Ko sa mekle odluke o Jehova hine maje ko prvo than

Bijandiljum ko 19. maj ko 1940. berš, ki diz Amjon, ko Liban. Nekobor berš palo odova, mi porodica selinđa pe ki diz Tripoli, kuri bariljum. Mi porodica tegani već penđarđa e Jehova. Me roditeljija hine len panđ ćhave, trin ćhaja hem duj murša. Me hijum le o najtikneder. Me roditeljenđe na hine but važno te zaradinen pare. Najvažno hine amenđe te proučina i Biblija, te đa ko sastankija hem te pomožina averenđe te penđaren e Devle.

Tegani, ki amari skupština hine nekobor pomazanikija. Jekh olendar, o Mišel Abud, ićerđa o sastanak kova tegani vićinđa pe Studij knjige. Ov penđarđa o ćaćipe ko Njujork hem 1921. berš irinđa pe ko Liban te propovedini. Setinava man kobor baro poštovanje mothovđa hem kobor pomožinđa duje phenjenđe kola hine bićhalde ando Galad, i En hem i Gven Bivor. On duj ulje amare but šukar amala. But hijum le bahtalo ked palo but berša dikhljum e Ena ki Amerika. Disavo vreme palo odova, resljum hem e Gvena. Oj udajinđa pe aso jekh phral kova vićinđa pe Vilfred Guč. Zajedno služinđe ko Betel, ko London.

I SLUŽBA KO LIBAN

Ked hijum le but terno, ko Liban hine samo nekobor Svedokija, ama hijam le but revna ki služba hem vaćerđam averenđe ando e Devleso Lafi. Iako disave religiozna vođe protivinđe pe amenđe, amen ipak nastavinđam te propovedina. But šukar setinava man kola buća tegani desinđe pe.

Jekh dive, mi phen i Sana hem me propovedinđam ki jekh zgrada. O svešteniko alo ko odova sprat đi propovedinđam. Verovatno neko vićinđa le. Ov počminđa te vređini me phenja. Ov ulo odobor nasilno so gurinđa e Sana hem oj peli kotar stepenice. But povredinđa pe. Neko vićinđa i policija. On pobrininđe pe i Sana te dobini pomoć. E svešteniko legarđe ki policijsko stanica hem odothe dikhlje so ov akharđa peja pištolji. Tegani, o šef andi policija pućlja le: „Da li tu sikaveja e manušen kotar Devel ja sikaveja len te oven nasilna?“

Pana setinava man ki jekh aver situacija. Amari skupština iznajminđa jekh autobus te šaj te đa te propovedina ko jekh gav kova hine but dur andi diz. Ki početka, hine amenđe but šukar, sa đi na alo o svešteniko ando odova than. Ov ćedinđa bute manušen te napadinen amen. On vređinđe amen hem gađinđe amen barencar. Jekh bar khuvđa me dade ko šero hem setinava man so me dadeso muj hine celo ano rat. Ov hem mi daj irinđe pe ko autobus, a sare amen pođinđam palo lende. Niked na ka bistrav so phenđa mi daj đi koslja me dadeso muj: „Jehova, oprostin lenđe, on nane svesna so ćerena.“

Jekh aver situacija koja avela maje ki godi tani ked đeljam te posetina me familija ko than kaj bijandiljum. Ko me paposo ćher alo jekh svešteniko kova hine le but baro položaj. Ov đanđa so me roditeljija tane e Jehovase svedokija. Iako hine man samo šov berš, ov pućlja man: „Sose tu pana na krstinđan tut?“ Me phenđum lese so me hijum pana tikno, so mora te đanav pobuter andi Biblija hem so mi vera valjani te ovel zorali te šaj te krstinav man. Sebepi so na sviđinđa pe lese mo odgovor, ov phenđa me papose so ponašinđum man premalo leste bizo poštovanje.

Ama, asavke lošna iskustvija na hine but. O manuša ko Liban tane but gostoljubiva hem velikodušna. Odolese šajinđam te vaćera bute manušencar andi šukar vest hem te proučina olencar i Biblija.

ODLUČINĐAM TE SELINA AMEN KI AVER PHUV

Đi pana hijum le ki škola, jekh terno phral andi Venecuela alo ko Liban. Ov alo ko sastankija ki amari skupština hem ađahar počminđa te upoznajini pe me phenjaja, e Vafaja. Palo disavo vreme, on lelje pe hem đelje te živinen ki Venecuela. I Vafa but putija pokušinđa te ubedini me dade sare te đa te živina ki Venecuela. Oj ćerđa odova odolese so but nedostajinđam laće. Ko krajo, šunđam la hem sare đeljam te živina ki Venecuela.

Ko 1953. berš, resljam ki Venecuela, živinđam ko Karakas, uzi e predsednikosi palata. Odolese so hijum le tikno, hijum le but oduševimo ked bi dikhava sar vozinena e predsedniko ko disave skupa vorda. Ama, me roditeljenđe na hine lokho te prilagodinen pe ki nevi phuv, ki aver ćhib, kultura, hrana hem klima. Samo so počminđe te prilagodinen pe te živinen ki odija phuv, desinđa pe diso but lošno.

RESLJA AMEN JEKH BARO LOŠNIPE

Mo dad počminđa te naborsaljol. Odova hine amenđe čudno, sose ov uvek hine zoralo hem sasto manuš. Čak ni na setinaja amen da li ov nekad hine nabormo. Ama, o lekarija arakhlje so isi le rak hem đelo ki operacija. Jekh kurko palo odova, ov mulo.

Našti lafencar te opisujinav kobor hine bari amari dukh. Tegani hine man samo 13 berš. Sare hijam le šokirime hem mislinđam so više niked na ka ova bahtale. Me dajaće valjanđa but vreme te prihvatini so olako rom mulo. Ama, sare morandiljam te haljova so mora te nastavina te živina hem o Jehova pomožinđa amen te istrajina. Ked hine man 16 berš, završinđum i srednjo škola ko Karakas hem tegani ćaće mangljum te pomožinav me porodicaće.

Ko odova vreme, mi phen i Sana, venčinđa pe e phraleja kova vićinđa pe Ruben Arauh, kova irinđa pe ki Venecuela ked završinđa i škola Galad. On odlučinđe te selinen pe ko Njujork. Mi porodica manglja te upisinav man ko fakultet. Odolese đeljum ko Njujork te studirinav, sose uduri šajinđum te živinav ki mi phen hem ko mo đamutro. On duj but pomožinđe man duhovno te napredujinav. Uzo odova, đeljum ki skupština ko Bruklin, ki špansko ćhib. Uduri upoznajinđum but zrelo phralen kolen but ceninđum, sar soj tane o phral Milton Henšel hem o Frederik Franc kola služinđe ko Betel.

Ko krajo ando prvo berš ando fakulteti, počminđum te razmislinav so te ćerav me životoja. Čitinđum hem ozbiljno razmislinđum ando člankija ki Stražarsko kula kola vaćerena ando phralja hem phenja kola ćhivđe pese ciljija. Dikhljum kobor o pionirija hem o betelitija ki mi skupština tane bahtale hem me mangljum te ovav sar olende. Ama, tegani pana na hijum le krstimo. Odolese, razmislinđum te predajinav mo životi e Jehovase. Odova hem ćerđum hem krstinđum man ko 30. mart ko 1957. berš.

VAŽNA ODLUKE

Palo krštenje, hine man but bari želja te ovav pioniri, ama đanđum so odova na ka ovel lokho. But razmislinđum odolestar. Na đanđum da li šaj te đav hem ki služba hem ko fakultet. Me hem mi porodica pisinđam but lila jekh jekhese andi mi odluka te ćhinavav o fakultet hem te irinav man ki Venecuela te služinav sar pioniri.

Ko jun 1957. berš, irinđum man ko Karakas. Tegani dikhljum so mi porodica na živini baš šukar. Dikhljum so valjani lenđe pana jekh plata ko ćher. Sar te pomožinav len? Iako arakhljum maje buti ki banka, ipak hine man but bari želja te ovav pioniri. U stvari, odova hine hem o razlog sose irinđum man. Odolese, odlučinđum te ćerav o solduj. Nekobor berš hem ćerđum buti ki banka hem služinđum sar pioniri. Ko odova period niked na hijum le pobuter zauzeto hem pobuter bahtalo.

Pana pobahtalo hijum le ked upoznajinđum e Silvija, jekha šužja phenja andi Nemačka koja but manglja e Jehova. Oj hem olaki porodica selinđe pe ki Venecuela. Amen leljam amen hem hine amen duj ćhave, amaro ćhavo o Majkl (Majk) hem amari ćhaj i Samira. Isto ađahar, ko odova period počminđum te brininav man andi mi daj. Oj alji te živini koro amende. Iako morandiljum te ćhinavav i pionirsko služba te šaj te brininav man ando mekle, pana hijum le revno asi služba. Ked god hine amen odmor, i Silvija hem me služinđam sar pomoćna pionirija.

PANA JEKH VAŽNO ODLUKA

O ćhave pana đelje ki škola ked vaćerđum akava iskustvo ko početko ando akava članko. Mora te priznajinav so tegani šukar živinđam hem ki banka o manuša but poštujinđe man, ama maje hine najvažno avera te dikhen man sar e Jehovaso sluga. Odova nisar na ikljilo maje kotar godi. Odolese, mi romni hem me bešljam hem vaćerđam ando amare finansije. Ako bi ćhinavava te ćerav buti ki banka tegani bi šaj te dobinav i otpremnina. Odolese so na hijam le ko dugija, haljiljam so ako skromno živinaja odola pare šaj jekh vreme te trajinen.

Na hine lokho te ana odija odluka, ama mi romni hem mi daj podržinđe man. Odolese, akava puti šajinđum te ovav pioniri. Kobor samo hijum le bahtalo! Hijum le spremno te ovav pioniri, ama tegani desinđa pe diso so na očekujinđam.

JEKH PRIJATNO IZNENAĐENJE

Jekh dive o doktori phenđa e Silvijaće soj tani khamni. Solduj hijam le but iznenadime. Iako hijam le but bahtale, pućljum man da li akija nevi situacija ka utičini upri mi odluka te služinav sar pioniri. Valjanđa amenđe hari vreme te prihvatina akija nevi situacija, ama hijam le hem but bahtale so ki amari porodica ka ovel amen pana jekh član. Ipak, pana razmislinđum odolestar da li šaj te služinav sar pioniri.

Palo odova so vaćerđam ando amare ciljija, odlučinđam so ipak šaj te služinav sar stalno pionir. Amaro ćhavo o Gabrijel bijandilo ko april, ko 1985. berš. Me dinđum otkaz ki banka hem palem počminđum te služinav sar stalno pioniri ko jun 1985. berš. Sar đelo o vreme, hine man čast te služinav sar član ando Odbor andi podružnica. Ama, sebepi so i podružnica hine ko Karakas, morandiljum te putujinav duj ja trin putija ko kurko po 80 kilometrija.

PALEM SELINAJA AMEN

I podružnica hine ki diz koja vićinđa pe La Viktorija. Odolese, sar porodica odlučinđam te selina amen ki La Viktorija te šaj te ova popaše uzo Betel. Odija hine bari promena amenđe. But divinđum man me porodicaće hem but hijum lenđe zahvalno. Olengo spremno stav but pomožinđa maje. Mi phen i Baha hine spremno te brinini pe andi amari daj. O Majk već hine ženimo, ama i Samira hem o Gabrijel pana živinđe amencar ćhere. Odova so selinđam amen ki La Viktorija značinđa so valjanđe te aćhaven pe amalen ko Karakas. Isto ađahar, mi romni i Silvija koja živinđa ki bari diz, akana morandilji te prilagodini pe te živini ki jekh tikni diz. Sare valjanđam te prilagodina amen te živina ko potikno ćher. Šaj te phenav so valjanđam te ćera but bare promene te šaj te selina amen kotar Karakas ki La Viktorija.

Ama, o buća palem menjinđe pe. O Gabrijel ženinđa pe hem i Samira počminđa kokri te živini. Palo odova, i Silvija hem me ko 2007. berš hijam le vićime te služina ko Betel hem pana služinaja odothe. O Majk, amaro najphureder ćhavo, služini sar starešina. Ov hem olesi romni i Monika služinena sar stalna pionirija. O Gabrijel tano isto starešina hem zajedno pe romnjaja, e Ambraja, služini ki Italija. I Samira, uzo odova so služini sar stalno pioniri, služini hem sar spoljno saradnik ko Betel.

PALEM BI SA ISTO ĆERAVA

Iako anđum but bare odluke ko mo đivdipe, na kajinava man sebepi odova. Palem bi anava ista odluke. Zahvalno hijum aso sa o buća kola šajinđum te ćerav e Jehovase. Sar đelje o berša, šajinđum te dikhav soj tano but važno te ovel amen šukar amalipe e Jehovaja. Bizo obzir da li o odluke kola anaja tane tikne ja bare, ov šaj te del amen „mir kova tano upreder odova so o manuš šaj te haljol“ (Fil. 4:6, 7). I Silvija hem me akana uživinaja te služina ko Betel hem dikhaja so o Jehova blagoslovinđa amare odluke odolese so uvek ćhivđam le ko prvo than ko amaro životi.