1921. – Šel berš angleder

„SO KA ćera akava berš?“ Akava pućibe hine ki Stražarsko kula kotar 1. januar 1921. berš. Sar odgovor ko odova pućibe hine citirime o lafija ando Isaija 61:1, 2 kuri pisini: „O Jehova pomazinđa man te objavinav i šukar vest e krotkonenđe... te objavinav o berš andi e Jehovasi milost hem o dive andi osveta kotar amaro Devel.“

ON PROPOVEDINĐE BIZI DAR

Te šaj te ispuninen po zadatko, amare phralja hem phenja valjanđe te oven hrabra. On valjanđe te propovedinen „i šukar vest“ e krotko manušenđe, ama hem „o dive andi osveta“ e lošno manušenđe.

O phral Džon Hoskin kova živinđa ki Kanada, hrabro propovedinđa, iako o manuša protivinđe pe lese. Ko nilaj, ko 1921. berš, ov propovedinđa jekhe pastorese andi metodističko crkva. O phral Hoskin počminđa te vaćeri odole manušeja ađahar so phenđa: „Valjani te uživina đi vaćeraja andi Biblija. Čak iako razlikujinaja amen ko disave buća, šaj mirno te vaćera sar duj amala.“ Ama, na hine ađahar. O phral Hoskin phenela: „Palo nekobor minutija, ov odobor zorale khuvđa o udara, so mislinđum so phaglja o đami.“

Ov pištinđa upro mande hem phenđa: „Sose na đaja ko okola so na verujinena ko Devel?“ O phral Hoskin na vaćerđa nijekh lafi, ama đi đelo pese olestar, mislinđa ano peste: „Hine man osećaj so vaćerđum nekasa ko na verujini ko Devel.“

Ked tajsato dive odova pastor ićerđa i propoved, ov lošno vaćerđa ando phral Hoskin. O phral Hoskin phenela: „Ov phenđa lenđe so me hovavava e manušen hem so valjani te ovav mudardo.“ Ama, odova na ćhinavđa amare phrale te propovedini. Ov phenela: „Uživinđum te propovedinav ko odova than. Disave manuša čak phenđe: ’Đanaja so hijan e Devleso manuš.‘ Čak, dinđe man disave buća kola valjanđe maje.“

LIČNO HEM PORODIČNO PROUČIBE

Te šaj te pomožini pe e manušenđe pošukar te haljon i Biblija, ko amaro časopis Zlatni veka redovno ikljilje e biblijake pućiba hem odgovorija. Odothe hine pućiba kola pomožinđe e roditeljenđe te vaćeren pe ćhavencar. O roditeljija šaj hine te vaćeren pe ćhavencar ando odola pućiba hem te pomožinen lenđe te arakhen o odgovor ki Biblija. Jekh ando odola pućiba hine: „Kobor knjige isi ki Biblija?“ Asavke pućiba valjanđe te pomožinen e ćhavenđe te sikljon o osnovna buća andi Biblija. A avera, sar soj tano: „Da li o prava hrišćanija ka oven progonime?“, valjanđe te pomožinen e ternenđe te oven hrabra đi propovedinena.

Isto ađahar, hine disave pućiba hem odgovorija kola pomožinđe okolenđe kola već šukar penđarđe i Biblija pana pošukar te haljon la. Odola odgovorija šaj hine te arakhen pe ko prvo tom ando Studije Pisma. Iako o manuša sikljilje but buća ando odola pućiba, ko časopis Zlatni vek ando 21. decembar 1921. berš hine objavimo so odola pućiba više na ka ikljon. Sose alo đi odija promena?

NEVI KNJIGA!

I knjiga *Harfa Božja*

I kartica ki koja pisinđa so valjani te čitini pe

I kartica ki koja pisinđe o pućiba

O phralja kola ko odova vreme predvodinđe, haljilje so o manuša valjani jekh po jekh tema te sikljon andi Biblija. Sebepi odova, ko novembar 1921. berš, ikljilji i knjiga Harfa Božja. O manuša kola lelje odija knjiga šaj hine kokri te proučinen i Biblija. Ađahar, on šaj hine te haljon so o Devel mangela te ćerel e manušenđe. Sar izgledinđa odova?

Ked bi o manuš lela odija knjiga, ov bi dobini hem jekh tikni kartica ki koja hine pisimo koja strana ki knjiga valjani te čitini. Aver kurko bi dobini aver kartica ki koja hine nekobor pućiba ando odova so čitinđa. Ko krajo andi kartica pisinđa so valjani te čitini aso aver kurko.

Asavko kurs trajinđa 12 kurće. Jekh puti ko kurko o manuš dobinđa nevi kartica kotar phral ja phen andi skupština koja hine paše. Odola kartice but putija bićhalđe o phure phralja hem phenja ja okola kola našti hine te đan kotar ćher ko ćher. Na primer, i En Gardner kotar diz Milvejl, ki Pensilvanija, phenela: „Ked ikljilji akija knjiga, mi phen i Tejl, koja hine ko invalidska kolica, šaj hine pobuter te učestvujini ki služba.“ Ked o manuš završinđa o kurs, neko andi skupština posetinđa le hem pomožinđa lese pana pobuter te sikljol andi Biblija.

PANA ISI BUTI

Ko krajo ando berš, o phral Raterford bićhalđa jekh lil sa e skupštinenđe. Ov pisinđa so odova berš propovedinđa pe pobuter nego sa akala avera berša. Ov pana pisinđa: „Isi pana buti koja valjani te ćerel pe. Pomožinen averenđe te ćeren akava zadatko.“ O phralja hem o phenja dinđe sa pestar te ićeren pe ko odova savet. Ko 1922. berš, sar niked angleder, on hrabro propovedinđe ando Kraljevstvo.

Hrabra amala

Amare phralja hem phenja mothovđe so mangena jekh jekhe ađahar so pomožinđe jekh jekhese. Sar so ka mothovi akava iskustvo, on hine hrabra amala „ko phare dive“ (Posl. 17:17).

Ko utorak, ko 31. maj 1921. berš, jekh kalo manuš andi diz Tulsa, ki Oklahoma, hine ćhivdo ko phanlipe sose hine optužimo so napadinđa jekha romnja koja hine parni. Palo odova oko 1 000 manuša, kola hine parne, alje te maren pe e manušencar kola hine kale. Sigate palo odova, ko celo odova than Grinvud, o kale hem o parne počminđe te maren pe. Pobuter ando 1 400 ćhera hem prodavnice hine ćorde hem tharde. O vlastija phenđe so mulje 36 manuša, ama verovatno mulje pobuter ando 300. Odova događaj kasnije ulo penđardo sar masakr ki Tulsa.

O phral Ričard Hil, kova hine kalo hem živinđa ko Grinvud, phenela so desinđa pe: „Odija rat hine amen sastanko. Ked završinđa pe o sastanak, šunđam sar pucinena ki diz. Odova šundilo đi kasno raćate.“ Tajsato dive hine pana pogore. Ov phenela: „Disave manuša alje hem phenđe so ako mangaja te ova zaštitime, valjani te đa ki opštinsko zgrada.“ Odolese, amaro phral lelja pe romnja hem pe panđe ćhaven hem đelo ki odija zgrada. Uduri, i vojska štitinđa oko 3 000 kale manušen.

Ked o phral Artur Klaus, kova hine parno, šunđa aso odova, ov odlučinđa diso te ćerel. Ov phenela: „Ked šunđum so o manuša đana te ćoren hem te tharen o ćhera ko Grinvud, odlučinđum te đav uduri hem te dikhav sar tano mo amal, o phral o Hil.“

O phral Artur Klaus pomožini dešuštare ćhavenđe te sikljon andi Biblija ađahar so koristini i knjiga Harfa Božja

Ked reslja ko oleso ćher, ov dikhlja jekhe komšija, kova hine parno, sar ićeri i puška ko vasta. Odova komšija hine amare phraleso, e Ričardeso, amal hem mislinđa so o Artur alo te ćorel hem te tharel o ćher. Ov pištinđa upro mande hem pućlja man: „So rodeja akate?“

O Artur phenela: „Ov manglja te mudari man, ama aćhiljum đivdo ked phenđum sose aljum. Phenđum lese so me hijum e Ričardeso amal hem so but putija već hijum le koro leste.“ O Artur hem odova komšija štitinđe e Ričardeso ćher ando ćora.

Sigate palo odova, o Artur šunđa so o phral Hil tano ki opštinsko zgrada pe porodicaja. O Artur šunđa so niko našti te ikljol andi zgrada ako nane le dozvola ando general Baret. O Artur phenela: „Hine but pharo te avel pe đi odova generali. Ked phenđum lese so mangava, ov pućlja man: ’Da li ćaće ka brinine tut olendar?‘ Me phenđum lese so ka ovav bahtalo te ćerav odova.“

O Artur prastandilo đi ki opštinsko zgrada odole lileja ko vas. Ked mothovđa odova lil jekhe vojnikose, ov phenđa lese: „So? Lično o generali potpisinđa tuće i dozvola? Da li đaneja so avdije tu hijan prvo manuš kova ka ikalji nekas andi akija zgrada?“ Sigate arakhlje e phrale, e Ričarde, hem olese porodica. Sare khuvđe ko e Arturese vorda hem đelje koro leste.

O phral o Artur šukar brininđa pe ando phral o Ričard hem andi olesi porodica. Ked avera dikhlje kobor o Artur hine hrabro hem kobor mangela pe phralen, on hine oduševime. O Artur phenela: „O komšija kova arakhlja e Ričardeso ćher pana pobuter poštujinđa e Jehovase svedokonen. But manuša ulje zainteresime ked dikhlje so amen na dikhaja koj tano ko hem na mislinaja so hijam pošukar ando avera.“

a O časopis Zlatni vek kotar 1937. berš vićinđa pe Uteha, a kotar 1946. berš vićini pe Probudite se!