Ništa našti te ćhinavi e pravedna manušen te služinen e Jehovase

1-2. So phenđa jekh pisco hem so ka dikha ko akava članko?

BUT manuša avdije verujinena ko Isus, ama na ićerena pe ko odova so ov sikavđa (2. Tim. 4:3, 4). Jekh pisco phenđa: „Ako bi neko avdije pojavini pe sar o Isus hem vaćeri o buća ko isto način sar so vaćerđa o pravo Isus, da li bi amen odbacinaja le ko isto način sar so odbacinđe e Isuse angleder 2 000 berš? O odgovor tano jasno. Amen bi ćeraja isto ađahar.“

² But manuša ko prvo veko šunđe so o Isus sikavđa hem dikhlje o čudija kola ov ćerđa, ama ipak na verujinđe upro leste. Sose? Ko okova članko dikhljam štar buća sose o manuša na prihvatinđe odova so o Isus phenđa hem ćerđa. Akana ka dikha pana štar buća. Isto ađahar, ka dikha sose o manuša avdije odbacinena e Isusese učenikonen hem sar šaj te ova sigurna so ništa na ka ćhinavi amen te služina e Jehovase.

(1) O ISUS HINE NEPRISTRASTNO

3. Sose disave manuša odbacinđe e Isuse?

³ Đi hine ki phuv, o Isus družinđa pe sarinencar. Ov halja maro e barvale manušencar, okolencar kola hine ko položaj, ama isto ađahar hem e ćororencar hem e obično manušencar. Uzo odova, ov hine saosećajno hem premalo okola kola hine penđarutne sar grešnikija. O ponosna manuša odbacinđe e Isuse sebepi odova so ov ćerđa. On pućlje olese učenikonen: „Sose hana hem pijena okolencar kola tane poreznikija hem grešnikija?“ A o Isus odgovorinđa lenđe: „Na valjani lekari okolenđe soj tane saste, nego okolenđe kola tane naborme. Na aljum te vićinav te pokajinen pe o pravedna manuša, nego o grešna manuša“ (Luka 5:29-32).

4. Premalo proročanstvo ando Isaija so o Jevreja valjanđe te očekujinen?

⁴ So i Biblija phenela? But berš angleder o Mesija te avel, o prorok Isaija phenđa so o manuša ko sveto na ka prihvatinen le. Ov phenđa: „O manuša mrzinđe le hem izbegninđe le [...] Oleso muj samći hine garavdo amendar. Hine mrzimo hem smatrinđam so na vredini ništa“ (Is. 53:3). O proročanstvo phenela so o manuša na ka prihvatinen e Mesija hem odolese o Jevreja ko prvo veko valjanđe te očekujinen so o Isus ka ovel odbacimo.

5. So but manuša avdije mislinena ando e Isusese sledbenikija?

⁵ Da li hem avdije dikhaja isto problemi? Ja. But religiozna vođe tane bahtale ked o ugledna manuša, o barvale hem okola kolen o sveto smatrini soj tane mudra, ovena članija ko olenge crkve. On prihvatinena asavke manušen, iako on ćerena o buća kola nane premalo e Devlese merilija. Ama, odola ista religiozna vođe mrzinena e Jehovase slugen kola tane moralno čista hem revna sose nane ugledna anglo akale svetose jaćha. Sar so o apostol Pavle phenđa, o Devel birini okolen kolen o sveto smatrini soj tane beznačajna (1. Kor. 1:26-29). Ama, anglo Jehova sa olese verna sluge tane but vredna.

6. Premalo Matej 11:25, 26, sar šaj amen te oponašina e Isuseso stav?

⁶ So šaj te pomožini amen te na našala amari vera? (Čitin Matej 11:25, 26.) Ma dozvolin upro tute te utičini odova sar o sveto dikhela upro e Devleso narodo. Prihvatin odova so o Jehova koristini samo e ponizna manušen te ćeren olesi volja (Ps. 138:6). Isto ađahar, razmislin kobor buća o Devel ćerđa ađahar so koristinđa okolen kola anglo e manušenge jaćha nane mudra hem but školujime.

(2) O ISUS OSUDINĐA O POGREŠNA SIKLJOVIBA

7. Sose o Isus phenđa soj tane o fariseja licemerna hem sar on reagujinđe?

⁷ O Isus hrabro phenđa so o religiozna vođe tane licemerna, sose na sikavena e manušen so ćaće o Jehova rodela olendar. Na primer, ov phenđa so on više brininđe pe ando odova sar ka thoven pe vasta, nego ando odova sar ka brininen pe ando pe roditeljija (Mat. 15:1-11). E Isusese učenikija šaj hine iznenadime sebepi odova so o Isus phenđa. Odolese on pućlje le: „Da li đaneja so o fariseja uvredinđe pe ked šunđe so phenđan?“ Ov odgovorinđa lenđe: „Svako kaš kova na sadinđa mo nebesko Dad ka ikali pe korenoja. Mukhen len. On tane korore vođe. A ked o kororo igari e korore, o solduj ka peren ki jama“ (Mat. 15:12-14). O Isus na mukhlja i negativno reakcija ando religiozna vođe te ćhinavi le te vaćeri o ćaćipe.

8. Sar o Isus mothovđa so o Devel na prihvatini sa odova so o religiozna vođe sikavđe?

⁸ O Isus mothovđa so odova so o religiozna vođe sikavđe tano hovajbe. Ov na phenđa so o Devel prihvatini sa o religiozna sikljoviba. Umesto odova, ov phenđa so but manuša ka đan ko buvlo drumo kova legari ko uništenje, a so but hari manuša ka đan ko tesno drumo kova legari ko životi (Mat. 7:13, 14). Ov phenđa so disave manuša ka phenen so služinena e Devlese, ama ustvari na ćerena odova. Odolese, ov upozorinđa pe učenikonen: „Arakhen tumen ando hovavne prorokija kola avena koro tumende hem ćerena pe soj tane sar bakre, ama u stvari andre tane sar ruva kola tane but bokhale. Ka penđaren len premalo lenge plodija“ (Mat. 7:15-20).

9. Aso kola religiozna sikljoviba o Isus mothovđa soj tane hovavne?

⁹ So i Biblija phenela? I Biblija prorekninđa so o Mesija ka ovel but revno aso e Jehovaso ćher (Ps. 69:9; Jov. 2:14-17). Odija revnost podstakninđa e Isuse te mothovi so o sikljoviba hem o običaja kola o religiozna vođe sikavđe tane pogrešna. Na primer, o fariseja verujinđe so i duša tani besmrtno. O Isus sikavđa so o mule sovena (Jov. 11:11). O sadukeja na verujinđe ko uskrsenje. O Isus uskrsninđa pe amale e Lazare (Jov. 11:43, 44; Dela 23:8). O fariseja phenđe so sa so desini pe lenđe hine pisimo ando Devel. O Isus sikavđa so o manuša šaj kokri te birinen da li ka služinen e Devlese (Mat. 11:28).

10. Sose but manuša odbacinena odova so amen sikavaja?

¹⁰ Da li hem avdije dikhaja isto problemi? Ja. But manuša odbacinena amen odolese so amen koristinaja i Biblija te mothova so disave sikljoviba tane hovavne. O religiozna vođe sikavena pe sledbenikonen so o Devel kaznini e lošnone manušen ko pakao. On koristinena o hovavne sikljoviba te kontrolišinen e manušen. Sar e Jehovase sluge, kola služinena e Devlese kova tano pherdo mangipe, amen pomožinaja e manušenđe te haljon so odova sikljovibe tano hovavno. Isto ađahar, o religiozna vođe sikavena so i duša tani besmrtno. Ako tano odova sikljovibe tačno, tegani niko ne bi valjani te ovel uskrsnimo. Amen mothovaja so i Biblija na sikavi odova. Iako but religije sikavena so sa o buća kola desinena pe amenđe o Devel angleder pisinđa ja phenđa, amen sikavaja so o manuš isi le slobodno volja hem so kokri birini da li ka služini e Devlese. Sar o religiozna vođe reagujinena? Često tane holjame!

11. Premalo e Isusese lafija ando Jovan 8:45-47, so o Devel mangela ando po narodo?

¹¹ So šaj te pomožini amen te na našala amari vera? Ako mangaja o ćaćipe, amen mora te verujina hem te šuna odova so o Devel phenela. (Čitin Jovan 8:45-47.) Amen niked na ka cida amen ando ćaćipe, sar so ćerđa o Satana, o Beng. Isto ađahar, amen niked na ćeraja diso so na složini pe odoleja ko so verujinaja (Jov. 8:44). O Devel mangela ando po narodo te mrzinen o lošnipe, a te ićeren pe ko odova soj tano šukar, sar so o Isus ćerđa (Rimlj. 12:9; Jevr. 1:9).

(3) O ISUS HINE PROGONIMO

12. Sose o Jevreja odbacinđe e Isuse?

¹² Koja tani pana jekh buti sebepi koja o Jevreja odbacinđe e Isuse? O Pavle phenđa: „Amen propovedinaja e Hriste kova hine kovimo ko stubo, kova tano e Judejconenđe uzrok aso spoticanje“ (1. Kor. 1:23). But Jevreja odbacinđe e Isuse odolese so hine kovimo ko stubo. Olenđe odova so o Isus mulo ko stubo izgledinđa samći hine zločinco hem grešniko, a na o Mesija (Pon. zak. 21:22, 23).

13. So na haljilje okola kola odbacinđe e Isuse?

¹³ Disave Jevreja odbacinđe e Isuse odolese so mislinđe soj tano krivo, na haljilje soj tano nepravedno optužimo hem na dikhlje so premalo leste hine mothovdi nepravda. Okola kola sudinđe e Isusese na marinđe asi pravda. O članija ando Sinedrion sigate ćedinđe pe, bizo te poštujinen o zakonska procedure (Luka 22:54; Jov. 18:24). O sudije na hine poštena đi šunđe o optužbe hem o dokazija kola avera vaćerđe „protiv o Isus“. Čak hem on rodinđe disavi nepravedno optužba protiv o Isus te bi šaj te mudaren le. Odova hine protiv o zakon (Mat. 26:59; Mar. 14:55-64). Hem palo odova so o Isus hine uskrsnimo, odola nepravedna sudije platinđe but srebrnikija e rimsko vojnikonenđe, kola arakhlje o grobo, te vaćeren hovajbe ando odova sose oleso grobo hine ćućo (Mat. 28:11-15).

14. So hine prorokujimo ando e Mesijaso meribe?

¹⁴ So i Biblija phenela? Iako but Jevreja ko e Isuseso vreme na mislinđe so o Mesija valjani te merel, zapazin so hine prorokujimo olestar: „Kokri pes predajinđa ko meribe hem hine računimo maškaro prestupnikija. Ov akharđa o grehija ando but manuša hem borinđa pe aso prestupnikija“ (Is. 53:12). Odolese, o Jevreja na hine len nijekh razlog te odbacinen e Isuse ked hine mudardo sar grešniko.

15. Sebepi kola optužbe disave odbacinena e Jehovase svedokonen?

¹⁵ Da li hem avdije dikhaja isto problemi? Ja. Sar so o Isus hine nepravedno osudimo hem kaznimo hem avdije isto odova doživinena e Jehovase svedokija. Hajde te dikha disave primerija. Ki Amerika, maškaro 1930-to hem 1950-to berš hine but sudska slučaja kaj braninđam amaro pravo te služina e Devlese. Disave sudije hine len predrasude premalo amende. Ko Kvibek, ki Kanada, i crkva hem i država zajedno ćerđe ko odova te ćhinaven amaro delo. But objaviteljija hine ćhivde ko phanlipe samo odolese so vaćerđe averenđe ando e Devleso Kraljevstvo. Ki Nemačka, but terne verna phralja hine mudarde sebepi so i nacističko vlast naredinđa odova. Ko zadnja nekobor berša, but phralja hem phenja ki Rusija hine osudime hem ćhivde ko phanlipe samo odolese so vaćerđe averencar andi Biblija. Aso odova hine phendo soj tani „ekstremističko aktivnost.“ Čak hem i Biblija – Novi Svet prevod ki rusko ćhib hine zabranimi hem proglasimi sar „ekstremističko materijali“ samo odolese so othe koristini pe e Devleso anav.

16. Premali 1. Jovanova 4:1, sose na valjani te dozvolina o hovajba ando e Jehovase svedokija te prevarinen amen?

¹⁶ So šaj te pomožini amen te na našala amari vera? Haljov soj tano o ćaćipe. Ki Propoved ki gora, o Isus upozorinđa okolen kola šunđe le so disave ka vaćeren „but bare hovajba“ olendar (Mat. 5:11). Akala hovajba avena ando Satana. Ov utičini upro amare protivnikija te vaćeren hovajba amendar (Otkr. 12:9, 10). Amen na valjani te šuna odova. Niked na valjani te dozvolina odola hovajba te ciden amen ando Jehova ja te slabonćeren amari vera. (Čitin 1. Jovanova 4:1.)

(4) E ISUSE IZDAJINĐE HEM MUKHLJE LE

17. Sar o događaja kola desinđe pe hari angleder te merel o Isus utičinđe upro disave manuša?

¹⁷ Hari angleder te merel, jekh ando e Isusese učenikija izdajinđa le. Jekh aver apostol trin putija phenđa so na penđari le hem ko krajo sa olese apostolija mukhlje le i rat angleder te merel (Mat. 26:14-16, 47, 56, 75). O Isus na hine iznenadimo sose on ćerđe odova, odolese so ov angleder vaćerđa so ka desini pe odova (Jov. 6:64; 13:21, 26, 38; 16:32). Ked dikhlje sa akala buća, disave manuša šaj razmislinđe: „Ako e Isusese učenikija ćerđe asavke buća, me na mangava te ovav jekh olendar!“

18. Kola proročanstvija ispuninđe pe hari angleder o Isus te merel?

¹⁸ So i Biblija phenela? Beršencar angleder, o Jehova ko poklo Lafi mothovđa so o Mesija ka ovel izdajimo aso 30 srebrnikija (Zah. 11:12, 13). Ole ka izdajini oleso paše amal (Ps. 41:9). Isto ađahar, o prorok Zaharija pisinđa: „Khuv e pastire hem nek o bakre našen“ (Zah. 13:7). O manuša kola hine iskrena ne bi odbacinena e Isuse sebepi akala događaja. Olengi vera bi valjani te ovel zorjaćerdi ked bi dikhena sar akala proročanstvija ispuninena pe upro Isus.

19. So o iskrena manuša đanena?

¹⁹ Da li hem avdije dikhaja isto problemi? Ja. Ko amaro vreme, but penđarutne phralja ki amari organizacija mukhlje o ćaćipe hem ulje otpadnikija. Palo odova, hem averen ćhivđe te đan palo lende. Ko radio, ko internet, ki televizija hem ko novine on vaćerena negativna izveštaja amendar, na vaćerena celo ćaćipe hem vaćerena hovajba. Ama, e iskreno manušen na prevarini akava. Umesto odova, on haljona so i Biblija prorekninđa so ka desinen pe asavke buća (Mat. 24:24; 2. Petr. 2:18-22).

20. So ka pomožini amen te na našala amari vera ked avera mukhena o ćaćipe? (2. Timoteju 4:4, 5.)

²⁰ So šaj te pomožini amen te na našala amari vera? Amari vera valjani hem ponodri te ovel zorali ađahar so redovno ka proučina, često ka molina amen hem ka da sa amendar te ćera o zadatko kova o Jehova dinđa amen. (Čitin 2. Timoteju 4:4, 5.) Ako isi amen zorali vera, tegani na ka daraven amen o lošna izveštaja kola šunaja (Is. 28:16). Amaro mangipe premalo Jehova, premalo oleso Lafi hem premalo phralja ka pomožini amen te na našala amari vera ked avera mukhena o ćaćipe.

21. Iako but manuša avdije odbacinena amari poruka, ko so šaj ipak te ova sigurna?

²¹ Ko prvo veko, but manuša odbacinđe e Isuse. Ama, ki aver strana, but manuša hem prihvatinđe le. Maškaro olende hine jekh član ando jevrejsko Sinedrion hem čak „but sveštenikija“ (Dela 6:7; Mat. 27:57-60; Mar. 15:43). Isto ađahar, hem avdije but manuša prihvatinđe e Isuse odolese so đanena hem mangena o ćaćipe kova sikljilje ando e Devleso Lafi. E Devleso Lafi phenela: „Baro mir isi len okola kola mangena to zakon, ništa našti te ćhivel len te spotakninen pe“ (Ps. 119:165).