđa sare živinđe ko mir hem ko jekhipe
Sose valjani amenđe e Devleso Kraljevstvo?
Ked o prva manuša hine stvorime, amaro Stvoritelj, kaso anav tano Jehova, hine jedino vladari. Ov vladinđa mangipaja hem ćhivđa e manušen te živinen ko jekh but šužo than – ko edensko vrt. Isto ađahar, dinđa len but buća hajbase. Uzo odova, ov dinđa len but šuži buti te ćeren (Postanak 1:28, 29; 2:8, 15). Ked bi o Adam hem i Eva šunena hine e Devle, sa o manuša avdije bi uživinena ko mir.
O prva manuša odbacinđe e Devle sar pe vladare
I Biblija mothovi so jekh buntovno anđeo, kova kasnije hine penđardo sar Satana, o Beng, phenđa so o Devel nane le pravo te vladini. Ov phenđa so o manuša ka oven pobahtale bizo Devel. Nažalost, o Adam hem i Eva šunđe e Satana hem pobuninđe pe protiv o Devel (Postanak 3:1-6; Otkrivenje 12:9).
Sebepi so o Adam hem i Eva odbacinđe e Devle sar pe vladare, on našalđe i prilika te živinen večno ko raj ki phuv (Postanak 3:17-19). Odija odluka utičinđa hem upro olenge ćhave kola kasnije hine len. I Biblija phenela so sebepi so o Adam grešinđa „ko sveto khuvđa o greh hem prekalo greh o meribe“ (Rimljanima 5:12). Isto ađahar, o greh anđa pana jekh ozbiljno problemi. Ki Biblija pisini: „Ked o manuš vladini upro manuš odova anela samo lošnipe“ (Propovednik 8:9). Avere lafencar, ked o manuša vladinena, uvek ka oven problemija.
O MANUŠA POČMINENA TE VLADINEN
O Nevrod pobuninđa pe protiv o Jehova
Prvo manuš aso kova i Biblija phenela so vladinđa ki phuv hine o Nevrod hem ov pobuninđa pe protiv e Jehovasi vlast. Pana ando oleso vreme, o manuša kola tane ki vlast koristinena pi moć ko lošno način. Angleder 3 000 berš, o kralj Solomon pisinđa: „Dikhljum o asva ando okola kola trpinena i nepravda, a na hine niko te utešini len. I moć tani ko vasta ando okola kola ćerena lenđe i nepravda“ (Propovednik 4:1).
I situacija avdije nane ništa pošukar. Ko 2009. berš, ki jekh publikacija ando Ujedinjena nacije pisinđa so „jekh ando najbaro razlog sose ovena o lošna buća ko sveto“ tano sebepi so o manuša ko lošno način koristinena pi vlast.
VREME ASI PROMENA
E manušenđe valjanena pošukar vladarija hem pošukar vlast. Amaro Stvoritelj odova obećinđa amenđe.
O manušikane vlastija našti te rešinen amare problemija
O Devel uspostavinđa jekh Kraljevstvo, kova ka uništini sa o manušikane vladavine hem „samo ov ka aćhol večno“ (Danilo 2:44). Aso odova Kraljevstvo milionija manuša molinena pe (Matej 6:9, 10). Ama, ko odova Kraljevstvo o Devel na ka vladini kokri. Umesto odova, ov ćhivđa nekas ko angleder živinđa sar manuš te ovel vladari. Kas o Devel birinđa?