Ov spremno aso Jehovaso dive

1. So valjani te ćera te šaj te preživina e Jehovaso dive?

KED i Biblija vaćeri ando „Jehovaso dive“, tegani odova odnosini pe ko vreme ked o Jehova ka uništini pe dušmanen hem ka anel spasenje pe narodose. Ko purano vreme, o Jehova kazninđa disave narodon (Is. 13:1, 6; Jezek. 13:5; Sof. 1:8). Ko amaro vreme, „e Jehovaso dive“ ka počmini ked ka ovel napadimo o Baro Vavilon ja i hovavni religija hem ka završini pe e Armagedoneja. Te šaj te preživina odova dive, valjani akana te spremina amen. O Isus phenđa so valjani uvek te ova spremna asi „bari nevolja“, a odova tano jekh proces kova trajini (Mat. 24:21; Luka 12:40).

2. Sar šaj te pomožinen amen o lafija andi prva Solunjanima?

² Ked pisinđa po prvo lil e phralenđe ko Solun, o apostol Pavle koristinđa nekobor poređenja te šaj te pomožini lenđe te oven spremna aso Jehovaso baro dive ando sudo. O Pavle đanđa so e Jehovaso dive na ka avel tegani (2. Sol. 2:1-3). Ama, podstakninđa e phralen te pripreminen pe aso odova dive ka phene tajsa ka avel. Odova savet hem amen šaj te primenina. Te dikha sar o Pavle objasninđa: (1) sar ka avel e Jehovaso dive, (2) ko na ka preživini hem (3) sar šaj te pripremina amen te preživina odova dive.

SAR KA AVEL E JEHOVASO DIVE?

3. Sar e Jehovaso dive ka avel sar o ćor kova avela raćate? (Dikh i slika.)

³ „Sar so o ćor avela raćate“ (1. Sol. 5:2). Akava tano prvo ando trin poređenja kova o Pavle koristinđa te mothovi sar ka avel e Jehovaso dive. O ćora obično siđarena hem avena raćate ked o manuša na očekujinena len. Isto ađahar, e Jehovaso dive ka avel iznenada hem bute manušen ka iznenadini. Čak hem o prava hrišćanija šaj te oven iznenadime kobor o buća sigate ka desinen pe. Ama, amen na ka ova uništime nego o lošna.

4. Ko kova način tano e Jehovaso dive sar o dukha andi khamni romni?

⁴ „Sar o dukha e romnja koja valjani te bijani“ (1. Sol. 5:3). Jekh daj koja tani khamni našti te đanel ked tačno ka bijani. Ama, tani sigurno so ka bijani. O bijanibe avela iznenada, pherdo tano dukha hem niko našti te ćhinavi le. Isto ađahar, amen na đanaja o dive ja o vreme ked e Jehovaso dive ka počmini. Ama, ipak hijam sigurna so ka avel hem so e Devlesi presuda upro lošna ka avel iznenada hem so niko na ka ćhinavi la.

5. Ko kova način tani i bari nevolja sar ked phravđola o dive?

⁵ Sar ked phravđola o dive. Ko e Pavleso trito poređenje palem pominena pe o ćora kola avena raćate te ćoren. Ama, akava puti izgleda uporedini e Jehovaso dive odoleja sar ked phravđola o dive (1. Sol. 5:4). O ćora kola avena raćate verovatno na primetinena kobor o vreme sigate nakhela. Ked o dive ka phravđol šaj te ovel otkrijimo so ćerena. Isto ađahar, i „bari nevolja“ ka otkrijini okolen kola sar ćora aćhona ki tama sose na ćhinavena te ćeren odova soj tano lošno anglo Devlese jaćha. Ama, amen šaj te ova spremna ađahar so na ka ćera odova so o Jehova na mangela hem ka mothova „svako vrsta ando šukaripe, andi pravednost hem ando ćaćipe“ (Ef. 5:8-12). Akana ka dikha sar o Pavle koristini duj slična poređenja te opisujini okolen kola na ka preživinen.

KO NA KA PREŽIVINI E JEHOVASO DIVE?

6. Ko kova način but manuša sovena? (1. Solunjanima 5:6, 7)

⁶ „Okola so sovena.“ (Čitin 1. Solunjanima 5:6, 7.) Okolen kola na ka preživinen e Jehovaso dive, o Pavle uporedinđa e manušencar kola sovena. O manuša kola sovena nane svesna so ovela uzalo lende niti kobor vreme nakhlja. Sebepi odova, na đanena ked diso važno ulo hem našti ništa te ćeren. Avdije, but manuša sovena ko duhovno pogled (Rimlj. 11:8). On na verujinena so živinaja ko „poslednja dive“ hem so i bari nevolja tani but paše. Ked dikhena so ko sveto desini pe diso but baro, tegani disave manuša uštena ando duhovno sojbe hem šunena i šukar vest. Ama, but olendar palem irinena pe ko sojbe hem na mangena te aćhon đangavde. Čak hem disave kola verujinena so ka avel o dive ando sudo, mislinena soj tano odova dive but dur (2. Petr. 3:3, 4). Ama, amenđe kola đanaja so valjani te aćhova đangavde, e Pavleso savet tano but važno.

7. Sar okola so ka oven uništime tane sar okola so maćovena?

⁷ „Okola so maćovena“. O Pavle okolen kola ka oven uništime uporedinđa okolencar so maćovena. O manuša kola tane mate našti sigate te reagujinen ked ovela diso uzalo lende hem našti te anen šukar odluke. Isto ađahar, o lošna na reagujinena ked o Devel upozorini len. On kokri birinena te ovel len asavko životi kova legari ko uništenje. Ama, o hrišćanija valjani te oven đangavde hem trezvena (1. Sol. 5:6). Sar so phenela jekh izučavalac o lafi trezveno značini ked amen „hijam smirime, ispravno proceninaja o buća hem sebepi odova šaj te ana šukar odluke.“ Sose valjani te aćhova smirime? Odolese so odova ka pomožini amenđe te na mešina amen ko politička problemija ko sveto. Sar e Jehovaso dive avela sa popaše, o manuša ka mangen te đanen ki kasi strana hijam. Ama, amen na valjani te brinina amen. E Jehovaso duho šaj te pomožini amen te ovel amen mir, te aćhova smirime hem te ana šukar odluke (Luka 12:11, 12).

SAR ŠAJ TE PRIPREMINA AMEN ASO JEHOVASO DIVE?

8. Premali 1. Solunjanima 5:8, sova tane uporedime o osobine kola ka pomožinen amen te aćhova đangavde hem trezvena? (Dikh i slika.)

⁸ „Te ćhiva o oklop ... hem i kaciga.“ O Pavle uporedini amen e vojnikoja kova tano spremno hem uravdo aso maribe. (Čitin 1. Solunjanima 5:8.) Kotar vojniko uvek ađićeri pe te ovel spremno aso maribe. Slično tano hem amencar. Amen hijam spremna aso Jehovaso dive ađahar so akharaja o oklop andi vera hem ando mangipe hem i kaciga andi nada. Akala osobine šaj but te pomožinen amen.

9. Sar amari vera štitini amen?

⁹ Sar so o oklop štitini e vojnikoso vilo ađahar i vera hem o mangipe štitinena amaro simbolično vilo. Odola osobine ka pomožinen amen hem ponodri te služina e Jehovase hem te sledina e Isuse. Sebepi i vera, amen hijam sigurna so o Jehova ka nagradini amen sose rodaja le celone vileja (Jevr. 11:6). I vera ka podstaknini amen te aćhova verna e Isusese, čak hem ko pharipa. Odolese, te šaj te zorjaćera amari vera, valjani te sikljova kotar amare phralja sar on istrajinđe ked hine progonime hem ked hine len finansijska problemija. Šaj te cida amen kotar zamka ando materijalizam ađahar so ka oponašina okolen kola pojednostavinđe po životi te šaj te ćhiven o Kraljevstvo ko prvo than.b

10. Sar o mangipe premalo Devel hem o manuša pomožini amen te istrajina?

¹⁰ Isto ađahar, o mangipe tano but važno sose pomožini amen te aćhova đangavde hem trezvena (Mat. 22:37-39). O mangipe premalo Devel pomožini amen te istrajina đi propovedinaja, iako šaj te oven amen problemija (2. Tim. 1:7, 8). Odolese so mangaja okolen kola na služinena e Jehovase, amen hem ponodri propovedinaja ađahar so đaja kotar ćher ko ćher. Ked na arakhaja len ćhere, svedočinaja hem prekalo telefoni ja lila. Amen na našalaja amari nada so jekh dive on ka meninen pe hem ka počminen te ćeren odova soj tano šukar (Jezek. 18:27, 28).

11. Sar pomožini amen o mangipe kova mothovaja e phralenđe hem e phenjenđe? (1. Solunjanima 5:11)

¹¹ Amen mangaja hem amare phralen hem phenjen. Odova mothovaja ked „tešinaja hem zorjaćeraja jekh jekhe“ (Čitin 1. Solunjanima 5:11.) Sar so o vojnikija ko maribe jekh jekhese pomožinena hem amen hrabrinaja jekh jekhe. Naravno, ko maribe jekh vojniko šaj slučajno te povredini avere vojniko kova tano ki olesi strana, ama niked na ka ćerel odova namerno. Isto ađahar, ni amen niked namerno na ka povredina amare phralen niti ka irina o lošno lošnipaja (1. Sol. 5:13, 15). Isto ađahar, amen mothovaja mangipe ađahar so poštujinaja okolen kola predvodinena ki skupština (1. Sol. 5:12). Ked o Pavle pisinđa lil e phralenđe ko Solun, i skupština postojinđa pohari ando jekh berš. O phralja kola predvodinđe na hine odobor zrela hem šaj ćerđe disave greške. Ama, ipak zaslužinđe avera te poštujinen len. Sar i bari nevolja avela sa popaše, amen šaj ka zavisina ando amare lokalna starešine, čak hem pobuter nego akana sose on ka den amen smernice. Šaj o phralja kotar glavno sedište na ka šaj te den amen smernice niti o phralja kotar podružnica. Sebepi odova, but tano važno akana te manga hem te poštujina amare starešinen. So god te ovel, hajde sare te ova trezvena, te na dikha olenge mane, već sar o Jehova prekalo Isus vodini akale verno manušen.

12. Sar i nada štitini amare mislija?

¹² Sar so i kaciga štitini e vojnikoso šero, ađahar amari nada ando spasenje štitini amare mislija. Ako tani amari nada zorali, amen šaj te haljova so akava sveto nane le so te del amen (Fil. 3:8). Amari nada pomožini amen te ovel amen mir. Ko odova uverinđe pe o Volas hem i Lorinda, kola služinena ko Betel ki Afrika. Aso trin kurće i Lorinda našalđa pe daja, a o Volas pe dade. Sebepi i koronavirus, on našti hine te đan ćhere hem te oven pe porodicaja. O Vales pisinđa: „I nada ko uskrsenje pomožini man te mislinav upro lende, ama na sar hine lenđe ko poslednja dive ando akava sveto, već sar ka ovel lenđe ko prva dive ko nevo sveto. I nada dela man snaga ked hijum but tužno so našalđum len.“

13. So šaj te ćera te dobina sveti duh?

¹³ „Ma sprečinen e Devleso duho te delujini upro tumende“ (1. Sol. 5:19). O Pavle phenđa so o sveti duh delujini upro amende. Ako na sprečinaja le te delujini upro amende, amen ka ova revna hem ka ovel amen snaga te služina e Jehovase (Rimlj. 12:11). So šaj te ćera te dobina sveti duh? Šaj te molina amen e Jehovase te del amen po duho, te proučina oleso Lafi hem te ova deo andi olesi organizacija. Sa akava ka pomožini amen te barjaćera o „plod ando duho“ (Gal. 5:22, 23).

14. So valjani te cida amendar te šaj te dobina e Devleso duho? (Dikh i slika.)

¹⁴ Palo odova so o Jehova dela amen po sveti duh, amen valjani te trudina amen te na „sprečina e Devleso duho te delujini upro amende.“ O Devel dela po duho samo okolenđe kola isi len čista mislija hem postupkija. Ov na dela amen po duho ako isi amen melale mislija hem ćeraja odova soj tano melalo anglo lese jaćha (1. Sol. 4:7, 8). Ako mangaja te dobina sveti duh, amen na valjani te dikha „upro proročanstvija... sar diso bezvredno“ (1. Sol. 5:20). Ko akava stih o lafi „proročanstvija“ odnosini pe ko Jehovase poruke kola dela amen prekalo po duho, sar na primer so ka avel e Jehovaso dive hem kobor tano o kraj paše. Amen na valjani te mislina so o Armagedon na ka avel đi amen hijam đivde. Umesto odova, amen mothovaja so ađićeraja le hem soj tano but paše ađahar so daja sa amendar amare „delija te oven sveta“ hem ađahar so ćeraja odova soj tano čisto anglo Jehovase jaćha (2. Petr. 3:11, 12).

„SA PROVERINEN TE ŠAJ TE UVERINEN TUMEN“

15. So valjani te ćera te ne bi prevarinena amen e demonenge hovavne lafija? (1. Solunjanima 5:21)

¹⁵ Pana hari, e Devlese dušmanija ko disavo smisao ka objavinen: „Mir hem sigurnost!“ (1. Sol. 5:3). I propaganda koja ka avel ando demonija ka pherel i phuv hem but manuša ka oven prevarime (Otkr. 16:13, 14). So amen ka ćera? Amen na ka ova prevarime ako „sa proverinaja“. (Čitin 1. Solunjanima 5:21.) O grčko lafi kova ko akava stih prevodini pe sar „proverinen“ koristinđa pe te opisini o način sar o manuša proverinđe o metalija, sar soj tane o zlato ja o srebro, te oven sigurna soj tane prava. Odolese, amen valjani odova so šunaja ja čitinaja uvek te proverina da li tano ćaće. Odova hine važno e phralenđe ko Solun, a pana považno ka ovel amenđe sar tani i bari nevolja sa popaše. Umesto te verujina ko sa so avera phenena, amen valjani te koristina amari sposobnost te razmislina hem te uporedina odova so čitinaja ja šunaja odoleja so i Biblija hem e Jehovasi organizacija phenena. Ked ka ćera odova, o lafija kola ka aven ando demonija na ka prevarinen amen (Posl. 14:15; 1. Tim. 4:1).

16. Koja nada isi amen hem so hijam odlučna te ćera?

¹⁶ Amen đanaja so e Devleso narodo ka preživini i bari nevolja. Ama, niko amendar na đanela so anela o tajsato dive (Jak. 4:14). Odolese bilo te ova đivde ked ka avel i bari nevolja ja meraja angleder, ako đi o krajo ando amaro životi aćhovaja verna, amen ka dobina o večno životi. O pomazanikija ka oven e Hristeja ko nebo. A o avera bakre ka oven ko raj ki phuv. Hajde sare te da sa amendar hor te razmislina andi amari nada hem te ova spremna aso Jehovaso dive!