ONLAJN BIBLIOTEKA Watchtower
ONLAJN BIBLIOTEKA
Watchtower
Romane (Srbija)
  • BIBLIJA
  • PUBLIKACIJE
  • SASTANKIJA
  • w21 april str. 26-29
  • „Akana mangava i služba“

O video-sadržaj nane dostupno.

Žao amendže, alo dži ki greška dži phravdža pe o video.

  • „Akana mangava i služba“
  • Stražarsko kula objavini e Jehovaso Kraljevstvo (izdanje proučibase) – 2021
  • Podnaslovija
  • Slično materijali
  • NAŠALĐUM MI RADOST
  • JEKH NEOČEKIVANO, AMA VAŽNO BUTI KOJA SIKLJILJUM
  • SAR POČMINĐUM PALEM TE MANGAV I SLUŽBA?
  • ARAKHLJUM NEKAS KOVA ULO MO STALNO PARTNERI KI PIONIRSKO SLUŽBA
  • O JEHOVA BLAGOSLOVINĐA AMEN PANA POBUTER
  • NAŠTINĐUM TE ZAMISLINAV POBAHTALO ĐIVDIPE
  • Sar šaj te „probine hem te dikhe kobor tano o Jehova šukar?“
    Stražarsko kula objavini e Jehovaso Kraljevstvo (izdanje proučibase) – 2021
Stražarsko kula objavini e Jehovaso Kraljevstvo (izdanje proučibase) – 2021
w21 april str. 26-29
Vanesa Vičini

ISKUSTVO

„Akana mangava i služba!“

VAĆERĐA I VANESA VIČINI

BARILJUM ki diz koja vićini pe Balkluta, ko južno deo ando ostrvo Novi Zeland. Sar tikni, mangljum e Jehova hem mangljum te ovav e Jehovaso svedoko. Uživinđum te đav ko sastankija hem i skupština hine than kuri osetinđum man sigurno hem bahtali. Iako hijum le lađutni, uživinđum te đav ki služba svako kurko. Na darandiljum te propovedinav me amalenđe ki škola hem averenđe. Hijum le ponosno ko odova te ovav e Jehovaso svedoko hem ked hine man 11 berš predajinđum mo životi e Jehovase.

NAŠALĐUM MI RADOST

Nažalost, ked hine man 13 berš, počminđum hari pohari te cidav man ando Jehova. Dićhilo maje so me amala ki škola isi len but bari sloboda, hem me mangljum odova. O pravilija kola ćhivđe maje me roditeljija hem o hrišćanska merilija dićhilje maje soj tane but stroga. Odolese, mislinđum soj tano but pharo te služini pe e Jehovase. Iako đanđum so o Jehova postojini, na hijum le više paše oleja.

Ki služba đeljum but hari, samo te ne bi ovava neaktivno. Ked đeljum ki služba niked na hijum le pripremimi. Odolese hine maje pharo te počminav hem te nastavinav o razgovor e manušencar. Ko krajo, mi služba na hine la rezultatija hem našalđum mi radost. Odolese na mangljum više i služba. Tegani bi pućava man: „Sar šaj neko te đal ki služba svako kurko, svako masek?“

Ked hine man 17 berš, mangljum te živinav kokri bizo me roditeljija. Odolese pakujinđum me koferija, ikljiljum ando ćher hem đeljum ki Australija. Me roditeljenđe hine but pharo te dikhen man sar ikljovava ando ćher. On brininđe pe maje, ama nadinđe pe so ka nastavinav te služinav e Jehovase.

Ki Australija, mi duhovnost oslabinđa pana poviše. Retko ked đeljum ko sastankija. Družinđum man e ternencar kola, sar mande, jekh rat bi đana ko sastankija, a aver rat ko klub kuri bi ćheljena hem pijena. Ked razmislinava ando odova vreme, haljovava so jekhe preja hijum le ko ćaćipe, a avereja ko sveto. Na osetinđum so negde ćaće pripadinava.

JEKH NEOČEKIVANO, AMA VAŽNO BUTI KOJA SIKLJILJUM

Duj berš palo odova, upoznajinđum jekha phenja koja na hine ni svesno so podstakninđa man te razmislinav ando mo životi. Živinđum ko jekh ćher panđe phenjencar. Jekh puti vićinđam e pokrajinsko nadgledniko hem olese romnja, e Tamara, te soven koro amende jekh kurko. Đi olako rom završinđa o buća kola valjanđa ki skupština, i Tamara družinđa pe amencar. Odova sviđinđa pe manđe. Oj hine jednostavno hem lokho šaj hine te vaćeri pe olaja. Oduševinđum man odoleja so jekh odobor duhovno manuš šaj te ovel but interesantno.

I Tamara hine but revno. Olako mangipe premalo ćaćipe hem i služba hine zarazno. Oj hine but bahtali sose dinđa poklo najšukar e Jehovase. Ki aver strana, me na hijum le bahtali, sebepi so na dinđum moklo najšukar e Jehovase. Olako pozitivno stav hem i ćaćutni radost but utičinđe ko mo životi. Olako primer podstakninđa man te razmislinav ando jekh but važno ćaćipe: O Jehova mangela sa olese sluge te služinen lese „radosno“ hem „radosno te vaćeren“ (Ps. 100:2).

SAR POČMINĐUM PALEM TE MANGAV I SLUŽBA?

Me mangljum te ovav radosno sar i Tamara. Ama, te bi ovava radosno, valjanđum te ćerav disave bare promene ko mo životi. Na ćerđum odova odmah. Počminđum ando tikne buća. Počminđum te spreminav man asi služba hem podijekh puti služinđum sar pomoćno pioniri. Odova pomožinđa maje te na ovel man but trema hem te ovel man pobaro samopouzdanje. So pobuter koristinđum i Biblija, pobuter uživinđum ki služba. Sigate palo odova, počminđum svako masek te služinav sar pomoćno pioniri.

Počminđum te družinav man e phralencar hem e phenjencar kola hine len različita berša, a kola dinđe e Jehovase po najšukar hem uživinđe ki služba. Olengo šukar primer podstakninđa man te razmislinav soj tano maje važno ko životi hem te počminav te čitinav i Biblija svako dive. Odolese, pana pobuter uživinđum ki služba hem čak počminđum te služinav sar stalno pioniri. Prvo puti palo but berša, ki skupština osetinđum man ka phene hijum ćhere hem hijum le but bahtali.

ARAKHLJUM NEKAS KOVA ULO MO STALNO PARTNERI KI PIONIRSKO SLUŽBA

Berš dive palo odova, upoznajinđum e Alekse. Ov hine but ljubazno hem šukar phral kova but manglja e Jehova hem i služba. Hine sluga pomoćnik hem služinđa sar pioniri već šov berš. Isto ađahar, nekobor masek služinđa ko Malavi, sose uduri hine bari potreba. Đi hine uduri, ov družinđa pe e misionarencar kola but šukar utičinđe upro leste hem podstakninđe le hem ponodri te ćhivel o Kraljevstvo ko prvo than.

Amen ljeljam amen ko 2003. berš, hem nastavinđam te služina ki punovremeno služba đi akana. But buća sikljiljam zajedno hem o Jehova blagoslovinđa amen ko but načinija.

O JEHOVA BLAGOSLOVINĐA AMEN PANA POBUTER

I Vanesa ki služba jekha phenjaja andi phuv ki koja služini.

Ki služba, ko Gleno, ko Istočno Timor

Ko 2009. berš, hijam le vićime te služina sar misionarija ko Istočno Timor, ki jekh tikni država ko Malajsko arhipelag. Hijam le iznenadime, bahtale hem ko isto vreme zabrinuta. Panđ masek palo odova, amen resljam ki glavno diz koja vićini pe Dili.

Odova nevo than hine averćhane ando odova kuri hijam le angleder. Akana morandiljam te prilagodina amen ki nevi kultura, nevi ćhib, hrana hem ko neve uslovija. Ki služba, but putija resljam e manušen kola hine ćore, nane hine but školujime hem hine mučime. Isto ađahar, ki služba resljam bute manušen, kola sebepi o nasilje hem o maribe, trpinena bare fizička hem emotivna posledice.a

Ki služba hine but šukar. Na primer, jekh puti resljum jekha ćhaja koja vićini pe Marija hem tegani hine la 13 berš.b Nekobor berš angleder odova so resljum la mulji olaki daj, a pe dade retko ked hine la prilika te dikhel. Sar but ćhave ko olake berša, hem i Marija na đanđa so mangela te ćerel pe životoja. Setinava man so jekh puti rovindoj vaćerđa maje sar osetini pe. Ama, naštinđum te haljovav la, sose tegani na vaćerđum šukar olaki ćhib. Molinđum e Jehova te pomožini man te ohrabrinav la hem palo odova čitinđum laće nekobor stihija andi Biblija. Sar nakhlje o berša, hine man prilika te dikhav sar o ćaćipe utičinđa upro e Marijake stavija, upro olako urajbe hem upro celo olako đivdipe. Krstinđa pe hem akana oj averenca proučini i Biblija. Avdije, i Marija tani bahtali soj tani deo ando e Jehovasi duhovno porodica hem so osetini so avera mangena la.

O Jehova but blagoslovinđa i služba ko Istočno Timor. Iako but objaviteljija krstinđe pe ko palune deš berš, but olendar služinena sar pionirija, sluge pomoćnikija ja starešine. Avera ćerena ko istureno prevodilačko odeljenje hem prevodinena i duhovno hrana ko ćhibja kola vaćerena pe odothe. But hijum bahtali ked šunava sar đilabena ko sastankija, dikhava len sar asana hem sar ovena e Jehovase amala.

I Vanesa, o Aleks hem pana trin phralja pođinena motorencar te vićinen e manušen te aven ki Spomen-svečanost.

Me hem o Aleks, đaja ko terenija kola pana nane ćerde te delina o pozivnice asi Spomen-svečanost

NAŠTINĐUM TE ZAMISLINAV POBAHTALO ĐIVDIPE

Amaro životi ko Istočno Timor hine but averćhane ando životi kova hine amen ki Australija. Ama, naštinđum ni te zamislinav pobahtalo đivdipe ando akava. Disavo puti bi khuvaja ko autobus ko kova hine but manuša, ama hine hem šuke maćhe hem but povrće kola o manuša irinđe ando pazari. Podijekh puti, hine amen kurs ko disavo ćher ko kova hine but tato, o pod hine but melalo hem o khanja bi prastana andre. Iako hine amen but pharipa, but putija ano mande bi mislinava: „Akava tano but šukar.“

I Vanesa vozini pe ko minibus ko kova tane but manuša, a o Aleks hem pana duj phralja dolinđe pe ko minibus.

Putujinaja ko područje

Ked razmislinava ando odova so hine angleder, but hijum zahvalno me roditeljenđe so dinđe poklo najšukar te sikaven man ando e Jehovase merilija hem te podržinen man, čak hem tegani ked hine maje najpharo ko me tinejdžerska berša. Šaj te phenav so o lafija ando Poslovice 22:6 primeninena pe upro mande. Mi daj hem o dad tane but ponosna upro mande hem upro Aleks hem bahtale tane te dikhen amen sar verno služinaja e Jehovase. Kotar 2016. berš, služinaja ki pokrajinsko služba ko područje andi australijsko podružnica.

Mothovaja o crtanja ando Enis hem andi Melinda disave ćhavenđe kotar Istočno Timor

Našti te verujinav so ko jekh period ando mo životi hine maje but pharo te đav ki služba. Akana but mangava i služba! Haljiljum so bizo obzir so desini pe amenđe ko životi, šaj te ova ćaće radosna samo ako služinaja e Devlese celone vileja. Zadnja 18 berš zajedno e Alekseja, služinaja e Jehovase hem šaj te phenav so odola tane najšukar berša ko mo životi. Akana haljovava kobor tane ćaće o lafija kola o psalmista David phenđa e Jehovase: „Ka radujinen pe sare okola kolenđe tu hijan utočište, zauvek radosno ka vaćeren... Ka veselinen pe okola kola mangena to anav“ (Ps. 5:11).

I Vanesa hem o Aleks proučinena i Biblija jekha dajaja hem olake ćhajaja ko dvoro.

Ćaće tani bari radost te proučina i Biblija asavke ponizno manušencar!

a Ko 1975. berš, ko Istočno Timor počminđa o maribe. Odova maribe trajinđa 20 berš. Ko odova period o manuša borinđe pe te oven politički nezavisna.

b Disave anava tane menjime.

    Publikacije ki romani čhib (2016-2025)
    Odjava
    Prijava
    • Romane (Srbija)
    • Bićhal
    • Podešavanja
    • Copyright © 2025 Watch Tower Bible and Tract Society of Pennsylvania
    • Pravilija ando korišćenje
    • Pravilija ando lična podatkija
    • Pravilija andi privatnost
    • JW.ORG
    • Prijava
    Bićhal