Sar šaj o roditeljija te pomožinen pe ćhavenđe te mangen e Jehova?

1-2. Sose disave načelija ovena amenđe považna ked menjinena pe o buća ko amaro životi?

O ĐAMUTRO hem i bori šunena e phrale sar ićeri o govor aso venčanje. Iako odola buća sostar o phral vaćeri, olenđe tane već penđarutne, on akana sa odova dikhena avere jaćhencar. Odolese so odova valjani te primeninen.

² Odova tano isto sar ked jekh bračno par valjani te oven roditeljija. Iako beršencar šunđe but savetija sar valjani te barjaćeren pe o ćhave, akana sa odova dikhena avere jaćhencar. Odolese so akana ka ovel len ćhave hem ka valjani te ićeren pe ko odola savetija. Odija tani ćaće bari odgovornost! Ked o buća menjinena pe ko amaro životi, disave načelija ando Devleso Lafi ovena amenđe pana považna. Sebepi odova, e Jehovase sluge čitinena oleso Lafi hem sar so hine phendo e izraelsko kraljenđe, „celo po životi“ hor razmislinena odolestar so čitinena (Pon. zak. 17:19).

3. Sostar ka vaćera ko akava članko?

³ O roditeljija kola tane e Jehovase svedokija isi len jekh posebno čast, te sikaven pe ćhaven ando Jehova. Ama, te šaj te ćeren odova nane dovoljno samo te vaćeren lenđe ando Devel, već valjani te sikaven len te mangen e Jehova. Sar šaj te ćeren odova? Ko akava članko ka dikha štar načelija kola šaj te pomožinen len (2. Tim. 3:16). Isto ađahar, ka dikha sar odola načelija pomožinđe disave roditeljenđe.

ŠTAR NAČELIJA KOLA ŠAJ TE POMOŽINEN E RODITELJENĐE

4. Kova tano o prvo načelo kova šaj te pomožini e roditeljenđe te sikaven pe ćhaven te mangen e Jehova? (Jakovljeva 1:5)

⁴ Prvo načelo: Rode pomoć ando Jehova. Molin tut e Jehovase te pomožini tut te sikave te ćhaven te mangen e Jehova. (Čitin Jakovljeva 1:5.) Ov šaj te del amen najšukar savetija. Sose? Sar prvo, ov tano roditelj hem isi le baro iskustvo (Ps. 36:9). Sar dujto, o savetija kola ov dela uvek tane amare šukaripase (Is. 48:17).

5. (a) Sar e Jehovasi organizacija pomožini e roditeljenđe? (b) Sar so dikhljam ko video, so o roditeljija šaj te sikljon ando phral hem andi phen Amorim?

⁵ O Jehova prekali pi organizacija dinđa but buća kola šaj te pomožinen e roditeljenđe te sikaven pe ćhaven te mangen le (Mat. 24:45). Na primer, ko časopis Probudite se! beršencar hine dinde but šukar savetija sar šaj o roditeljija te barjaćeren pe ćhaven. Ama, odola ista savetija šaj te arakhen hem ko amaro sajt ko deo serije ando člankija „Saveti za porodicu.“ Isto ađahar, ko amaro sajt isi but videa kola šaj te pomožinen e roditeljenđe te primeninen e Jehovase savetija đi barjaćerena pe ćhavenb (Posl. 2:4-6).

6. Sar jekhe dadese hem jekha dajaće pomožinđa odova so dobinđe andi Jehovasi organizacija?

⁶ But roditeljija tane zahvalna aso sa odova so o Jehova dela len prekali pi organizacija. Jekh dad kova vićini pe Džo, phenela: „Na hine amenđe lokho te barjaćera amare trine ćhaven. Mi romni hem me molinđam e Jehova te pomožini amen. But putija disave člankija ja videa hine odgovor ko amare molitve sose pomožinđe amenđe te ikljova ko krajo amare problemencar. Dinđam sa amendar te ićera amen ko Jehovase savetija.“ O Džo hem olesi romni phenđe so odola člankija ja videa but pomožinđe olenge ćhavenđe te oven paše e Jehovaja.

7. Sose o roditeljija valjani te den sa pestar te oven šukar primer pe ćhavenđe? (Rimljanima 2:21)

⁷ Dujto načelo: Ov šukar primer. But putija o ćhave ćerena odova so dikhena ando pe roditeljija. Naravno, o roditeljija nane savršena (Rimlj. 3:23). Ama, ipak valjani te mothoven šukar primer pe ćhavenđe. (Čitin Rimljanima 2:21.) Jekh roditelj phenela: „O ćhave tane sar sunđeri, on sa upijinena. On ka phenen tuće ked tu na ćereja odova so sikaveja len.“ Odolese, ako amen mangaja amare ćhave te mangen e Jehova, on valjani te dikhen kobor amen mangaja ole.

8-9. So šaj te sikljova ando Endru hem andi Ema?

⁸ O roditeljija šaj ko but načinija te sikaven pe ćhaven te mangen e Jehova. O Endru kova isi le 17 berš, phenela: „Amare roditeljija sikavđe amen soj tano but važno te molina amen. Svako rat me bi molinava man e Jehovase. Ama, palo odova hem mo dad bi molini pe zajedno mancar. Maje hem me phenjaće amare roditeljija uvek phenđe: ’Šaj te molinen tumen e Jehovase ked god hem kobor god mangena.‘ On sikavđe man so i molitva tani but važno. Odolese akana isi man navika redovno te molinav man e Jehovase hem upro leste te dikhav sar upro mo Dad.“ Roditeljija, niked ma bistren so ako tumen mangena e Jehova, odoleja ka podstakninen hem tumare ćhaven te mangen le.

⁹ Te dikha o primer andi Ema. Ked olako dad aćhavđa ola, olake phenja hem olake daja, palo peste mukhlja hem bare dugija kola olaki daj morandilji te platini. I Ema phenela: „But putija na hine amen pare, ama mi daj uvek phenđa so o Jehova ka brinini pe kotar pe sluge. Ando odova sar živinđa, ćaće dikhljum so verujini ko odova so phenela.“ So šaj te sikljova? O roditeljija šaj te mothoven but šukar primer pe ćhavenđe, iako isi len bare problemija (Gal. 6:9).

10. Ked o Izraelcija šaj hine te sikaven pe ćhaven ando Jehova? (Ponovljeni zakoni 6:6, 7)

¹⁰ Trito načelo: Redovno vaćer te ćhavencar. Ko purano vreme, o Jehova phenđa e Izraelcenđe so valjani redovno te vaćeren pe ćhavenđe olestar. (Čitin Ponovljeni zakoni 6:6, 7.) O Izraelcija prekalo dive hine len but prilike te vaćeren pe ćhavencar hem te sikaven len te mangen e Jehova. Na primer, jekh tikno Izraelco šaj hine pe dadeja ki njiva kuri sadinđe diso ja ćedinđe odova so barilo. Isto ađahar, olesi phen šaj hine ćhere pe dajaja kuri zajedno sivđe hem ćerđe avera buća ko ćher. Tegani šaj hine te vaćeren ando but buća. Na primer, kobor tano o Jehova šukar hem sar pomožini lenđe.

11. Ked o roditeljija šaj te vaćeren pe ćhavencar?

¹¹ Avdije, o životi tano averćhane. Ko but phuvja, o porodice našti te oven zajedno prekalo dive sose o roditeljija tane ki buti, a o ćhave ki škola. Odolese, o roditeljija valjani te odvojinen vreme ked ka vaćeren pe ćhavencar (Ef. 5:15, 16; Fil 1:10). Sebepi odova o porodično proučibe tano but važno, sose tegani šaj te vaćeren pe ćhavencar. Jekh terno phral, kova vićini pe Alehandro, phenela: „Mo dad uvek dela sa pestar redovno te ovel amen porodično proučibe hem na mukhela ništa te ćhinavi amen ando odova. Isto ađahar, isi amen navika palo porodično proučibe te beša hem te vaćera.“

12. So jekh dad na valjani te ćerel ko porodično proučibe?

¹² Ako hijan dad, so šaj te ćere te šaj te ćhave te uživinen ko porodično proučibe? Na primer, šaj te proučine te ćhavencar i knjiga Ov bahtalo zauvek! Odija knjiga šaj te pomožini tuće lokho te vaćere te ćhavencar. Tu mangeja te đane sostar razmislinena te ćhave hem so brinini len, ama ma bistri so o porodično proučibe nane vreme ked ka kritikujine te ćhaven ja te ispravine len. Ako on vaćerena diso so nane premalo odova so pisini ki Biblija ma holjan, već pohvalin te ćhaven so vaćerena po mišljenje hem podstaknin len hem ponodri te ćeren odova. Ako te ćhave na vaćerena tuće sostar razmislinena, tu niked na ka đane sar te pomožine len.

13. Kova tano pana jekh način sar o roditeljija šaj te sikaven pe ćhaven te oven paše e Jehovaja?

¹³ O roditeljija valjani te koristinen svako prilika te pomožinen pe ćhavenđe te oven paše e Jehovaja. On na sikavena len samo ked isi len biblijako kurs. Jekh daj koja vićini pe Lisa, phenđa: „Amen koristinaja sa so isi uzo amende te šaj te sikava amare ćhaven ando Jehova. Na primer, ked amaro đućel asaćeri len, odova koristinaja te sikava len soj tano o Jehova bahtalo Devel hem so odoleja so stvorinđa mangela hem amen te ćerel te ova radosna.“

14. Sose tano važno o roditeljija te pomožinen pe ćhavenđe te ovel len šukar amala? (Poslovice 13:20)

¹⁴ Štarto načelo: Pomožin te ćhavenđe te ovel len šukar amala. E Devleso Lafi phenela so o amala šaj te utičinen upro amende ko lošno ja ko šukar način. (Čitin Poslovice 13:20.) Roditeljija, da li tumen đanena kasa družinena pe tumare ćhave? Da li bešljen hari olencar te dikhen koj tane on? So šaj te ćeren te šaj te pomožinen tumare ćhavenđe te ovel len šukar amala? (1. Kor. 15:33). But tano važno zajedno tumare ćhavencar te družinen tumen okolencar kola tane paše e Jehovaja (Ps. 119:63).

15. Sar o roditeljija šaj te pomožinen pe ćhavenđe te ovel len šukar amala?

¹⁵ Akana ka dikha o iskustvo ando jekh dad kova vićini pe Toni. Ov hem olesi romni pomožinđe pe ćhavenđe te ovel len šukar amala. Ov phenela: „Beršencar, mi romni hem me vićinđam koro amende bute phralen hem phenjen. Na dikhljam da li tane terne ja phure. Družinđam amen olencar, haljam maro zajedno hem hine amencar ko amaro porodično proučibe. Tegani, najšukar penđarđam len. Hijam bahtale so hine amen prilika koro amende te soven but pokrajinska nadglednikija, misionarija hem avera zrela phralja. Olengi revnost, odova so nakhlje ko po životi hem kobor žrtvujinđe pe sebepi i služba, but šukar utičinđa upro amare ćhave hem pomožinđa len te aćhon paše e Jehovaja.“ Odolese, tumen roditeljija valjani te pomožinen tumare ćhavenđe te arakhen pese šukar amalen.

MA NAŠAL TI NADA

16. So na valjani te ćere ako to ćhavo ja ti ćhaj phenela so na mangela te služini e Jehovase?

¹⁶ O roditeljija šaj te den sa pestar te sikaven pe ćhaven ando Jehova. Ama, podijekh puti šaj jekh ando olenge ćhave na mangela te služini e Jehovase. E roditeljenđe šaj te ovel but pharo sebepi odova. Ama, na valjani pes te krivinen aso odova hem te mislinen so na sikavđe len šukar. Sose? Odolese so o Jehova dela slobodno volja sarinenđe, pa čak hem e ćhavenđe, te odlučinen da li ka služinen e Jehovase ja na. Ako to ćhavo ja ti ćhaj na mangela te služini e Jehovase, ma našal ti nada so jekh dive ka irini pe lese. Šaj but te ohrabrini tut o primer kotar buntovno ćhavo andi Isusesi priča (Luka 15:11-19, 22-24). Ov ikljilo ando ćher, ćerđa but lošna buća, ama ko krajo irinđa pe ćhere. Disave šaj te phenen: „Odija tani samo izmislimi priča, odova našti te ovel.“ O iskustvo ando amaro phral o Ili mothovi so odova šaj te ovel.

17. So sikljovaja ando Ili?

¹⁷ O Ili ando pe roditeljija phenđa: „Me roditeljija dinđe sa pestar te pomožinen man te mangav e Jehova hem e Devleso Lafi. Ama, ked hine man 15 berš uljum buntovno.“ O Ili ćorjalje počminđa te ćerel o buća kola nane šukar. Olese roditeljija manglje te pomožinen le te aćhol paše e Jehovaja, ama ov na šunđa len. Palo disavo vreme, ikljilo ando ćher hem ćerđa but lošna buća. Iako ćerđa odova, podijekh puti vaćerđa jekhe pe amaleja andi Biblija. O Ili phenela: „So pobuter vaćerđum me amaleja ando Jehova, pana pobuter razmislinđum e Jehovastar. O seme ando ćaćipe kova me roditeljija ćhivđe ko mo vilo, palem počminđa te barjol.“ Palo disavo vreme, o Ili irinđa pe e Jehovase.c Šaj samo te zamislina kobor olese roditeljija hine bahtale ked dikhlje so olengo trud te sikaven le ando Jehova na pelo ko pani (2. Tim. 3:14, 15).

18. So mislinena ando roditeljija kola dena sa pestar te sikaven pe ćhaven te mangen e Jehova?

¹⁸ Tumen sar roditeljija isi tumen jekh posebno čast, te bajraćeren jekh nevi generacija koja ka služini e Jehovase (Ps. 78:4-6). Odija nane lokhi buti. Odolese, mangaja te pohvalina tumen aso tumaro trud. Ako hem ponodri pomožinena tumare ćhavenđe te mangen e Jehova hem te šunen le, oven sigurna so o Jehova ka ovel but zadovoljno odoleja so ćerena (Ef. 6:4).