Pućiba ando čitaocija

Kobor hine ućo o predvorje ando Solomoneso hram?

O predvorje hine ko ulaz andi Svetinja. Premalo prevod Novi svet, kova ikljilo angleder o 2023. berš, „o predvorje anglo ćher hine buvlo 20 lakatija, kobor hine buvlo o ćher, a ućo 120“ (2. Let. 3:4). Avera prevodija phenena so o predvorje hine ućo „120 lakatija“, so značini so odova hine jekh kula ando 53 metre!

Ama, ko prevod Novi svet ando 2023. berš, kotar predvorje ando Solomoneso hram pisini: „Ov hine ućo 20 lakatija“ ili skoro enja metre.a Akana ka razmotrina nekobor razlogija asi odija promena.

Ki 1. Kraljevima 6:3 na pomini pe kobor hine ućo o predvorje. Ko akava stih, o Jeremija pominđa kobor tano o predvorje buvlo hem dugačko, ama na hem kobor hine ućo. Palo odova, ko aver poglavlje detaljno vaćerđa ando avera delovija kotar hram. Na primer, vaćerđa kotar more ando liveno metali, kotar deš kolice hem kotar duj stubija ando bakar kola hine anglo predvorje (1. Kralj. 7:15-37). Ako o predvorje ćaće hine prekalo 50 metre ućo hem hine but poućo ando avera delovija kotar hram, sose tegani o Jeremija na pominđa kobor hine ućo? Čak hem beršencar palo odova, o jevrejska istoričarija pisinđe so o predvorje na hine poućo ando avera delovija kotar Solomoneso hram.

O izučavaocija sumnjinena ko odova so o zidija ko hram šaj hine te ićeren 120 lakatija ućo predvorje. O uće kule ando bara ili o cigle ando purano vreme, sar soj tane o udara ando hramija ko Egipat, hine len but buvlo temelji, a sar đelje poupre hine potesna. Ama, e Solomoneso hram hine averćhane. O izučavaocija phenena so olese zidija na hine pothule ando šov lakatija ja 2,7 metre. Jekh istoričari andi arhitektura, o Teodor Busink, phenela: „Premalo odova save hine o zidija [ko ulaz kotar hram], o predvorje našti hine te ovel ućo 120 lakatija.“

O tekst andi 2. Letopisa 3:4 šaj hine pogrešno prepisimo. Iako ko disave purane manuskriptija ko akava stih pisini 120 lakatija, ko disave avera pouzdana tekstija, sar soj tano o Aleksandrijsko kodeks ando panđto veko hem o Amvrosijsko kodeks kotar šovto veko, pisini 20 lakatija. Da li o piscija ćerđe greška hem pisinđe „120“? O lafija „šel“ hem „lakatija“ ki hebrejsko ćhib dićhona but slično. Odolese, šaj o pisco umesto te pisini „lakatija“, ov pisinđa „šel“.

Naravno, iako trudinaja amen te haljova akala detaljija hem tačno te mothova savo hine e Solomoneso hram, amen pobuter razmislinaja ando odova so o hram predstavini. Ov predstavini o duhovno hram. Kobor samo hijam zahvalna so o Jehova vićinđa amen te služina lese ko odova hram (Jevr. 9:11-14; Otkr. 3:12; 7:9-17.)