Terne phraljalen – oponašinen e Marko hem e Timoteje

1-2. So šaj hine te ćhinavi e Marko hem e Timoteje te služinen averenđe pana pobuter?

TERNE phraljalen, da li mangena te ćeren diso pobuter ki služba e Jehovase hem te pomožinen pana pobuter ki skupština? Sigurna hijam so mangena. Bahtale hijam ked dikhaja so but terne spremno služinena averenđe (Ps. 110:3). Ama, odova nane uvek lokho. Da li daraja te ćere diso pobuter ki služba sose na đaneja so ađićeri tut? Da li odbinđan te ćere disavo zadatko odolese so nane tut dovoljno samopouzdanje? Ako ja, tegani na hijan jedino.

² O Marko hem o Timotej hine len slična osećanja. Ama, iako na đanđe kobor olengo životi ka menini pe ja šaj osetinđe pe so nane sposobna, on ipak ćerđe pana pobuter buća ki služba e Jehovase. O Marko verovatno živinđa pe dajaja ko jekh šukar ćher ked o apostol Pavle hem o Varnava vićinđe le te đal olencar ko olengo prvo misionarsko putovanje (Dela 12:12, 13, 25). Ov mukhlja po ćher te šaj te ćerel pana pobuter ki služba e Jehovase. Najangleder, selinđa pe ki Antiohija, a palo odova e Pavleja hem e Varnavaja đelo ko avera dur thana (Dela 13:1-5). Isto ađahar, o Timotej najverovatnije živinđa pe roditeljencar ked o Pavle vićinđa le te sarađujini oleja. Odolese so hine terno, ov šaj hine te osetini pe so nane dovoljno sposobno te đal e Pavleja. (Uporedin e stihonencar andi 1. Korinćanima 16:10, 11 hem 1. Timoteju 4:12.) Ama, ipak đelo e Pavleja hem sebepi odova hine le bare blagoslovija (Dela 16:3-5).

3. (a) Sar đanaja so o Pavle but ceninđa e Marko hem e Timoteje? (2.Timoteju 4:6, 9, 11; dikh o slike.) (b) Ando kola pućiba ka vaćera ko akava članko?

³ O Marko hem o Timotej stekninđe iskustvo hem sikljilje sar te ćeren pe zadatkija pana đi hine terne. O Pavle odobor ceninđa len so kasnije manglja te oven uzo leste angleder oleso meribe. (Čitin 2.Timoteju 4:6, 9, 11.) Sebepi kola osobine o Marko hem o Timotej sviđinđe pe e Pavlese? Sar šaj o terne te oven sar olende? Sar šaj e ternenđe te pomožini o savet kova o Pavle dinđa len?

OPONAŠIN E MARKO – OV SPREMNO TE SLUŽINE

4-5. Sar o Marko mothovđa soj tano spremno te služini averenđe?

⁴ Te služine averenđe značini te de sa tutar te pomožine lenđe, pa čak hem ked odova nane lokho. O Marko hine but šukar primer ko odova. Ked o Pavle na manglja te lel le peja ko po dujto misionarsko putovanje, o Marko verovatno hine povredimo hem razočarimo (Dela 15:37, 38). Ama, da li odova ćhinavđa e Marko te služini e phralenđe hem e phenjenđe? Na.

⁵ O Marko đelo pe rođakoja e Varnavaja te služini ko aver than. Palo 11 berš, đi o Pavle hine ko zatvor ko Rim, o Marko pomožinđa lese (Filim. 23, 24). O Pavle but ceninđa olesi pomoć hem phenđa so ov „but utešinđa le“ (Kol. 4:10, 11).

6. Sar e Markose pomožinđa odova so družinđa pe e zrelo hrišćanencar? (Dikh i fusnota.)

⁶ E Markose but pomožinđa odova so družinđa pe e zrelo hrišćanencar. Palo odova so disavo vreme hine e Pavleja ko Rim, o Marko đelo te posetini e Petare ko Vavilon. On duj ulje odobor paše so o Petar phenđa soj tano o Marko olese sar ćhavo (1. Petr. 5:13). Đi sarađujinđe, o Petar verovatno vaćerđa lese but zanimljiva detaljija ando Isuseso životi hem služba, a kola kasnije o Marko pisinđa ko po jevanđelje.a

7. Sar o phral Seng Vo oponašinđa e Markoso primer? (Dikh i slika.)

⁷ O Marko hine revno ki služba hem hine paše e zrelo phralencar. Sar šaj te oponašine le? Šaj hem tu mangeja te ćere diso pobuter ki služba e Jehovase, možda ađahar so ka služine sar sluga pomoćnik ili sar starešina, ama pana na ispunineja o uslovija aso odova. Ako tano ađahar, ma obeshrabrin tut, nego dikh sar šaj pobuter te služine e Jehovase hem e phralenđe ki skupština. Te dikha o primer ando Seng Vu, kova akana služini sar starešina. Ked hine terno, ov uporedinđa pe avere terne phralencar. Disave olendar hine len disave zaduženja angleder oleste. O Seng Vu hine povredimo hem razočarimo, ko krajo phenđa e starešinenđe sar osetini pe. Jekh starešina phenđa lese so bi ovela šukar te dikhel sar šaj te služini averenđe čak iako podijekh puti avera na ka primetinen o šukar buća kola ćerela. Odova savet podstakninđa le te počmini te vozini e phuren hem okolen kase valjanđa pomoć te đan ko sastanak. Ked razmislini ando odova vreme, ov phenela: „Haljiljum so ćaće značini te služine averenđe. Hijum le but bahtalo so šaj hine te pomožinav averenđe.“

OPONAŠIN E TIMOTEJE – MOTHOV SO BRININEJA TUT AVERENĐE

8. Sose o Pavle manglja o Timotej te putujini oleja? (Filipljanima 2:19-22)

⁸ Ked o Pavle irinđa pe ko dizja kuri hine progonimo, olese valjanđe hrabra phralja kola ka putujinen oleja. Najangleder, ov birinđa e Sila, sose beršencar služinđa e Jehovase (Dela 15:22, 40). Kasnije, birinđa e Timoteje te ovel oleso saradniko. Ama, sose baš e Timoteje? Jekh razlog tano so hine ko šukar glaso maškaro phralja (Dela 16:1, 2). Isto ađahar, ov iskreno brininđa pe ando manuša. (Čitin Filipljanima 2:19-22.)

9. Sar o Timotej mothovđa so ćaće brininđa pe ando phralja hem phenja?

⁹ Ked počminđa te služini e Pavleja, o Timotej pana ki početka mothovđa so brinini pe averendar pobuter nego pestar. Sebepi odova, o Pavle mukhlja le ki Verija te šaj te ohrabrini e neve phralen hem phenjen uduri (Dela 17:13, 14). Tegani, o Timotej but buća sikljilo ando Sila kova isto aćhilo ki Verija. Kasnije, o Pavle bićhalđa le kokri ko Solun te zorjaćeri e phralen kola živinđe ki odija diz (1. Sol. 3:2, fusn.). Ko naredna 15 berš, e Timotejeso mangipe premalo phralja hem phenja odobor barilo so ov podijekh puti čak hem runđa ked o phralja patinđe (Rimlj. 12:15; 2. Tim. 1:4). Sar šaj o terne te oponašinen e Timoteje?

10. Sar jekh phral sikljilo te brinini pe poviše averendar?

¹⁰ Jekh phral kova vićini pe Vu Đe, sikljilo te brinini pe poviše averendar. Ked hine terno, olese hine pharo te počmini te vaćeri e phure phralencar hem phenjencar. Odolese, ked hine ko sastanak, ov samo pozdravinđa pe olencar. Jekh starešina predložinđa lese te počmini te vaćeri olencar ađahar so ka phenel lenđe so cenini koro lende. Isto ađahar, phenđa lese hem so šaj te razmislini odolestar so averen zanimini. Ov primeninđa odova savet. Avdije, o Vu Đe tano starešina hem ov phenela: „Akana maje but polokho te vaćerav averencar kola nane me berša. But pošukar haljovava len. Polokho tano maje te brininav man ando me phralja hem phenja.“

11. Sar šaj o terne phralja te mothoven so brininena pe averendar ki skupština? (Dikh i slika.)

¹¹ Terne phraljalen, hem tumen šaj te sikljon te mothoven averenđe so brininena tumen olendar. Ked hijen ko sastankija, trudinen tumen te vaćeren sa e phralencar hem e phenjencar, bizo obzir kobor berš isi len ili andi savi kultura avena. Puć len sar tane hem palo odova šun so ka phenen tuće. Ađahar ka đane sar šaj te pomožine len. Šaj đaneja so jekhe bračno parese kola tane phure valjani pomoć te sikljon te koristinen amari aplikacija JW Library^®. Ja šaj đaneja so nane len kasa te đan ki služba. Da li šaj te pomožine len te sikljon te koristinen po tablet ili po telefoni? Da li šaj te đa olencar ki služba? Ked pomožineja e phralenđe hem e phenjenđe ko asavke načinija, tegani mothoveja but šukar primer ki skupština.

E PAVLESO SAVET ŠAJ TE POMOŽINI TUĆE

12. Sar šaj e terne phralenđe te pomožinen o savetija kola o Pavle dinđa e Timotejese?

¹² O Pavle dinđa savetija e Timoteje te šaj te pomožini lese te ovel pobahtalo hem potpuno te ćerel pi služba (1. Tim. 1:18; 2. Tim. 4:5). Ako hijan terno, e Pavlese savetija šaj hem tuće te pomožinen. Sar? Čitin e Pavlese duj lila kola pisinđa e Timotejese sar ka phene pisinđa len lično tuće hem dikh so šaj te primenine ko to životi. Akana ka razmotrina disave ando odola savetija.

13. So ka pomožini amen te ova verna e Jehovase?

¹³ „Vežbin te ove verno e Devlese“ (1. Tim. 4:7b). O Pavle phenđa e Timotejese te ovel verno e Jehovase hem te ćerel odova so ka radujini le. Odolese so na hijam bijande odola osobinaja, amen valjani te razvijina la. Sar šaj te ćera odova? O grčko lafi kova tano prevodimo sar „vežbin“, koristinđa pe te opisujini kobor o atletičarija vežbinena te šaj te spreminen pe aso takmičenje. Olenđe valjanđa samodisciplina. Isto ađahar, hem amenđe valjani samodisciplina te šaj te oven amen disave navike kola ka ćeren amen te ova popaše e Jehovaja.

14. So valjani te ovel amaro cilj đi čitinaja i Biblija? Vaćer jekh primer.

¹⁴ But tano važno te ovel tut navika te čitine i Biblija svako dive. Ama, ma bistri so o razlog sose čitineja tano te ove popaše e Jehovaja. Na primer, so šaj te sikljove đi čitineja o izveštaj ando Isus hem o terno poglavari? (Mar. 10:17-22). Odova terno ćhavo verujinđa so o Isus tano o Mesija, ama na hine le dovoljno vera te šaj te ovel oleso učenik. O Isus manglja odole ćhave, iako olesi vera na hine zorali. Da li sviđini pe tuće sar o Isus vaćerđa akale terne ćhaveja? O Isus manglja te pomožini lese te anel mudro odluka. Isto ađahar, ando odova sar o Isus ponašinđa pe premalo leste dićhilo kobor o Jehova mangela le (Jov. 14:9). Đi razmislineja ando akava izveštaj hem ando te okolnostija, puć tut: „So šaj te ćerav te šaj te ovav pana popaše e Jehovaja hem sar šaj pana pobuter te pomožinav averenđe?“

15. Sose tano važno jekh terno phral te ovel šukar primer averenđe? Vaćer jekh primer. (1. Timoteju 4:12, 13)

¹⁵ „Ov šukar primer okolenđe soj tane verna.“ (Čitin 1. Timoteju 4:12, 13.) O Pavle podstakninđa e Timoteje na samo te razvijini o veštine, sar na primer te čitini hem te sikavi, nego hem o osobine, sar soj tane mangipe, vera hem čestitost. Sose? Odolese soj tano považno odova so jekh manuš ćerela, nego odova so phenela. Zamislin so dobinđan te ićere govor ando odova sar šaj te ova pana porevna ki služba. Polokho ka ovel tuće te vaćere odolestar, ako tu već deja sa tutar ki služba. I publika ka ovel poviše podstaknimi te primenini odova sostar vaćereja ako tu hijan šukar primer ko odova (1. Tim. 3:13).

16. (a) Ko kola buća šaj jekh terno hrišćanin te ovel šukar primer? (b) Sar šaj jekh terno phral te ovel primer ko odova „sar vaćeri“?

¹⁶ Sar so pisini ki 1. Timoteju 4:12, o Pavle pominđa panđ buća ko kola o terne phralja šaj te oven šukar primer. Šukar bi ovela te odvojine vreme te proučine sa akala buća. Na primer, zamislin so mangeja te ove pošukar ko odova sar „vaćereja averencar“. Razmislin sar šaj te ohrabrine averen. Ako pana živineja te roditeljencar, da li šaj hari počesto te vaćere lenđe kobor hijan lenđe zahvalno aso odova so ćerena tuće? Palo sastanak, šaj disave phralese ja phenjaće te phene so sviđinđa pe tuće ko oleso govor ili ko olako prikaz. Isto ađahar, šaj te trudine tut te de komentarija te lafencar. Ked ka de sa tutar te ove primer ko odova sar vaćereja averencar, avera ka dikhen so tu trudineja tut te ove pana pošukar e Jehovaso sluga (1. Tim. 4:15).

17. So ka pomožini jekhe terne phralese te ispunini pe ciljija? (2. Timoteju 2:22)

¹⁷ „Naš ando ternikane želje, a rode i pravednost.“ (Čitin 2. Timoteju 2:22.) O Pavle podstakninđa e Timoteje te borini pe protiv o želje kola šaj te ciden le ando odova te ispunini pe duhovna ciljija hem kola šaj te anen đi odova te rumini po amalipe e Jehovaja. Šaj haljiljan so but vreme đala tuće ki rekreacija hem odolese nane tut vreme te ćere diso pobuter e Jehovase. Na primer, razmislin kobor vreme đala tuće ko sport, ko internet ili ko igrice. Da li šaj odova vreme te koristine aso teokratska aktivnostija? Možda šaj te pomožine te održini pe i dvorana ili te đa ki služba e kolicencar. Ako ka ćere odola buća, verovatno ka arakhe amalen kola ka podstakninen tut te ispunine te ciljija.

KED SLUŽINAJA AVERENĐE ISI AMEN BUT BLAGOSLOVIJA

18. Sose šaj te phena so o Marko hem o Timotej hine len but šužo životi?

¹⁸ O Marko hem o Timotej ćerđe bare žrtve te šaj poviše te služinen averenđe hem sebepi odova hine len but šužo životi (Dela 20:35). Te šaj te služini pe phralenđe, o Marko putujinđa ko razna thana. Isto ađahar, pisinđa jekh jevanđelje, kuri ko jekh zanimljivo način opisujinđa e Isuseso životi hem služba. O Timotej pomožinđa e Pavlese te ćerel neve skupštine hem te ohrabrini e phralen hem e phenjen. O Jehova dikhlja olenge žrtve hem sigurno hine but bahtalo sebepi odova.

19. Sose o terne phralja valjani te šunen o savetija kola o Pavle dinđa e Timotejese hem savo životi ka ovel len ako šunena odova savet?

¹⁹ Amen šaj te dikha kobor o Pavle manglja e Timoteje ando odova so pisinđa lese ko pe lila. Isto ađahar, odola lila mothovena so o Jehova but mangela e terne phralen. Ov mangela te ovel tumen šužo životi đi služinena lese. Odolese, de sa tutar te primenine e Pavlese savetija hem te ćere diso pobuter ki služba. Ako ka ćere odova hem tu ka ovel tut šužo životi akana, a ki budućnost šaj te dobine o „ćaćutno životi“ (1. Tim. 6:18, 19).